உக்ரைனில் கைப்பற்றப்பட்ட நான்கு பகுதிகளை ரஷ்யா தன்னுடன் இணைக்க முயற்சித்ததை கண்டித்து ஐக்கிய நாடுகளின் பொதுச் சபை வாக்களித்தது. இந்த நடவடிக்கையை அங்கீகரிக்க வேண்டாம் என்று உறுப்பு நாடுகளை வலியுறுத்தியுள்ளது.
புதன்கிழமை நடந்த வாக்கெடுப்பில், 193 உறுப்பினர்களைக் கொண்ட பொதுச் சபையில் முக்கால்வாசிப் பகுதியினர் – 143 நாடுகள் – சர்வதேச அளவில் அங்கீகரிக்கப்பட்ட எல்லைகளுக்குள் உக்ரைனின் இறையாண்மை, சுதந்திரம், ஒற்றுமை மற்றும் பிராந்திய ஒருமைப்பாட்டை மீண்டும் உறுதிப்படுத்தும் தீர்மானத்தை ஆதரித்தன.
“இது ஆச்சரியமாக இருக்கிறது,” என்று உக்ரைனின் ஐ.நா தூதர் செர்ஜி கிஸ்லிட்சியா வாக்களித்த பிறகு செய்தியாளர்களிடம் கூறினார். அவர் ஐக்கிய நாடுகள் சபைக்கான அமெரிக்க தூதர் லிண்டா தாமஸ்-கிரீன்ஃபீல்டுக்கு அருகில் நின்றார். இதன் விளைவாக ரஷ்யாவால் உலகை அச்சுறுத்த முடியாது என்று கூறினார்.
சிரியா, நிகரகுவா, வட கொரியா மற்றும் பெலாரஸ் ஆகிய நான்கு நாடுகள் ரஷ்யாவுடன் இணைந்து தீர்மானத்திற்கு எதிராக வாக்களித்தன. சீனா, இந்தியா மற்றும் இலங்கை உட்பட மேலும் 35 நாடுகள் வாக்களிப்பில் இருந்து விலகின.
உக்ரைனில் பகுதியளவு ஆக்கிரமிக்கப்பட்ட நான்கு பகுதிகளை – டோனெட்ஸ்க், லுஹான்ஸ்க், கெர்சன் மற்றும் சபோரிஷியா – செப்டம்பரில் சர்வஜன வாக்கெடுப்பை நடத்தி தன்னுடன் இணைத்ததாக ரஷ்யா அறிவித்தது.
உக்ரேனும் அதன் நட்பு நாடுகளும் இந்த வாக்குகளை சட்டவிரோதமானவை மற்றும் கட்டாயப்படுத்தப்பட்டவை என்று கண்டித்துள்ளன.
கடந்த மாதம் 15 உறுப்பினர்களைக் கொண்ட பாதுகாப்பு கவுன்சிலில் இதேபோன்ற தீர்மானத்தை ரஷ்யா வீட்டோ செய்ததைத் தொடர்ந்து பொதுச் சபை வாக்கெடுப்பு நடந்தது.
ரஷ்யாவின் ஐநா தூதர் வசிலி நெபென்சியா வாக்கெடுப்புக்கு முன்னதாக பொதுச் சபையில் தீர்மானம் “அரசியல்மயமாக்கப்பட்டது மற்றும் வெளிப்படையாக ஆத்திரமூட்டல்” என்று கூறினார். மேலும் “நெருக்கடிக்கு இராஜதந்திர தீர்வுக்கு ஆதரவாக எந்தவொரு மற்றும் அனைத்து முயற்சிகளையும் அழிக்க முடியும்” என்றும் கூறினார்.
“பொதுச் சபையால் எடுக்கப்படும் எந்தவொரு நடவடிக்கையும் நிலைமையை தணிக்க, பேச்சுவார்த்தையை மீண்டும் தொடங்குவதற்கு உகந்ததாக இருக்க வேண்டும் மற்றும் இந்த நெருக்கடிக்கு ஒரு அரசியல் தீர்வை மேம்படுத்துவதற்கு சாதகமாக இருக்க வேண்டும்,” என்று அவர் கூறினார்.
அமெரிக்காவும் மற்ற மேற்கத்திய நாடுகளும் புதன்கிழமை வாக்கெடுப்புக்கு முன்னதாக ஏனைய நாடுகளை ஆதரித்து வாக்களிக்க வற்புறுத்தின. செவ்வாயன்று அமெரிக்க வெளியுறவுத்துறை செயலர் ஆண்டனி பிளிங்கன் 100க்கும் மேற்பட்ட நாடுகளைச் சேர்ந்த தூதர்களுடன் மெய்நிகர் சந்திப்பைக் கூட்டினார்.
2014 இல் கிரிமியாவை ரஷ்யா தன்னுடன் இணைத்த போது, அமெரிக்க தரப்பை ஆதரித்த நாடுகளை விட, இம்முறை டசின் கணக்கான வாக்குகள் அதிகரித்துள்ளன
