ஊடகவியலாளர் தரிந்து உடுவரகெதர பொலிஸாரால் தாக்கப்பட்டு கைது செய்யப்பட்ட சம்பவத்தில் தாங்கள் உடனடியாக தலையிட்டதாக தெரிவித்துள்ள இலங்கை மனித உரிமைகள் ஆணைக்குழு, வழக்குடன் தொடர்புடைய அனைவரையும் விசாரணைக்கு அழைக்கவுள்ளதாக தெரிவித்துள்ளது.
உடுவரகெதர கைது செய்யப்பட்டு பொரளை பொலிஸ் நிலையத்திற்கு அழைத்து வரப்பட்ட சிறிது நேரத்தின் பின்னர், மனித உரிமைகள் ஆணைக்குழுவின் குழுவொன்று நிலையத்திற்குச் சென்று அவரது உடல்நிலை குறித்து விசாரித்ததாக தெரிவித்துள்ளது.
மனித உரிமை ஆணைக்குழு பொரளை பொலிஸ் பொறுப்பதிகாரியைச் சந்தித்து ஜீப்பில் வைத்து பொலிஸாரால் தாக்கப்பட்டதாகக் கூறப்படும் உடுவரகெதரவை நீதித்துறை வைத்திய அதிகாரிக்கு அனுப்புமாறு பரிந்துரைத்ததாக அறிக்கையில் குறிப்பிடப்பட்டுள்ளது
“மனித உரிமைகள் ஆணைக்குழு இந்த சம்பவத்துடன் தொடர்புடையதாகக் கூறப்படும் தொடர்புடைய தரப்பினரிடமிருந்து அறிக்கைகளை பெறும். சம்பந்தப்பட்ட அனைத்து நபர்களையும் விசாரணைக்கு அழைக்கும்” என்று அந்த அறிக்கை கூறுகிறது.
இதேவேளை, கொழும்பு தேசிய வைத்தியசாலையில் சிகிச்சை பெற்று வரும் உடுவரகெதர நேற்று மாலை கருத்துத் தெரிவிக்கையில், தனது உடல்நிலையை கண்டறிய இன்று மேலும் பரிசோதனை முடிவுகள் வரும் என எதிர்பார்ப்பதாக தெரிவித்தார்.
“எனது வலது கண் பரிசோதனையின் அறிக்கை இன்னும் வரவில்லை, அதன் முடிவுகளின் அடிப்படையில் இன்று என்னை டிஸ்சார்ஜ் செய்ய மருத்துவர்கள் முடிவு செய்வார்கள்,” என்று அவர் கூறினார்.
வெள்ளிக்கிழமை பொரளயில் நடந்த ஆர்ப்பாட்டத்தில் செய்தி சேகரித்துக் கொண்டிருந்த உடுவரகெதர, பொலிசாரால் தாக்கப்பட்டு இழுத்துச் செல்லப்பட்டிருந்தார்.
