ஈரான் வான்பரப்பில் ஒரு அமெரிக்கப் போர் விமானம் விழுந்ததாகவும், அதில் இருந்த விமானப் பணியாளர்களில் ஒருவரை அமெரிக்கப் படைகள் மீட்டுள்ளதாகவும், விமானத்தின் சிதைவுகள் குறித்த காணொளிகளை ஈரான் ஊடகங்கள் ஒளிபரப்பியதைத் தொடர்ந்து, முக்கிய அமெரிக்க ஊடகங்கள் வெள்ளிக்கிழமை அன்று செய்தி வெளியிட்டன.
அடையாளம் தெரியாத வட்டாரங்களை மேற்கோள் காட்டி, ஆக்சியோஸ் மற்றும் சிபிஎஸ் நியூஸ் ஆகிய ஊடகங்கள், விமானத்தில் இருந்த இரண்டு பணியாளர்களில் ஒருவர் ஏற்கனவே அமெரிக்க சிறப்புப் படைகளால் மீட்கப்பட்டுவிட்டதாகவும், ஆனால் இரண்டாவது பணியாளரைத் தேடும் பணி தொடர்வதாகவும் செய்தி வெளியிட்டன.
தி நியூயார்க் டைம்ஸ் மற்றும் வால் ஸ்ட்ரீட் ஜர்னல் ஆகியவற்றின்படி, அந்த விமானம் ஒரு F-15E ரகப் போர் விமானமாகும். இதில் ஒரு விமானியும், பின் இருக்கையில் ஒரு ஆயுத-அமைப்பு வீரரும் இருப்பார்கள்.
சில ஈரான் செய்திகளில் கூறப்பட்டதைப் போல F-35 ஸ்டெல்த் போர் விமானம் அல்ல, மாறாக அது ஒரு F-15 ரக விமானம் என்பதை, சிதைவுகளின் புகைப்படங்கள் என ஈரான் ஊடகங்கள் கூறியவற்றின் பகுப்பாய்வு காட்டியதாக சிஎன்என் மேலும் கூறியது.
இந்த நிலைமை குறித்து ஜனாதிபதி டொனால்ட் டிரம்புக்கு விளக்கமளிக்கப்பட்டதாக அமெரிக்க ஊடகங்கள் செய்தி வெளியிட்டன.
இருப்பினும், இதுகுறித்த கருத்துகளுக்கு வெள்ளை மாளிகை அல்லது பென்டகனிடமிருந்து உடனடியாக அதிகாரப்பூர்வமான பதில் எதுவும் வரவில்லை.
ஈரானுடனான மோதலை முடிவுக்குக் கொண்டுவருவது தொடர்பான பேச்சுவார்த்தைகளை அமெரிக்க விமானம் சுட்டு வீழ்த்தப்பட்ட சம்பவம் பாதிக்காது என்று வெள்ளிக்கிழமை பிற்பகுதியில் என்பிசி நியூஸ் செய்தி நிறுவனத்திடம் டிரம்ப் கூறினார்.
டிரம்ப் போருக்கு உத்தரவிட்ட பிறகு ஈரானுக்குள் ஒரு விமானம் இழந்ததாக அறியப்பட்ட இந்த நிகழ்வைத் தொடர்ந்து, அமெரிக்காவின் சிறப்புப் படைகளால் தேடுதல் மற்றும் மீட்பு நடவடிக்கை மேற்கொள்ளப்பட்டு வருவதாக அமெரிக்க ஊடகங்கள் செய்தி வெளியிட்டன.
சமூக ஊடகங்களிலும் ஈரானிய செய்தி நிறுவனங்களிலும் பரவி வரும் புகைப்படங்கள் மற்றும் காணொளிகளை மேற்கோள் காட்டி, சுட்டு வீழ்த்தப்பட்ட போர் விமானம் இருந்ததாகக் கருதப்படும் இடத்தின் மீது அமெரிக்க ஹெலிகொப்டர்களும் பிற விமானங்களும் தாழ்வான உயரத்தில் பறப்பதாக முக்கிய அமெரிக்க ஊடகங்கள் தெரிவித்தன.
