60 வயதுக்கு மேற்பட்ட உக்ரேனிய மக்கள் ஆயுதப் படைகளில் சேர அனுமதிக்கும் சட்டத்தில் ஜனாதிபதி வோலோடிமிர் ஜெலென்ஸ்கி செவ்வாயன்று கையெழுத்திட்டார். ரஷ்ய படையெடுப்பு நான்காவது ஆண்டை எட்டும் நிலையில், போரிடும் ஆட்கள் பற்றாக்குறையால் உக்ரைன் திண்டாடி வருகின்றது.
மருத்துவ பரிசோதனைகளில் தேர்ச்சி பெற்றால், போர் அல்லாத பணிகளுக்கான ஒரு வருட ஒப்பந்தத்தில் கையெழுத்திட சட்டம் அனுமதிக்கும் என்று பாராளுமன்றத்தின் வலைத்தளத்தில் உள்ள விளக்கக் குறிப்பில் தெரிவிக்கப்பட்டுள்ளது.
“60 வயது மற்றும் அதற்கு மேற்பட்ட குடிமக்களில் கணிசமான எண்ணிக்கையிலானவர்கள் அரசின் பாதுகாப்பில் தானாக முன்வந்து சேர வலுவான விருப்பத்தை வெளிப்படுத்தியுள்ளனர்” என்று அந்தக் குறிப்பில் கூறப்பட்டுள்ளது.
“உக்ரைனின் இறையாண்மை மற்றும் பிராந்திய ஒருமைப்பாட்டைப் பாதுகாக்க விரும்பும் அதிக எண்ணிக்கையிலான மக்களை ஈடுபடுத்துவது அவசியம்” என்று அது கூறியது.
உக்ரைன் ஆயுதப் படைகளில் அதிகமான மக்களை ஈர்க்க பல முயற்சிகளைத் தொடங்கியுள்ளது – இதில் 18 முதல் 24 வயதுக்குட்பட்டவர்களுக்கு ஒரு வருட ஒப்பந்தம் மற்றும் நிதி ஊக்கத்தொகை ஆகியவை அடங்கும்.
