2024 ஆம் ஆண்டு உயர்தரப் பரீட்சைகளில் ஆண் பரீட்சார்த்திகளை விட பெண் பரீட்சார்த்திகள் அதிக சதவீதத்தினர் பல்கலைக்கழக அனுமதிக்கு தகுதி பெற்றுள்ளதாக பரீட்சைகள் ஆணையாளர் நாயகம் அமித் ஜெயசுந்தர தெரிவித்துள்ளார்.
பரீட்சை எழுதிய அனைத்து பரீட்சார்த்திகளிலும் 64.73% பேர் பல்கலைக்கழக நுழைவுத் தகுதிகளைப் பெற்றுள்ளதாக அவர் தெரிவித்தார்.
பெண் பரீட்சார்த்திகளில், 71.93% பேர் பல்கலைக்கழக அனுமதிக்குத் தகுதி பெற்றுள்ளனர், அதே நேரத்தில் ஆண் பரீட்சார்த்திகளில் 60.24% பேர் பல்கலைக்கழகத் தகுதியைப் பெற்றுள்ளனர்.
மூன்று பாடங்களிலும் தோல்வியடைந்த மாணவர்களின் சதவீதத்திலும் இதேபோன்ற போக்கு காணப்படுவதாகவும், ஆண் பரீட்சார்த்திகளில் 13.87% பேரும், பெண் பரீட்சார்த்திகளில் 8.6% பேரும் மூன்று பாடங்களிலும் தோல்வியடைந்துள்ளதாகவும் அவர் மேலும் எடுத்துரைத்தார்.
இதேவேளை, இம்முறை உயர்தரப் பரீட்சைப் பெறுபேறுகளின் அடிப்படையில் பல்கலைக்கழக அனுமதிக்கு விண்ணப்பிக்க தகுதி பெற்றுள்ளவர்களின் எண்ணிக்கை படிப்படியாக அதிகரித்துள்ளதாகவும் தெரிவித்துள்ளார்.
இந்த வருடம் குறித்த எண்ணிக்கை 64.73% ஆக பதிவாகியுள்ளதாகக் குறிப்பிட்டார்.
இந்த பரீட்சையில் மொத்தமாக 274,361 பரீட்சாத்திகள் தோற்றியதுடன், அதில் 222,774 பேர் பாடசாலை பரீட்சாத்திகளாவர். அதன்படி, 177,588 பேர் பல்கலைக்கழக அனுமதிக்கு விண்ணப்பிக்கத் தகுதி பெற்றுள்ளதாகவும் அவர் குறிப்பிட்டார்.
பொதுவாக 2021ஆம் ஆண்டு பரீட்சைக்கு தோற்றியவர்களில் 62.89% வீதமானவர்கள் பல்கலைக்கழக அனுமதிக்கு விண்ணப்பிக்க தகுதி பெற்றிருந்தனர். இந்த எண்ணிக்கையானது 2022ஆம் ஆண்டில் 63.25%ஆகவும், 2023இல் 64.33%ஆக அதிகரித்திருந்த நிலையில், 2024ஆம் ஆண்டில் 64.73%ஆக அதிகரித்துள்ளதாகவும் சுட்டிக்காட்டினார்.
இங்கே அவதானிக்க வேண்டிய மற்றொரு விடயம் என்னவென்றால், மூன்று பாடங்களிலும் திறமைச் சித்தி பெற்றவர்களின் எண்ணிக்கை ஒரே அளவில் இருப்பது அவதானிக்கப்படுகிறது, 3.45% சதவீதத்தைக் காட்டும் இதன் எண்ணிக்கையானது 9,457ஆக காணப்படுகிறது.
