கொரோனா தொற்றுநோயின் பேரழிவு இரண்டாவது அலையுடன் இந்தியாவின் இடைவிடாத போருக்கு மத்தியில், கொரோனா வைரஸ் தொற்றுக்கு ஒரே நேரத்தில் பல குழந்தைகள் ஆளாகியுள்ளது ராஜஸ்தானில் பரபரப்பை ஏற்படுத்தியுள்ளது.
கடந்த சில நாட்களில் ராஜஸ்தானின் துங்கர்பூரில் கொரோனா வைரஸ் தொற்றுக்கு 325 குழந்தைகள் பாதிக்கப்பட்டுள்ளனர். இதேபோன்ற நிலை மாநிலத்தின் தவுசா மாவட்டத்திலும் காணப்படுகிறது. கொரோனா வைரஸுக்கு நேர்மறை சோதனை செய்த அனைத்து குழந்தைகளும், 19 வயதிற்குட்பட்டவர்கள் ஆவர்.
இதுவரை, ராஜஸ்தானின் இரு மாவட்டங்களிலிருந்தும் 600’க்கும் மேற்பட்ட குழந்தைகள் கொரோனா தொற்றுக்கு ஆளாகியுள்ளனர். இதனால் ராஜஸ்தானில் மூன்றாவது அலை தொடங்கிவிட்டதா என மக்கள் பீதியில் ஆழ்ந்துள்ளனர்.
நாட்டின் உச்ச குழந்தைகள் உரிமை அமைப்பான தேசிய குழந்தைகள் உரிமைகள் ஆணையம் (என்.சி.பி.சி.ஆர்) கடந்த வியாழக்கிழமை, மூன்றாவது கொரோனா அலை நாட்டைத் தாக்கும் என்று கணிக்கப்பட்டுள்ளதால், குழந்தைகள் மற்றும் பிறந்த குழந்தைகளைப் பாதுகாப்பதற்கான மருத்துவ வசதிகளை அதிகரிக்க வேண்டும் என மத்திய மற்றும் மாநில அரசுகளைக் கேட்டுக்கொண்டது.
மத்திய சுகாதார செயலாளர் ராஜேஷ் பூஷனுக்கு எழுதிய கடிதத்தில், என்.சி.பி.சி.ஆர் தலைவர் பிரியங்க் கனூங்கோ, கொரோனா தொற்றுநோயின் இரண்டாவது அலை சற்று அதிக எண்ணிக்கையிலான இளைஞர்களை பாதிக்கிறது என்றும் மூன்றாவது அலை நாட்டைத் தாக்கும்போது, இது குழந்தைகளை அதிகம் பாதிக்கும் என்றும் கணிக்கப்பட்டுள்ளதாகத் தெரிவித்துள்ளார்.
தேசிய அவசர போக்குவரத்து சேவையை (நெட்ஸ்) மறுசீரமைப்பதற்கான அவசரத் தேவையை அடிக்கோடிட்டுக் காட்டிய கனூங்கோ, சுகாதார அமைச்சகங்களுக்கு தேவையான வழிமுறைகளை வழங்குமாறு கேட்டுக்கொண்டார்.
இதற்கிடையில், ராஜஸ்தான் அரசு நேற்று கொரோனா வைரஸ் ஊரடங்கை ஜூன் 8 வரை 15 நாட்கள் நீட்டித்தது. கொரோனா நிலைமை கணிசமாக மேம்படும் மாவட்டங்களில் ஜூன் 1 முதல் வணிக நடவடிக்கைகளில் சில தளர்வுகளை அரசு அனுமதிக்கக்கூடும் என்று அரசு வெளியிட்டுள்ள அறிக்கையில் தெரிவிக்கப்பட்டுள்ளது.
இதற்கிடையே, மகாராஷ்டிராவில் உள்ள உத்தவ் தாக்கரே அரசாங்கம் சுகாதார அதிகாரிகளை எச்சரிக்கையாக இருக்குமாறு அறிவுறுத்தியுள்ளதுடன், குழந்தைகள் ஏதேனும் அறிகுறிகளைக் காட்டினால் உடனடியாக மருத்துவர்களை அணுகுமாறு மக்களிடம் வேண்டுகோள் விடுத்துள்ளது.
கிட்டத்தட்ட 6,300’க்கும் மேற்பட்ட குழந்தை மருத்துவர்களிடையே உரையாற்றிய முதல்வர் உத்தவ் தாக்கரே, உடனடி நோயறிதல் காலத்தின் தேவை என்று கூறினார். குழந்தைகளிடையே கொரோனா வைரஸ் நோய்த்தொற்றின் லேசான, நடுத்தர மற்றும் கடுமையான அறிகுறிகளை எவ்வாறு கண்டறிவது என்பது குறித்து குழந்தை மருத்துவர்களுக்கு அறிவுறுத்தப்பட்டதாக மகாராஷ்டிரா முதலமைச்சர் அலுவலகம் பின்னர் ஒரு அறிக்கையில் தெரிவித்துள்ளது.
