கோடிக்கணக்கான ரூபாய் பண மோசடி குற்றச்சாட்டுகளை எதிர்கொள்ளும் திலினி பிரியமாலியை கைது செய்து நீதிமன்றத்தில் ஆஜர்படுத்துமாறு கோட்டை நீதவான் பசன் அமரசேன உத்தரவிட்டார்.
சந்தேக நபருக்கான பிணைதாரர்கள் என்று கூறிக்கொண்டு இருவர் நீதிமன்றத்தில் ஆஜரான போதிலும், அவர்கள் உண்மையான பிணைதாரர்கள் அல்ல என்பதைக் கண்டறிந்த நீதவான், கைது வாரண்டைப் பிறப்பித்தார்.
திலினி பிரியமாலி மற்றும் ஐவர் மீதான நிதி மோசடி தொடர்பான வழக்குகள் விசாரணைக்கு எடுத்துக்கொள்ளப்பட்டபோது, வேறு சில சந்தேக நபர்களும் நீதிமன்றத்தில் ஆஜராகவில்லை. அவர்களுக்காகப் பிணைதாரர்கள் ஆஜரான நிலையில், மற்றொரு சந்தேக நபரான ஜானகி சிரிவர்தனாவின் சட்டத்தரணி, அவர் தற்போது வேறொரு வழக்கு தொடர்பாக விளக்கமறியலில் இருப்பதாகத் தெரிவித்தார்.
இச்சம்பவம் தொடர்பாகப் பிணையில் விடுவிக்கப்பட்டிருந்த பொரல்ல சிரிசுமன தேரர் நீதிமன்றத்தில் ஆஜரானார்; அவர் வெளிநாடு செல்வதற்கு விடுத்த கோரிக்கைக்கு நீதிமன்றம் அனுமதி அளித்தது. திலினி பிரியமாலி மற்றும் ஏனையோர் மீதான அனைத்து வழக்குகளையும் அடுத்த ஆண்டு மார்ச் 31-ஆம் திகதி மீண்டும் விசாரணைக்கு எடுத்துக்கொள்ளுமாறு நீதவான் உத்தரவிட்டார்.
