முன்னாள் ஜனாதிபதி மைத்திரிபால சிறிசேனவினால் 2019 இல் தனக்கு வழங்கப்பட்ட ஜனாதிபதி பொதுமன்னிப்பை உச்ச நீதிமன்றம் செல்லுபடியாகாது என அறிவித்த சில நாட்களுக்குப் பிறகு, ‘பொதுபல சேனா’ அமைப்பின் பொதுச் செயலாளர் கலகொட அத்தே ஞானசார தேரர், தற்போதைய ஜனாதிபதி அனுர குமார திஸாநாயக்கவிடம் புதியதொரு ஜனாதிபதி பொதுமன்னிப்பை வழங்குமாறு கோரிக்கை விடுத்துள்ளார்.
ஞாயிற்றுக்கிழமை (20) கொழும்பில் உள்ள சம்புத்தத்வ ஜயந்தி மந்திரயாவில் நடைபெற்ற தனது ‘நவயா பஹ விகுர்திய’ என்ற நூலின் வெளியீட்டு விழாவில் உரையாற்றிய ஞானசார தேரர், மூத்த பௌத்த பிக்குகள் இதில் தலையிட்டு தனக்காக ஜனாதிபதி பொதுமன்னிப்பைக் கோருமாறு கேட்டுக்கொண்டார்.
கூட்டத்தில் உரையாற்றிய ஞானசார தேரர், உச்ச நீதிமன்றத் தீர்ப்பைத் தொடர்ந்து தனது எதிர்காலம் குறித்து நிச்சயமற்ற நிலையில் இருப்பதாகக் குறிப்பிட்டாலும், சட்டத்தை மதிக்கத் தயாராக இருப்பதாகவும் வலியுறுத்தினார்.
“எனது விதி எவ்வாறு எழுதப்பட்டுள்ளது என்று எனக்குத் தெரியாது. இது நான் பயப்படும் நேரமல்ல. நாட்டின் சட்டங்களை மதிப்பது ஒவ்வொருவரின் பொறுப்பாகும். நான் சட்டத்திற்குத் தலைவணங்குவேன். அதில் எந்த விவாதமும் இல்லை,” என்று அவர் கூறினார்.
முந்தைய ஜனாதிபதி பொதுமன்னிப்பை வழங்குவதில் ஈடுபட்ட அதிகாரிகளால் இழைக்கப்பட்டதாகக் கூறப்படும் நடைமுறைப் பிழைகளின் விளைவுகளைத் தான் ஏன் எதிர்கொள்ள வேண்டும் என்று அவர் கேள்வி எழுப்பினார்.
“நடைமுறையில் அதிகாரிகள் தவறு செய்திருந்தால், நான் ஏன் தண்டிக்கப்பட வேண்டும்? முன்னாள் ஜனாதிபதி மைத்திரிபால சிறிசேனவால் பின்பற்றப்பட்ட செயல்முறையில் செய்யப்பட்ட எந்தவொரு தவறையும் தற்போதைய ஜனாதிபதியால் திருத்த முடியும்,” என்று அவர் கூறினார்.
தனது மத நடவடிக்கைகளைத் தொடர வாய்ப்பளிக்கப்பட வேண்டும் என்று வாதிட்ட ஞானசார தேரர், ஜனாதிபதி திஸாநாயக்கவிடம் புதிய பொதுமன்னிப்பைக் கோருமாறு மூத்த பிக்குகளிடம் வேண்டுகோள் விடுத்தார்.
தனது 87 வயதுடைய தாயார் குறித்தும் உணர்வுபூர்வமாகப் பேசிய அவர், சிறையில் அடைக்கப்பட்டால் அவரை மீண்டும் சந்திப்பதற்கான வாய்ப்பு கிடைக்காமல் போகலாம் என்ற கவலையையும் வெளிப்படுத்தினார்.
“சிலவேளைகளில் நாம் மீண்டும் சந்திக்கலாம், சிலவேளைகளில் சந்திக்காமலும் போகலாம். அதைப் பற்றி எனக்கு எந்த வருத்தமும் இல்லை,” என்று அவர் கூறினார்.
அரசியல் பிரமுகர்களின் சார்பாகச் செயல்படுவதாக முன்வைக்கப்பட்ட குற்றச்சாட்டுகளையும் மறுத்த அந்தத் தேரர், தான் எந்தவொரு அரசியல்வாதியின் ஆதரவாளரும் அல்ல என்று கூறினார்.
“நாங்கள் யாருடைய ஆதரவாளர்களும் அல்ல. நாங்கள் புத்தரின் வழியைப் பின்பற்றுபவர்கள்,” என்று அவர் கூறினார்.
தனக்கு எதிரான சட்ட நடவடிக்கைகள் தற்போதைய அரசாங்கத்தின் கீழ் அல்லாமல், முன்னாள் நல்லாட்சி நிர்வாகத்தின் போது தொடங்கப்பட்டவை என்பதையும் அவர் சுட்டிக்காட்டினார்.
பல ஆண்டுகளாக தனக்கு ஆதரவளித்தவர்களுக்கு நன்றி தெரிவித்த ஞானசார தேரர், தான் செய்திருக்கக்கூடிய தவறுகளுக்காக மன்னிப்பும் கோரினார். 2019-ஆம் ஆண்டில் ஞானசார தேரோவுக்கு வழங்கப்பட்ட ஜனாதிபதி பொதுமன்னிப்பு செல்லுபடியாகாது என்று செப்டம்பர் 10 அன்று உச்ச நீதிமன்றம் தீர்ப்பளித்தது; இது நீதிமன்ற அவமதிப்புக்காக அவருக்கு விதிக்கப்பட்ட சிறைத்தண்டனையில் எஞ்சியிருப்பதை நிறைவேற்றுவது குறித்த கேள்விகளை எழுப்பியுள்ளது.
இந்தத் தீர்ப்பைத் தொடர்ந்து அடுத்தகட்ட சட்ட நடவடிக்கைகள் என்னவாக இருக்கும் என்பது குறித்த நிச்சயமற்ற சூழலில், அவரது புதிய மேமுறையீடு அமைந்துள்ளது.
