அதிகரித்து வரும் புவிசார் அரசியல் பதட்டங்கள் மற்றும் அணுசக்தி பேரழிவு பற்றிய அச்சங்களுக்கு மத்தியில், ரஷ்ய ஜனாதிபதி விளாடிமிர் புடினும், பிரெஞ்சு ஜனாதிபதி இம்மானுவேல் மக்ரோனும் வெள்ளிக்கிழமை (19) நிகழ்த்திய தொலைபேசி உரையாடலை தொடர்ந்ர், தென்கிழக்கு உக்ரேனில் ரஷ்யாவின் கட்டுப்பாட்டின் கீழுள்ள ஜபோரிஜியா(Zaporizhzhia) அணுமின் நிலையத்தை சுயாதீன ஆய்வுக்குட்படுத்த அழைப்பு விடுத்தனர்.
இது தொடர்பில் ரஷ்யா வெளியிட்ட அறிக்கையில், “ஜபோரிஜியா அணுமின் நிலையத்தின் பிரதேசத்தின் மீது உக்ரைனிய இராணுவத்தின் முறையான ஷெல் தாக்குதல்கள் ஒரு பெரிய அளவிலான பேரழிவின் அபாயத்தை உருவாக்குகிறது, இது பரந்த பிரதேசங்களில் கதிர்வீச்சு மாசுபாட்டிற்கு வழிவகுக்கும்” என்று புடின் வலியுறுத்தினார் என குறிப்பிட்டுள்ளது.
அந்த அறிக்கையில்,
இரு தலைவர்களும் சர்வதேச அணுசக்தி முகமையின் (IAEA) நிபுணர்கள் ஆலையை “முடிந்தவரை விரைவில்” ஆய்வு செய்து, “களத்தில் உள்ள உண்மையான நிலைமையை மதிப்பீடு செய்ய” அழைப்பு விடுத்தனர்.
அணுசக்தி முகமையின் ஆய்வாளர்களுக்கு தேவையான உதவிகளை வழங்குவதற்கு ரஷ்ய தரப்பு தயாராக இருப்பதை உறுதிப்படுத்தியது.” என தெரிவித்துள்ளது.
இதற்கிடையில், பிரான்ஸ் வெளியிட்ட ஒரு தனி அறிக்கையில், அணுமின் நிலையத்தின் பாதுகாப்பு அபாயங்கள் குறித்து மக்ரோன் அக்கறை கொண்டுள்ளதாகவும், உக்ரைன் மற்றும் ஐக்கிய நாடுகள் சபையால் ஒப்புக் கொள்ளப்பட்ட நிபந்தனைகளின் கீழ் IAEA வில் இருந்து நிபுணர்களின் பணியை தளத்திற்கு அனுப்புவதை ஆதரிப்பதாகவும் கூறினார்.
பெப்ரவரி 24 அன்று ரஷ்யா உக்ரைனை ஆக்கிரமித்ததிலிருந்து, மக்ரோன் புட்டினுடன் சில தொலைபேசி உரையாடல்களை நடத்தியுள்ளார். உக்ரைன் மீது படையெடுப்பதற்கு அவர் முடிவு செய்த போதிலும், ரஷ்ய ஜனாதிபதியுடன் இராஜதந்திர பேச்சுவார்த்தைகளை தொடர்ந்ததற்காக அவர் விமர்சனங்களை எதிர்கொண்டார்.
போர் நடவடிக்கைக்கு உட்பட்ட உக்ரைனில் உள்ள ஜபோரிஜியா அணுமின் நிலையத்தை பாதிக்கும் கடுமையான பாதுகாப்பு அபாயத்தை கருத்தில் கொண்டு, புட்டினுக்கான மக்ரோனின் தொலைபேசி அழைப்பு நியாயமானது என்று பிரெஞ்சு ஜனாதிபதி அலுவலகத்தில் உள்ள அதிகாரி ஒருவர் வெள்ளிக்கிழமை செய்தியாளர்களிடம் கூறினார்.
ஐக்கிய நாடுகள் சபையின் தலைவர் அன்டோனியோ குட்டெரெஸ் வெள்ளிக்கிழமை (19) ரஷ்ய ஆக்கிரமிப்பில் உள்ள ஜபோரிஜியா அணுமின் நிலையத்தை உக்ரைனின் மின் கட்டமைப்பிலிருந்து துண்டிக்க வேண்டாம் என்று கேட்டுக் கொண்டார்.
தெற்கு உக்ரைனில் உள்ள ஒடெசா துறைமுகத்திற்கு தனது முக்கியமான விஜயத்தின் போது, ஐ.நா. பொதுச்செயலாளர், “வெளிப்படையாக, ஜபோரிஜியாவிலிருந்து வரும் மின்சாரம் உக்ரேனிய மின்சாரம்… இந்தக் கொள்கை முழுமையாக மதிக்கப்பட வேண்டும்.” என தெரிவித்தார்.
மக்ரோனுடனான பேச்சின் போது, தனது உணவுப் பொருட்கள் மற்றும் உரங்களை ஏற்றுமதி செய்வதில் தடைகளை எதிர்கொள்கிறது என்றும் புடின் தெரிவித்துள்ளார். “உலகளாவிய உணவுப் பாதுகாப்பை உறுதி செய்வது தொடர்பான பிரச்சனைகளைத் தீர்ப்பதில் பங்களிக்காத, குறிப்பிடப்பட்ட ரஷ்ய ஏற்றுமதிகளுக்கு இன்னும் தடைகள் உள்ளன” என்று கிரெம்ளின் கூறியது.
கடந்த மாதம் ரஷ்யா, உக்ரைன், துருக்கி மற்றும் ஐக்கிய நாடுகள் சபையுடன் முக்கிய ஒப்பந்தங்களில் கையெழுத்திட்ட பின்னர், உக்ரைனின் கருங்கடல் துறைமுகங்களை விட்டு வெளியேற தானிய ஏற்றுமதிக்கான பாதுகாப்பான தாழ்வாரங்களைத் திறந்தது.
உக்ரேனில் மாஸ்கோவின் இராணுவத் தலையீட்டின் மீது மேற்கத்திய பொருளாதாரத் தடைகளை மீறி ரஷ்யா தனது விவசாயப் பொருட்கள் மற்றும் உரங்களை ஏற்றுமதி செய்ய அனுமதித்தது.
