வவுனியா பூந்தோட்டம் சந்தியில் வீதிகளில் பயணிப்போரை வழி மறித்து சுகாதார பிரிவினரால் பிசீஆர் பரிசோதனை முன்னெடுக்கப்பட்டது.
வவுனியா மாவட்டத்தில் ஒரே நாளில் இராணுவத்தினர் மற்றும் வைத்தியர்கள் உட்பட 76 பேருக்கு கோவிட் தொற்று உறுதி செய்யப்பட்டுள்ளதுடன், கடந்த இரண்டு தினங்களில் மாத்திரம் நாட்டில் 229 கோவிட் மரணங்கள் பதிவாகியுள்ளது.
வவுனியா மாவட்டத்தில் கோவிட் தொற்றாளர்களை இணங்கண்டு மாவட்டத்தில் கோவிட் தொற்றை கட்டுப்படுத்தும் செயற்பாட்டில் சுகாதார பிரிவினர் ஈடுபட்டு வருகின்றனர். இந்நிலையில் வவுனியா பூந்தோட்டம் சந்தியில் இன்று (11) காலை எழுமாற்றாக பிசீஆர் பரிசோதனை மேற்கொள்ளப்பட்டது.
வீதியில் அத்தியாவசிய தேவையின்றி பயணிப்போர், சீரான முறையில் முகக்கவசம் அணியாதவர்கள், சுகாதார முறைகளை பின்பற்றாதவர்கள், பேரூந்தில் சமூக இடைவெளியின்றி பயணித்தோர் என 200 க்கு மேற்பட்டவர்களை சுகாதார பிரிவினர் வழிமறித்து பிசீஆர் பரிசோதனை முன்னெடுத்திருந்தனர்.
அவர்களது பிசீஆர் முடிவுகளையடுத்து அடுத்த கட்ட நடவடிக்கை எடுக்கப்படும் என சுகாதார பிரிவினர் தெரிவித்துள்ளனர்.
