முன்னாள் ஸ்ரீலங்கன் ஏர்லைன்ஸ் நிர்வாக அதிகாரி கபில சந்திரசேனவின் மனைவிக்கு பிணையாளர்களாகச் செயல்பட்ட மூத்த கிரிக்கெட் வீரர் அரவிந்த டி சில்வா மற்றும் அவரது மனைவி பிரியங்கா அனுஷ்கா விஜயநாயக்க ஆகியோரைக் கைது செய்து நீதிமன்றத்தில் ஆஜர்படுத்துமாறு கோட்டை நீதவான் பசன் அமரசேன நேற்று (16) பிடியாணை பிறப்பித்தார். கபில சந்திரசேனவின் மனைவி பிரியங்கா நியோமாலி விஜயநாயக்கவிற்காகப் பிணையாளர்களாகச் செயல்பட்ட இந்தத் தம்பதியினர் நீதிமன்றத்தில் ஆஜராகத் தவறியதாலேயே இந்தப் பிடியாணை பிறப்பிக்கப்பட்டது.
பிணையாளர்களுக்கு அறிவிப்புகளை அனுப்பிய நீதவான், பிணைத் தொகையை அரசுடமையாக்குவதற்கு எதிராக வாதங்களை முன்வைக்க அவர்களுக்கு வாய்ப்பளிக்கும் வகையில், இவ்வழக்கை மீண்டும் 30-ஆம் திகதி விசாரணைக்கு எடுத்துக்கொள்ளுமாறு உத்தரவிட்டார்.
நீதிமன்ற நடவடிக்கைகளைத் தொடர்ந்து தவிர்த்து வரும் பிரியங்கா நியோமாலி விஜயநாயக்கவிற்காக இவர்கள் செலுத்திய பிணை தொகையை ஏன் அரசுடமையாக்கக்கூடாது என்பதற்கான காரணங்களை இறுதிமுறையாகச் சமர்ப்பிப்பதற்காக இவ்வழக்கு நேற்று விசாரணைக்கு எடுத்துக்கொள்ளப்பட்டது. அந்தச் சந்தர்ப்பத்தில் பிணையாளர்கள் நீதிமன்றத்தில் ஆஜராகவில்லை.
அரவிந்த டி சில்வாவைப் பிரதிநிதித்துவப்படுத்தும் சட்டக் குழுவினர், அவரது தாயார் காலமானதாகவும், இன்று (16) அவரது இறுதிச் சடங்குகள் நடைபெறுவதாகவும் நீதிமன்றத்திற்குத் தெரிவித்தனர். இரண்டாவது சந்தேகநபர் சார்பாக, இந்த இரண்டு பிணையாளர்களும் தலா 20 மில்லியன் ரூபா பெறுமதியான தனிப்பட்ட பிணையை முன்னதாக நீதிமன்றத்தில் செலுத்தியிருந்தனர்.
சந்தேகநபர் கபில சந்திரசேனவின் மனைவியான நியோமாலிக்கு எதிராகத் திறந்த பிடியாணை பிறப்பிக்கப்பட்டுள்ளதுடன், அது இன்டர்போல் (Interpol) அமைப்பிற்கும் அறிவிக்கப்பட்டுள்ளது.
இவ்வழக்கில் மூன்றாவது சந்தேகநபராக உள்ள முன்னாள் சபாநாயகர் சமல் ராஜபக்ஷவின் மகன் சமீந்திர ராஜபக்ஷவிற்கும் எதிராக சர்வதேச பிடியாணை பிறப்பிக்கப்பட்டுள்ளது.
ஜே.சி. வெலியமுன அறிக்கையில் சுட்டிக்காட்டப்பட்ட மோசடி மற்றும் ஊழல் குறித்து விசாரணை நடத்துமாறு காவல்துறை மா அதிபரிடம், அரச தொழில்முயற்சி அபிவிருத்தி அமைச்சின் செயலாளர் ரவீந்திர ஹேவவித்தாரன 2018 ஓகஸ்ட் 3 அன்று விடுத்த கோரிக்கையைத் தொடர்ந்து இந்த விசாரணை ஆரம்பிக்கப்பட்டது. ஸ்ரீலங்கன் ஏர்லைன்ஸ் நிறுவனத்திற்கான விமானக் கொள்முதல் தொடர்பான 2 மில்லியன் அமெரிக்க டொலர் பெறுமதியான மோசடி குற்றச்சாட்டின் பேரில், அந்நிறுவனத்தின் முன்னாள் பிரதம நிறைவேற்று அதிகாரி கபில சந்திரசேனவும் அவரது மனைவியும் கைது செய்யப்பட்டனர். பிணையில் விடுவிக்கப்பட்டிருந்த நிலையில் சந்திரசேன தற்கொலை செய்துகொண்டார்; அவரது மனைவி தற்போது அவுஸ்திரேலியாவில் இருப்பதாகத் தெரிவிக்கப்படுகிறது. விமானம் கொள்முதல் நடவடிக்கைகளில் ஈடுபட்ட ரோல்ஸ்- ரோய்ஸ், ஏர்பஸ் மற்றும் அது சார்ந்த பிற நிறுவனங்கள், கணக்கு விவரங்கள், ஆவணங்கள், கையொப்பங்கள் மற்றும் அட்டை தொடர்பான விவரங்கள் உள்ளிட்ட அனைத்து தொடர்புடைய பதிவுகளையும் பாதுகாப்பாக வைத்திருக்க வேண்டும் என்றும், இது தொடர்பான வாக்குமூலங்களை அந்நிறுவனங்களின் அதிகாரிகள் வழங்க வேண்டும் என்றும் நீதிமன்ற உத்தரவுகள் பிறப்பிக்கப்பட்டுள்ளன.
