உக்ரேனில் ஏற்பட்டுள்ள நெருக்கடியின் விளைவாக ஏற்கனவே ஸ்திரமற்றுள்ள இலங்கை பொருளாதாரத்திற்கு பெரும் பாதிப்பை ஏற்படுத்தக் கூடும் என எதிர்வுகூறப்பட்டுள்ளது.
உக்ரேனில் ரஷ்யாவின் இராணுவ நடவடிக்கையானது இலங்கையின் சுற்றுலாத் துறையையும் தேயிலை ஏற்றுமதியையும் எண்ணெய் கொள்வனவையும் பாதிக்கும் என எதிர்பார்க்கப்படுகிறது.
அண்மைக் காலத்தில் ரஷ்யா மற்றும் உக்ரைனில் இருந்து இலங்கைக்கு அதிகளவான சுற்றுலாப் பயணிகள் வருகை தந்துள்ளதாக வெளிவிவகார செயலாளர் அட்மிரல் ஜயநாத் கொலம்பகே தெரிவித்துள்ளார்.
உக்ரேனில் ஏற்பட்டுள்ள நெருக்கடியின் விளைவாக அந்த நாடுகளில் இருந்து வருபவர்கள் பாதிக்கப்படுவார்கள் என்று இலங்கை எதிர்பார்ப்பதாக அவர் கூறினார்.
“இது எங்களுக்கு பெரும் தாக்கத்தை ஏற்படுத்தும்” என்று வெளியுறவு செயலாளர் நேற்று முன்தினம் ஒரு மெய்நிகர் ஊடக சந்திப்பில் கூறினார்.
உக்ரேனில் ஏற்பட்டுள்ள நெருக்கடியின் விளைவாக இலங்கை தனது தேயிலையை விற்பனை செய்வதிலும் சிரமம் ஏற்படும் என்றும் கொலம்பகே கூறினார்.
இலங்கை தேயிலை ஏற்றுமதி செய்யும் நாடுகளில் ரஷ்யாவும் உக்ரைனும் முக்கியமானவை.
இலங்கைக்கு இறக்குமதி செய்யப்படும் எண்ணெய் மற்றும் எரிவாயுக்களுக்கு அதிக விலை கொடுக்க வேண்டிய கட்டாயம் இலங்கைக்கு ஏற்படும் என்றும் அவர் கூறினார்.
உக்ரேனின் நிலைமையின் விளைவாக உலக எண்ணெய் விலை ஏற்கனவே உயர்ந்துள்ளது. அத்துடன் இறக்குமதிக்காக இலங்கைக்கு அதிக டொலர்கள் தேவைப்படும்.
“நாம் மீண்டும் ஒரு நெருக்கடியான சூழ்நிலையை எதிர்கொள்ள வேண்டியிருக்கும்,” என்று வெளியுறவு செயலாளர் கூறினார்.
இதேவேளை, முன்னாள் வெளிவிவகார அமைச்சர் ரோஹித போகொல்லாகம, ஐரோப்பிய ஒன்றியத்தினால் ரஷ்யா மீது விதிக்கப்பட்டுள்ள தடைகள் மற்றும் ஏனைய பிரதான வர்த்தக நாடுகளால் முன்மொழியப்பட்டுள்ள தடைகள், ரஷ்யாவுடனான இலங்கையின் வர்த்தக உறவுகளையும் பாதிக்கலாம் என தெரிவித்துள்ளார்.
ரஷ்யா மீது ஐரோப்பிய ஒன்றியம் அல்லது அமெரிக்கா விதிக்கும் எந்தவொரு தடைகளுக்கும் இலங்கை இணங்க நிர்ப்பந்திக்கப்படும் என போகொல்லாகம டெய்லி மிரருக்கு தெரிவித்தார்.
ரஷ்யா இலங்கையின் முக்கிய வர்த்தக பங்காளியாக இருப்பதால் அது இலங்கையின் பொருளாதாரத்தை பாதிக்கும் என்றார்.
