டென்னிஸ் நட்சத்திரம் நோவக் ஜோகோவிச் அவுஸ்திரேலியாவில் தங்குவதற்கான தனது கடைசி முயற்சியில் தோல்வியடைந்துள்ளார். அவரது இரண்டாவது முறையீட்டை நீதிமன்றம் நிராகரித்ததையடுத்து, அவர் நாடு கடத்தப்பட உள்ளார்.
தடுப்பூசி செலுத்திக் கொள்ளாத நோவக் ஜோகோவிச்சின் விசாவை ரத்து செய்யும் அரசின் முடிவை ஃபெடரல் நீதிமன்றம் உறுதி செய்தது.
34 வயதான அவர் பொது சுகாதாரத்திற்கு அச்சுறுத்தலாக இருப்பதாக அரசாங்கம் வாதிட்டது.
மெல்போர்னில் நடக்கும் அவுஸ்திரேலிய ஓபன் பட்டத்தை வென்று, உலகின் அதிக பட்டம் வென்ற வீரர் என்ற சாதனையை படைக்கும் ஜோகோவிச்சின் கனவு தகர்ந்துள்ளது. நாளை திங்கட்கிழமை அவர் தனது முதல் போட்டியில் விளையாடவிருந்தார்.
மூன்று நீதிபதிகள் கொண்ட குழுவின் முன் ஞாயிற்றுக்கிழமை நீதிமன்ற விசாரணையின் போது, விசாவை ரத்து செய்வதற்கான குடிவரவு அமைச்சர் அலெக்ஸ் ஹாக் வெள்ளிக்கிழமை எடுத்த முடிவு “தர்க்கமற்றது, பகுத்தறிவற்றது மற்றும் நியாயமற்றது” என்று ஜோகோவிச்சின் வழக்கறிஞர்கள் வாதிட்டனர்.
ஜோகோவிச் மெல்போர்னில் உள்ள குடிவரவு தடுப்பு விடுதியில் தங்கியுள்ளார், ஜனவரி 6 ஆம் திகதி அவர் அவுஸ்திரேலியா வந்ததைத் தொடர்ந்து அவரது விசா முதன்முதலில் ரத்து செய்யப்பட்ட பிறகு அவர் அழைத்துச் செல்லப்பட்ட அதே இடத்தில்தான் அவர் தங்கியுள்ளார்.
ஜோகோவிச் வெளியிட்டுள்ள அறிக்கையில், “நீதிமன்றத் தீர்ப்பில் மிகுந்த ஏமாற்றம் அடைகிறேன்” என்று கூறினார்.
ஆனால் அவர் அதை மதித்து “சம்பந்தப்பட்ட அதிகாரிகளுடன் ஒத்துழைப்பதாக” உறுதியளித்தார்.
“கடந்த வாரங்களின் கவனம் என் மீது இருப்பது எனக்கு சங்கடமாக உள்ளது, மேலும் நான் விரும்பும் விளையாட்டு மற்றும் போட்டியில் நாம் அனைவரும் இப்போது கவனம் செலுத்த முடியும் என்று நம்புகிறேன். வீரர்கள், போட்டி அதிகாரிகள், ஊழியர்கள், தன்னார்வத் தொண்டர்கள் மற்றும் ரசிகர்கள் அனைவருக்கும் நான் வாழ்த்துக்களைத் தெரிவிக்க விரும்புகிறேன்” என்று அவர் மேலும் கூறினார்.
