மேற்கு இந்தியத் தீவுகள் அணிக்கு எதிரான கடைசி மற்றும் 3-வது டெஸ்ட் கிரிக்கெட் போட்டியில் 323 ரன்கள் வித்தியாசத்தில் வெற்றி பெற்ற நியூஸிலாந்து அணி டெஸ்ட் தொடரை 2-0 என கைப்பற்றி கோப்பையை வென்றது.
மவுண்ட் மவுங்கனியில் உள்ள பே ஓவல் மைதானத்தில் நடைபெற்ற இந்த டெஸ்ட் போட்டியில் நியூஸிலாந்து அணி முதல் இன்னிங்ஸில் 155 ஓவர்களில் 8 விக்கெட்கள் இழப்புக்கு 575 ரன்கள் குவித்து டிக்ளேர் செய்தது.
டேவன் கொன்வே 227, ரொம் லதம் 137 ரன்கள் விளாசினர். மேற்கு இந்தியத் தீவுகள் அணி முதல் இன்னிங்ஸில் 420 ரன்கள் குவித்து ஆட்டமிழந்தது. அதிகபட்சமாக கவேம் ஹாட்ஜ் 123 ரன்கள் சேர்த்தார். 155 ரன்கள் முன்னிலையுடன் 2வது இன்னிங்ஸை விளையாடிய நியூஸிலாந்து அணி 54 ஓவர்களில் 2 விக்கெட்கள் இழப்புக்கு 306 ரன்கள் குவித்த நிலையில் டிக்ளேர் செய்தது.
கப்டன் ரொம் லதம் 101 ரன்களும், டேவன் கொன்வே 100 ரன்களும் விளாசினர். இதையடுத்து 462 ரன்கள் இலக்குடன் ஆடிய மேற்கு இந்தியத் தீவுகள் அணி 4வது நாள் ஆட்டத்தின் முடிவில் 16 ஓவர்களில் விக்கெட் இழப்பின்றி 43 ரன்கள் எடுத்தது.
ஜான் கேம்பல் 2, பிரண்டன் கிங் 37 ரன்களுடன் ஆட்டமிழக்காமல் இருந்தனர். நேற்று கடைசி நாள் ஆட்டத்தை தொடர்ந்து விளையாடிய மேற்கு இந்தியத் தீவுகள் அணி 80.3 ஓவர்களில் 138 ரன்களுக்கு ஆட்டமிழந்தது. அதிகபட்சமாக பிரண்டன் கிங் 93 பந்துகளில், 13 பவுண்டரிகளுடன் 67 ரன்கள் சேர்த்தார்.
ஜான் கேம்பல் 16, கவேம் ஹாட்ஜ் 0, ஷாய் ஹோப் 3, அலிக் அதானஸ் 2, ஜஸ்டின் கிரீவ்ஸ் 0, கப்டன் ரோஸ்டன் சேஸ் 5, கேமர் ரோச் 4, ஆண்டர்சன் பிலிப் 10, ஜெய்டன் சீல்ஸ் 0 ரன்களில் நடையை கட்டினர். நியூஸிலாந்து அணி தரப்பில் ஜேக்கப் டஃபி 5, அஜாஸ் படேல் 3 விக்கெட்களை வீழ்த்தினர்.
323 ரன்கள் வித்தியாசத்தில் வெற்றி பெற்ற நியூஸிலாந்து அணி 3 ஆட்டங்கள் கொண்ட டெஸ்ட் கிரிக்கெட் தொடரை 2-0 என கைப்பற்றி கோப்பையை வென்றது. கிறைஸ்ட்சர்ச்சில் நடைபெற்ற முதல் போட்டி சமனிலையில் முடிவடைந்திருந்தது.
வெலிங்டனில் நடைபெற்ற 2வது டெஸ்ட் போட்டியில் நியூஸிலாந்து அணி 9 விக்கெட்கள் வித்தியாசத்தில் வெற்றி பெற்றிருந்தது. மேற்கு இந்தியத் தீவுகள் அணிக்கு எதிரான டெஸ்ட் கிரிக்கெட் தொடரை 2-0 என்று கைப்பற்றியதையடுத்து ஐசிசி உலக டெஸ்ட் சாம்பியன்ஷிப் புள்ளிகள் பட்டியலில் நியூஸிலாந்து அணி 2வது இடத்துக்கு முன்னேறி உள்ளது.
