பாகிஸ்தானில் ஒரு மைனர் கிறிஸ்தவ சிறுமி இஸ்லாமிற்கு மாற மறுத்ததால் பாலியல் பலாத்காரம் செய்யப்பட்டதாக பாகிஸ்தான் நெட்டிசன்கள் விமர்சித்துள்ளதோடு, #JusticeforSunitaMasih என்ற ஹேஷ்டேக்குடன் கடந்த இரண்டு நாட்களாக ட்விட்டரில் காரசாரமாக விவாதித்து வருகின்றனர்.
பிரபலங்கள் மற்றும் சிவில் சமூக உறுப்பினர்கள் உட்பட பல முக்கிய நபர்கள் இந்த சம்பவம் குறித்து ட்வீட் செய்ததோடு, பிரதமர் இம்ரான் கானை இதை கவனத்தில் கொண்டு, நீதி வழங்கப்படுவதை உறுதி செய்யுமாறு அழைப்பு விடுத்துள்ளனர்.
எனினும், பைசலாபாத் மற்றும் சுக்கூரில் உள்ள போலீஸ் அதிகாரிகள் நேற்று மைனர் கிறிஸ்தவ சிறுமியை பாலியல் பலாத்காரம் செய்ததாகவும், சித்திரவதை செய்ததாகவும் கூறப்படும் செய்திகளை மறுத்தனர்.
ட்விட்டர் அனலிட்டிக்ஸ் கருவியான சோஷியல் பியரிங்.காமைப் பயன்படுத்தி போக்கு குறித்த பகுப்பாய்வு, ஹேஷ்டேக் ஆரம்பத்தில் மே 24 அன்று மாலை 5 மணியளவில் ட்வீட் செய்யப்பட்டது என்பதைக் காட்டுகிறது. எனினும் அடுத்த நாள் தான் இது ட்ரெண்ட் ஆக ஆரம்பித்தது. பின்னர் ஹேஷ்டேக் பயனர்களால் நூற்றுக்கணக்கான முறை ட்வீட் செய்யப்பட்டுள்ளது. அவர்களில் பெரும்பாலோர் பாகிஸ்தானைச் சேர்ந்தவர்களே.
சிறுமியின் சோதனையைப் பற்றி ட்வீட் செய்தவர்களில் பிரபல பாகிஸ்தான் நடிகை அர்மீனா ராணா கான் என்பவரும் ஒருவர். பைசலாபாத்தைச் சேர்ந்த 14 வயது சிறுமி பாலியல் பலாத்காரம் செய்யப்பட்டதாகவும், பின்னர் கலிமாவை ஓதும்படி வற்புறுத்தியதாக அர்மீனா ராணா கான் தனது ட்வீட்டில் குற்றம் சாட்டியுள்ளார். மைனர் பெண் அவ்வாறு செய்ய மறுத்தபோது, சிறுமியின் தலை மொட்டையடிக்கப்பட்டதாக அவர் கூறினார்.
டிஜிட்டல் ஊடகங்களுக்கான பஞ்சாப் முதல்வரின் மைய நபரான அசார் மஷ்வானியின் கவனத்திற்கு இந்த சம்பவம் கொண்டு வரப்பட்டபோது, அது பைசலாபாத்திற்கு பதிலாக சிந்துவின் ஷிகார்பூரில் நடந்தது என்று கூறினார்.
இருப்பினும், பைசலாபாத் மற்றும் ஷிகார்பூர் ஆகிய இரு பகுதிகளிலிருந்தும் போலீஸ் அதிகாரிகள் இதுபோன்ற எந்த சம்பவமும் இரு நகரங்களிலும் நடக்கவில்லை என்று மறுத்துள்ளனர்.
பைசலாபாத்தில் ஒரு சிறுமி பாலியல் பலாத்காரம் செய்யப்பட்டு இஸ்லாமிற்கு மாற நிர்பந்திக்கப்பட்டிருப்பது ஒரு தவறான செய்தி என்று பைசலாபாத் நகர காவல்துறை அதிகாரி (சிபிஓ) முகமது சோஹைல் சவுத்ரி கூறினார்.
“இது சரிபார்க்கப்பட்டது மற்றும் உண்மைக்கு முரணானவை என்றும், இந்த சம்பவம் சுக்கூர் மாவட்டத்துடன் தொடர்புடையது என்றும் கண்டறியப்பட்டது..” என்று அவர் ஒரு அறிக்கையில் கூறினார், எஸ்எஸ்பி சுக்கூர் இர்பான் சமூவும் அதை உறுதிப்படுத்தியுள்ளார்.
இருப்பினும், சுக்கூர் துணை இன்ஸ்பெக்டர் ஜெனரல் (டி.ஐ.ஜி) ஃபிடா உசேன் ஒரு கிறிஸ்தவ சிறுமியை யாரும் கிரிமினல் தாக்குதலுக்கு உட்படுத்தவில்லை என்று திட்டவட்டமாக மறுத்தார்.
‘இது அநேகமாக பைசலாபாத்தில் நடந்தது, சுக்கூர் அல்ல.’ என்று அவர் கூறினார். கூறப்படும் சம்பவம் தொடர்பாக இதுவரை யாரும் புகார் அளிக்க முன்வராமல் இருத்திருக்கலாம் எனக் கூறிய அவர் மேலும், ‘சில புகார்கள் பதிவு செய்யப்பட்டால் அல்லது சில ஆதாரங்கள் எங்களுக்கு முன் முன்வைக்கப்பட்டால் நாங்கள் தொடர தயாராக உள்ளோம்.
பெண் அல்லது சிறுமியின் மதத்தைப் பொருட்படுத்தாமல் யாராவது இதுபோன்ற குற்றம் செய்திருந்தால் நடவடிக்கை எடுக்க சுக்கூர் போலீசார் தயாராக உள்ளனர்.” எனக் கூறினார். இதற்கிடையில், இந்த சம்பவத்தின் நம்பகத்தன்மை குறித்து சமூக ஆர்வலரும் வழக்கறிஞருமான ஜிப்ரான் நசீர் இப்போது கேள்விகளை எழுப்பியுள்ளார்.
“செய்திகளைப் பகிர்வதற்கு முன்பு அதைச் சரிபார்க்க நான் மக்களுக்கு அறிவுறுத்துகிறேன். கிறிஸ்தவ மற்றும் இந்து சிறுமிகள் மீதான அட்டூழியங்கள் ஒரு உண்மை என்றாலும், தவறான நோக்கங்களுக்காக போலிச் செய்திகளை பரப்புபவர்களும் உள்ளனர்.” என்று அவர் ட்வீட் செய்துள்ளார்.
