தனது இளம் மனைவியின் தலையை வெட்டிக் கொன்றுவிட்டு, வெட்டப்பட்ட தலையை கையில் எடுத்துக் கொண்டு, புன்னகையுடன் வீதியில் வலம் வந்த கணவனின் அதிர்ச்சி வீடியோ பரவி வருகிறது.
ஈரானின் தென்மேற்கு மாகாணமான குசெஸ்தானின் அஹ்வாஸ் நகரில் இந்த கொடூரம் அரங்கேறியது.
மனைவியை கொன்று, ஒரு கையில் தலையுடனும், மறு கையில் கத்தியுடனும் அந்த கொடூர கணவன் வீதி வலம் வந்தார். .
மோனா ஹெய்டாரி என்ற 17 வயதுடைய பெண்ணே கொல்லப்பட்டார். அவருக்கு மூன்று வயதில் மகன் உள்ளார்.
கொல்லப்பட்ட பெண் தனது சொந்த உறவினரான சஜ்ஜாத்தை 12 வயதில் திருமணம் செய்து கொள்ள வேண்டிய கட்டாயம் ஏற்பட்டதாக பெண்கள் உரிமை அமைப்புக்கள் தெரிவித்துள்ளன.
மோனா குடும்ப வன்முறையால் அவதிப்பட்டதாகக் கூறப்படுகிறது. கணவனினால் கொடூரமாக தாக்கப்பட்டு, அடிமை போல நடத்தப்பட்டுள்ளார்.
கொடுமை சகிக்க முடியாமல் ஒவ்வொரு முறையும் அவர் விவாகரத்து செய்ய விரும்புவதாகக் குறிப்பிடும்போது, குழந்தைக்காக வீட்டிலேயே இருக்குமாறு அவரது குடும்பத்தினர் அழுத்தம் கொடுத்தனர்.
மோனா தனது கணவனின் வன்முறையிலிருந்து தப்பிக்கும் முயற்சியில் ஒரு கட்டத்தில் துருக்கிக்குத் தப்பிச் சென்றதாகக் கூறப்படுகிறது, ஆனால் ஒரு புதிய நாட்டில் தனியாக வாழ்வது கடினமாக இருந்தபோது திரும்பி வந்தார்.
மோனா ஈரானில் சில நாட்கள் இருந்ததாக தகவல்கள் தெரிவிக்கின்றன, அப்போது சஜ்ஜாத் மற்றும் அவரது சகோதரரும் சேர்ந்து அவரது கைகளையும் கால்களையும் கட்டி தலை துண்டித்ததாக கூறப்படுகிறது.
மோனாவின் சடலத்தை கொடூர சகோதரர்கள், ஒரு போர்வையால் சுற்றி வீசியெறிந்துள்ளனர். பின்னர், வெட்டிய கத்தியுடனும், தலையுடனும் கணவன் வீதியில் அணிவகுத்து சென்றார்.
மாநில பாதுகாப்புப் படையின் (SSF) தலைவர், கொலைக்கான நோக்கம் “குடும்ப வேறுபாடுகள்” என்று கூறினார்.
கொலை செய்யப்பட்டதாகக் கூறப்படும் சந்தேக நபரும் அவரது சகோதரரும் கைது செய்யப்பட்டதாகக் கூறப்படுகிறது.
அந்த நபரின் வைரல் வீடியோவைப் பகிர்ந்த பிறகு, “உளவியல் ரீதியாக சமூகத்தை தொந்தரவு செய்தது” என்று கூறி, ரோக்னா என்ற செய்தி வலைத்தளத்தை அதிகாரிகள் மூடியுள்ளனர்,
ஈரானின் சில பகுதிகளில் கவுரவக் கொலைகள் பரவலாக உள்ளன, பெரும்பாலும் சமூக நம்பிக்கைகள் மற்றும் இஸ்லாமிய குடியரசின் தளர்வான சட்டங்கள் மற்றும் இதனை ஊக்குவிக்கும் லேசான தண்டனைகள் காரணமாக கவுரவக் கொலைகள் தொடர்கின்றன.
ஈரானிய அரசியலமைப்பின் 630வது பிரிவு, விபச்சாரத்தில் ஈடுபட்ட மனைவியை கொன்றால் கணவனை தண்டனையிலிருந்து விலக்கு அளிக்கிறது.
ஈரானிலுள்ள உள்ள ஒரு மகளிர் உரிமை அரசு சாரா அமைப்பின் கூற்றுப்படி, கடந்த இரண்டு ஆண்டுகளில் 10 அல்லது 15 வயதுடைய சிலர் உட்பட சுமார் 60 பெண்கள் கவுரவக் கொலைகளுக்கு பலியாகி உள்ளனர். பெரும்பாலான குடும்பங்கள் வழக்குத் தாக்கல் செய்யாததால் குற்றவாளிகள் யாரும் நீதியின் முன் நிறுத்தப்படவில்லை.
மருத்துவ இதழான லான்செட் ஒக்டோபர் 2020 இல் ஒரு கட்டுரையை வெளியிட்டது. அதில், 2010 மற்றும் 2014 க்கு இடையில் ஈரானில் குறைந்தது 8,000 கவுரவக் கொலைகள் நடந்துள்ளன, ஆனால் சில மட்டுமே பதிவாகியுள்ளன என குறிப்பிட்டுள்ளது.
ஷரியா சட்டத்தின்படி, “இரத்த உரிமையாளர்கள்” (உடனடி குடும்ப உறுப்பினர்கள்) மட்டுமே தங்கள் அன்புக்குரியவரைக் கொலை செய்ததற்காக மரணதண்டனை கோர அனுமதிக்கப்படுகிறார்கள், எனவே குடும்பங்கள் மற்றொரு குடும்ப உறுப்பினருக்கு கடுமையான தண்டனையைக் கோராததால் பெரும்பாலான கவுரவக் கொலைகள் தண்டிக்கப்படுவதில்லை.
