நேற்று (07) பிற்பகல் பின்கெல்ல பிரதேசத்தில் வீடொன்றில் 06 வயது சிறுமி ஒருவர் சந்தேகத்திற்கிடமான முறையில் உயிரிழந்த சம்பவம் தொடர்பில் ஹிரண பொலிஸார் விசாரணைகளை ஆரம்பித்துள்ளனர்.
தாய் மற்றும் தாயின் சட்டபூர்வமற்ற கணவருடன் வசித்து வந்த சிறுமி பல நாட்களாக நோய்வாய்ப்பட்டிருந்ததாகவும், மருத்துவ உதவி வழங்கப்படவில்லை எனவும் பொலிஸார் தெரிவித்தனர்.
குழந்தை இதற்கு முன்னர் பல தடவைகள் தாயின் துணைவியரால் உடல்ரீதியாக தாக்கப்பட்டதாக விசாரணைகளில் தெரியவந்துள்ளது.
செவித்திறன் மற்றும் பேச்சு குறைபாடுள்ள குழந்தையின் உடலில் பல தழும்புகள், காயங்கள் மற்றும் வீக்கங்கள் காணப்பட்டதாக பொலிஸார் தெரிவித்தனர். கடி காயங்களும் காணப்படுகின்றன.
கொலை செய்யப்பட்ட சிறுமியின் தந்தை இராணுவ சிறப்புப் படையில் உள்ளார்.
தாயும் சிறுமியும் சில வருடங்களுக்கு முன்னர் இராணுவ சிப்பாயால் கைவிடப்பட்டவர்கள் என பொலிஸ் விசாரணைகளில் இருந்து தெரியவந்துள்ளது.
சிறுமியின் தாயார், சிறுமியின் வாழ்வாதாரத்திற்காக பிச்சை எடுத்து வந்ததாகவும், அவர் கடையொன்றில் வேலைக்குச் சென்ற போது சந்தேக நபருடன் நட்பாக பழகியதாகவும் பெண்ணின் வாக்குமூலத்தில் தெரியவந்துள்ளதாக பொலிஸ் அதிகாரி ஒருவர் தெரிவித்தார்.
சுமார் மூன்று வாரங்களுக்கு முன்னர் சிறுமியின் தாயையும் சிறுமியையும் சந்தேக நபர் தனது தாய் வீட்டிற்கு அழைத்து வந்துள்ளதுடன், அன்றைய தினம் முதல் சிறுமி கொடூரமான முறையில் தாக்கப்பட்டுள்ளமை பொலிஸ் விசாரணையில் தெரியவந்துள்ளது.
சந்தேக நபரின் தாக்குதலால் சிறுமி பல நாட்களாக சுகயீனமுற்றிருந்த நிலையில் சிறுமியை வைத்தியசாலைக்கு கொண்டு செல்வதற்கு தாயோ பாட்டியோ முயற்சி எடுக்கவில்லை என பொலிஸாரின் விசாரணையில் தெரியவந்துள்ளது.
நேற்று (7) காலை முதல் சிறுமி ஆபத்தான நிலையில் இருந்ததாகவும், வீட்டின் அறையொன்றில் தரையில் போடப்பட்டிருந்த பாயில் படுக்க வைக்கப்பட்டிருந்த நிலையில் உயிரிழந்துள்ளதாகவும் பொலிஸார் தெரிவிக்கின்றனர்.
இந்த மரணம் தொடர்பாக குழந்தையின் 25 வயது தாயும், பெண்ணின் 29 வயது துணைவரும் கைது செய்யப்பட்டுள்ளனர்.
சடலம் பிரேத பரிசோதனைக்காக களுபோவில கொழும்பு தெற்கு போதனா வைத்தியசாலையில் வைக்கப்பட்டுள்ள அதேவேளை, மரணம் தொடர்பான நீதவான் விசாரணை நடத்தப்பட்டுள்ளது.
