ஆப்கானிஸ்தானில் கடந்த 24 மணி நேரத்தில் ஆறு மாகாண தலைநகரங்கள் தலிபான்களின் கட்டுப்பாட்டில் சென்றுள்ளது. தலிபான்கள் வசம் இப்போது 18 மாகாண தலைநகரங்கள் வீழ்ச்சியடைந்துள்ளன.
ஹெராட், சபுல், ஹெல்மண்ட் மற்றும் கந்தஹார் போன்ற பெரிய நகரங்கள் தலிபான்களிடம் நேற்று முன்தினம் வீழ்ந்தன. இதை நம்ப முடியாமலுள்ளதாக அந்த நகர மக்கள் கூறுகின்றனர். நாட்டிலுள்ள 34 மாகாணதலைநகரங்களில் பாதிக்கு மேல் இப்பொழுது தலிபான்களின் பிடியில் சென்றுள்ளது.
“அரசாங்கம் உண்மையில் எங்களை விற்றுவிட்டனர். எந்த இடத்திலும் தலிபான்களிற்கு எதிர்ப்பு இருக்கவில்லை” என்று கந்தஹாரில் வசிக்கும் பெண் ஒருவர் வியாழக்கிழமை மாலை கூறினார்.
“கந்தஹார் இலகுவாக கைப்பற்றப்படும் என்று நான் கற்பனை கூட செய்யவில்லை,” என்று அவர் கூறினார்.
ஹெல்மண்டின் தலைநகரான லஷ்கர்கா நகரில் உள்ள பாதுகாப்பு அதிகாரிகள், தலிபான்களுடனான உடன்பாட்டைத் தொடர்ந்து நகருக்கு அருகிலுள்ள ஷோரபக்கில் உள்ள ஆப்கானிஸ்தான் இராணுவத்தின் பிறிதொரு முகாமிற்கு இடமாற்றம் செய்யப்பட்டதாக அதிகாரிகள் தெரிவித்தனர்.
இதேபோன்ற இடமாற்றம் கந்தஹார் நகரத்திலும் பதிவாகியுள்ளது. அனைத்து பாதுகாப்பு பணியாளர்களும் 215 மைவாண்ட் இராணுவ முகாமிற்கு இடமாற்றம் செய்யப்பட்டனர்.
மூன்று மாகாணங்களைச் சேர்ந்த அதிகாரிகள் கிட்டத்தட்ட 12 மணி நேர இடைவெளியில் மூன்று தலைநகரங்களின் வியத்தகு வீழ்ச்சி குறித்து கருத்து தெரிவிக்கவில்லை.
“லஷ்கர்காவில் ஒரு பெரிய பேரழிவு ஏற்பட்டுள்ளது. பொதுமக்கள் வீடுகளில் குண்டுகள் வீசப்பட்டன. பொதுமக்கள் மத்தியில் உயிரிழப்புகள் ஏற்பட்டன, ”என்று ஹெல்மண்ட் மாகாண சபை உறுப்பினர் மஜித் அகுந்த்ஸடா கூறினார்.
“மாகாணங்கள் வீழ்ச்சியடைகின்றன. இது மிகவும் தெளிவற்றதாக தெரிகிறது. சில மாகாணங்கள் எதிர்ப்பின்றி சரணடைவதை நீங்கள் பார்க்கிறீர்கள், ”என்று பிறிதொரு எம்.பியான ஷோகுஃபா நூர்சாய் தெரிவித்தார்.
எனினும், பாதுகாப்பு நிறுவனங்கள் கருத்து தெரிவிக்க மறுக்கின்றன.
ஹெல்மண்ட் மற்றும் கந்தஹார் அருகே உள்ள உருஸ்கான் மாகாணத்தில், சண்டையின்றி அந்த மாகாணத்தை தலிபான்களிடம் ஒப்படைக்க ஊக்குவிக்க அவருடன் சில பெரியவர்கள் பேச்சுவார்த்தை நடத்தி வருவதாக மாகாண ஆளுநர் ஷிர்சாத் கூறினார்.
“நாங்கள் தலிபான்களுடன் பேச்சுவார்த்தை நடத்தி வருகிறோம். பொது சொத்துக்கள் பாதிக்கப்படக்கூடாது என்றும் பொதுமக்கள் பாதுகாக்கப்பட வேண்டும் என்றும் மக்கள் கோரிக்கை விடுத்துள்ளனர். பிரச்சனை அமைதியாக தீர்க்கப்பட வேண்டும் என்று அவர்கள் விரும்புகிறார்கள், ”என்று ஷிர்சாத் கூறினார்.
தலிபான்கள் இப்போது 18 மாகாண தலைநகரங்களைக் கட்டுப்படுத்துகின்றனர். லோகரின் மையமும் தலிபான்களிடம் எந்த எதிர்ப்பும் இல்லாமல் விழுந்துவிட்டதாக தகவல்கள் உள்ளன, ஆனால் வெள்ளிக்கிழமை மாலை புல்-இ-ஆலம் நகரின் சில பகுதிகளில் சண்டை நடந்து வருவதாக அந்த மாகாண அதிகாரிகள் தெரிவித்தனர்.
