ரஷ்யா- உக்ரைன் இடையே ஒலேஷ்கி நகரில் போர்நிறுத்தத்தை மத்தியஸதம் செய்த ட்ரம்ப் மனைவி

அமெரிக்காவின் முதற்பெண்மணி மெலானியா டிரம்ப், ரஷ்யாவின் கட்டுப்பாட்டில் உள்ள உக்ரைனின் ஒலேஷ்கி (Oleshky) நகரில், ரஷ்யாவிற்கும் உக்ரைனிற்கும் இடையே போர் நிறுத்தத்தை ஏற்படுத்தியுள்ளார். இந்த போர் நிறுத்தம் ஒக்டோபர் 29-ஆம் திகதி முதல் அமலுக்கு வரும் என்று வெள்ளை மாளிகை வெள்ளிக்கிழமை தெரிவித்துள்ளது.

பெப்ரவரி 2022 முதல் ரஷ்யப் படைகளின் கட்டுப்பாட்டில் உள்ள இந்த தெற்கு உக்ரைனிய நகரத்தில், உணவு நெருக்கடி தீவிரமடைந்துள்ளதாக அங்குள்ள மக்கள் தெரிவித்துள்ளனர்.

“மனிதாபிமான உதவிகள் உள்ளே செல்வதற்கும், பாதுகாப்பான வழித்தடம் வழியாக பொதுமக்கள் வெளியேறுவதற்குத் தேவையான ஏற்பாடுகளைச் செய்வதற்கும், ஒலேஷ்கியில் அனைத்து ராணுவ நடவடிக்கைகளையும் தற்காலிகமாக நிறுத்த இரு நாடுகளும் ஒப்புக்கொண்டுள்ளன” என்று வெள்ளை மாளிகை வெளியிட்டுள்ள அறிக்கையில் குறிப்பிடப்பட்டுள்ளது.

பெப்ரவரி 2022-ல் ரஷ்யா உக்ரைன் மீது படையெடுத்ததைத் தொடர்ந்து தொடங்கிய போரை முடிவுக்குக் கொண்டுவர, மெலானியா டிரம்பின் கணவரும் அமெரிக்க அதிபருமான டொனால்ட் டிரம்ப், உக்ரைனிய அதிபர் வோலோடிமிர் ஜெலென்ஸ்கியை, ரஷ்ய அதிபர் விளாடிமிர் புடினுடன் ஓர் உடன்படிக்கையை எட்ட வலியுறுத்தி வரும் சூழலில் இந்த முன்னேற்றம் ஏற்பட்டுள்ளது.

போரின் போது ரஷ்யாவால் அழைத்துச் செல்லப்பட்ட உக்ரைனியக் குழந்தைகளை மீண்டும் அவர்களது குடும்பத்தினரிடம் ஒப்படைக்கும் முயற்சியில் மெலானியா டிரம்ப் தீவிரமாக ஈடுபட்டு வருகிறார்.

“ஒலேஷ்கியில் நிலைமை மிகவும் மோசமாக உள்ளது. இது போர்க்களத்தின் முன்னணியில் உள்ள ஒரு நகரம், பேரழிவின் விளிம்பில் இருக்கிறது. அங்கு எஞ்சியிருப்பவர்களில் பெரும்பாலானோர் முதியவர்கள்; அவர்களுக்கு அவசர மருத்துவ உதவி, மருந்துகள், உணவு மற்றும் சுத்தமான குடிநீர் தேவைப்படுகிறது” என்று மெலானியா டிரம்ப் தனது அறிக்கையில் கூறியுள்ளார்.

இந்த போர் நிறுத்தத்தின் மூலம், இரு நாடுகளையும் சேர்ந்த ராணுவமற்ற குழுக்கள், அங்குள்ள மக்களின் வீடுகளுக்குச் சென்று, ரஷ்யாவிற்கோ அல்லது உக்ரைனிற்கோ செல்ல விரும்பும் மக்களுக்குப் போக்குவரத்து ஏற்பாடுகளைச் செய்ய முடியும். இந்தச் செயல்பாட்டைப் பதிவு செய்ய, அமெரிக்க ஊடக நிறுவனம் ஒன்றும் இந்தக் குழுக்களுடன் செல்லும் என்று முதற்பெண்மணி தெரிவித்தார்.

வலதுசாரி சார்பு கொண்ட ‘நியூஸ்மேக்ஸ்’ (Newsmax) என்ற ஊடகம், இந்த முயற்சியைப் பதிவு செய்யத் தங்கள் கேமராக்களுக்கு “பிரத்யேக அனுமதி” வழங்கப்பட்டுள்ளதாகத் தெரிவித்துள்ளது.

கெர்சன் (Kherson) நகருக்கு அருகில், டினிப்ரோ (Dnipro) ஆற்றின் மறுபுறம் அமைந்துள்ள ஒலேஷ்கி நகரில், போருக்கு முன்பு சுமார் 24,000 பேர் வசித்து வந்தனர். தற்போது அங்கு சுமார் 1,700 முதல் 2,000 பேர் மட்டுமே உள்ளனர்; இவர்களில் பெரும்பாலானோர் முதியவர்கள், மேலும் சுமார் 50 குழந்தைகளும் உள்ளனர் என்று வெள்ளை மாளிகை தெரிவித்துள்ளது. ககோவ்கா அணை (Kakhovka Dam) அழிக்கப்பட்டதைத் தொடர்ந்து, இந்த நகரத்தில் சுமார் 90 சதவீதப் பகுதி வெள்ளத்தில் மூழ்கியதாக வெள்ளை மாளிகை குறிப்பிட்டுள்ளது. மெலானியா ட்ரம்ப்பும் அவரது பிரதிநிதியும், குறிப்பிட்ட பகுதிகளில் போர் நிறுத்தத்தை ஏற்படுத்துவதற்கான நிபந்தனைகளை வரையறுக்க ரஷ்ய மற்றும் உக்ரேனியத் தலைவர்களுடன் நேரடியாகப் பேச்சுவார்த்தை நடத்தினர் என்று அந்த அறிக்கையில் தெரிவிக்கப்பட்டுள்ளது.

“வெளியேற விரும்பும் குடியிருப்பாளர்களுக்கு, அவர்கள் விரும்பும் இடத்திற்குச் செல்வதற்கான ஒருங்கிணைந்த ஆதரவும் போக்குவரத்து வசதியும் வழங்கப்படும். சிலர் ரஷ்யாவிற்கும், சிலர் உக்ரைனிற்கும் செல்ல விரும்புவார்கள் என்று நான் கருதுகிறேன்” என்று மெலானியா ட்ரம்ப் கூறினார்.