மே மாதம் 9ஆம் திகதி முதல் ஜூலை மாதம் 12ஆம் திகதி வரை நாட்டில் ஏற்பட்டுள்ள அமைதியின்மை தொடர்பில் ஆராய்வதற்காக ஜனாதிபதி ஆணைக்குழுவொன்றை நியமிக்குமாறு பிவித்துரு ஹெல உறுமய ஜனாதிபதியிடம் கோரிக்கை விடுத்துள்ளது.
ஆணைக்குழுவொன்றை ஸ்தாபித்தால் அமைதியின்மைக்கு காரணமானவர்கள் தொடர்பான சாட்சியங்களை சமர்ப்பிக்க தயார் என அக்கட்சியின் தலைவர் பாராளுமன்ற உறுப்பினர் உதய கம்மன்பில தெரிவித்துள்ளார்.
இன்று (22) இடம்பெற்ற ஊடகவியலாளர் சந்திப்பில் கலந்து கொண்டு கருத்து தெரிவித்த பாராளுமன்ற உறுப்பினர் கம்மன்பில,
“நாட்டை சீர்குலைக்கும் சதியில் நாட்டிற்கு உள்ளேயும் வெளியேயும் சக்திகள் இருந்தன, அதே போல் அரசாங்கத்திற்குள் இருந்து நாட்டை சீர்குலைக்கும் சக்திகள் இருந்தன என்பது மிகவும் தெளிவாக உள்ளது. மோசடி, ஊழல், திட்டமிட்ட தவறான முடிவுகள், அலட்சியம் போன்ற காரணங்களால் இன்று மக்கள் எதிர்நோக்கும் சிரமங்கள் ஏற்பட்டன. ஏன் இந்த நிலை ஏற்பட்டது? அதற்கு யார் பொறுப்பு? இது சரிசெய்யப்படாவிட்டால், எதிர்காலத்தில் மீண்டும் இந்த துரதிர்ஷ்டவசமான காலம் வரும் அபாயம் உள்ளது.”
பொருளாதார நெருக்கடிக்கான காரணங்கள் மற்றும் அதற்கு யார் பொறுப்பு என்பது தொடர்பில் ஆராய்ந்து அறிக்கையிடுவதற்கு உடனடியாக மற்றுமொரு ஜனாதிபதி ஆணைக்குழு நியமிக்கப்பட வேண்டும்.
அவ்வாறானதொரு ஜனாதிபதி ஆணைக்குழு நியமிக்கப்பட்டால், இந்த நாட்டை இந்த நிலைக்கு கொண்டு வருவதற்கு யார் கவனக்குறைவான மற்றும் தவறான முடிவுகளை எடுத்தார்கள் என்ற உண்மைகளை ஆதாரங்களுடன் அந்த ஆணைக்குழுவின் முன் முன்வைக்க நான் தயாராக உள்ளேன் என பாராளுமன்ற உறுப்பினர் கம்மன்பில தெரிவித்துள்ளார்.
எதிர்வரும் செப்டெம்பர் மாதம் 4ஆம் திகதி புதிய கூட்டணி அமைக்கப்படும் என பாராளுமன்ற உறுப்பினர் கம்மன்பில தெரிவித்துள்ளார்.
எதிர்க்கட்சிகள் தற்போது பல்வேறு பிரச்சினைகளில் அரசாங்கத்தை விமர்சித்து வருவதாகவும், பொதுமக்களின் கவலைகளை வெளிச்சத்திற்கு கொண்டு வருவதாகவும் அவர் கூறினார்.
எவ்வாறாயினும், நிலவும் பிரச்சினைகளுக்கு தீர்வு கிடைக்காமையே பிரதான கவலையாக உள்ளது என பாராளுமன்ற உறுப்பினர் கம்மன்பில தெரிவித்துள்ளார்.
எதிர்க்கட்சிகள் குறைகளை எழுப்பினாலும் தீர்வுகள் இன்னும் முன்வைக்கப்படவில்லை என அவர் குற்றம் சுமத்தியுள்ளார்.
அரசாங்கத்தையோ அல்லது எதிர்க்கட்சியையோ விமர்சிப்பது மாத்திரம் அல்ல, மக்களின் குறைகளுக்கு தீர்வுகளை கூட்டமைப்பு வழங்கும் என பாராளுமன்ற உறுப்பினர் கம்மன்பில குறிப்பிட்டுள்ளார்.
