பாரிய பண மோசடி தொடர்பில் விளக்கமறியலில் வைக்கப்பட்டுள்ள திகோ குழுமத்தின் உரிமையாளர் திலினி பிரியமாலியை ஐம்பதாயிரம் ரூபா ரொக்கம் மற்றும் 10 மில்லியன் ரூபா பெறுமதியான இரண்டு சரீரப் பிணைகளில் விடுதலை செய்யுமாறு கொழும்பு கோட்டை நீதவான் திலின கமகே இன்று (16) உத்தரவிட்டுள்ளார்.
இந்த வழக்கில், சந்தேகநபர் வெளிநாடு செல்வதற்கு தடை விதித்த நீதிமன்றம், ஒவ்வொரு மாதமும் கடைசி ஞாயிற்றுக்கிழமை காலை 9 மணி முதல் 12 மணி வரை குற்றப் புலனாய்வு திணைக்களத்தில் ஆஜராகுமாறு நிபந்தனை விதித்தது.
வெளிநாட்டு பயணத்தடை தொடர்பான உத்தரவை குடிவரவு குடியகல்வு கட்டுப்பாட்டாளருக்கு அறிவிக்குமாறு நீதவான் நீதிமன்ற பதிவாளருக்கு உத்தரவிட்டுள்ளார்.
இந்த சம்பவம் தொடர்பில் நீதிமன்றத்தில் விசாரணைக்கு உட்படுத்தப்பட்ட மேலும் ஏழு பேருக்கு கடந்த செவ்வாய்க்கிழமை நீதிமன்றம் பிணை வழங்கியது.
