நேர தாமதம் வாழ்க்கையில் பல முக்கியமான விடயங்களை இழக்கச் செய்து விடும் என்பதற்கு மற்றொரு உதாரணமான சம்பவமொன்று நடந்துள்ளது.
மது விருந்தில் கலந்து கொண்டதால் சரியான நேரத்திற்கு மணமகனால் திருமணத்திற்கு செல்ல முடியவில்லை. நீண்டநேரம் காத்திருந்து களைத்த மணமகள், திருமணத்திற்கு வந்திருந்த உறவினர் ஒருவரை மணமகள் மணந்துள்ளார்.
இந்த சுவாரஸ்ய சம்பவம் இந்தியாவின் மகாராஷ்டிரா மாநிலம் புல்தானா மாவட்டத்தில் உள்ள மல்காபூர் பங்ரா கிராமத்தில் கடந்த வெள்ளிக்கிழமை (22) நடைபெற்றது.
மாலை 4 மணிக்கு விழா தொடங்குவதற்கான ஏற்பாடுகள் செய்யப்பட்டிருந்தன. மணமகள் மற்றும் அவரது குடும்பத்தினர் திருமணத்திற்கு வந்து நீண்ட நேரம் காத்திருந்தனர்.
ஆனால் மணமகன் வரவில்லை.
திருமணமாகும் மகிழ்ச்சியை கொண்டாட மணமகன் தனது நண்பர்களுடன் மது விருந்து வைத்திருந்தார். அங்கு அவர்கள் குடித்து, நடனமாடிக் கொண்டிருந்தன்.
இறுதியில் இரவு 8 மணிக்கு திருமண நிகழ்விற்கு வந்தனர்.
மணமகனும் நண்பர்களும் குடிபோதையில் காணப்பட்டனர். திருமண மண்டபத்தில் அநாகரிகமாக நடந்து கொண்டதுடன், விருந்தினர்களுடனும் தகராற்றில் ஈடுபட்டனர்.
மாலை 4 மணிக்கு திருமணம். மணமகன் வந்ததோ இரவு 8 மணி. போதாதற்கு குடிபோதையில் வந்து ரகளையும் செய்தார். இதனால் மணமகளின் தந்தை கடுப்பாகி விட்டார்.
குடிகாரனிற்கு தனது மகளை திருமணம் செய்து கொடுக்க மறுத்து விட்டார்.
உடனடியாக, மாற்று ஏற்பாடு செய்யப்பட்டது. திருமணத்திற்கு வந்திருந்த உறவினர் ஒருவருடன் பேசி, அவரை மணமகனாக்கினார்கள்.
