எதிர்பார்த்ததை விட வாகன இறக்குமதி தொடர்பான கேள்விகள் குறைவாக இருக்கும் பட்சத்தில், இலங்கை அரசாங்கம் வரிகளை குறைக்கும் முடிவை எடுக்கலாம் என பிரதி நிதியமைச்சர் அனில் ஜயந்த தெரிவித்துள்ளார்.
வெளிநாட்டு நாணயக் கையிருப்புகளை இழக்கும் அபாயம் நேரிடும் என்பதனை கருத்திற்கொண்டே இறக்குமதி கட்டுப்பாடுகள் விதிக்கப்பட்டுள்ளதாகவும், அந்நியச் செலாவணியில் நிலவும் வரம்பு காரணமாக மத்திய வங்கி ஒரு வழிகாட்டுதலை வழங்கியுள்ளதாகவும் அவர் கூறியுள்ளார்.
அதன்படி, வாகன வரிகளை முதலில் அதிகரித்து விலையை கட்டுப்படுத்தும் நடவடிக்கை எடுக்கப்பட்டுள்ளது. பின்னர் பொருளாதார சூழ்நிலை மற்றும் அந்நியச் செலாவணி நிலைமையின் முன்னேற்றத்தை கருத்தில் கொண்டு வரிகளை மீண்டும் குறைக்கும் வாய்ப்பு இருப்பதாகவும் அவர் தெரிவித்துள்ளார்.
வங்கிகளில் கடன் கடிதங்களைத் திறப்பதில் உள்ள ஆர்வம் இருந்த போதிலும் அதில் அதிகரிப்பு இல்லை என்றும், இலங்கை வாகனம் தொடர்பான வரிகளில் சுமார் 700 பில்லியன் ரூபாய் வருமானம் கிடைக்கும் என்று பிரதி அமைச்சர் தெரிவித்துள்ளார்.
மேலும், வாகன இறக்குமதி வரிகளை வெறும் வருவாய் திரட்டுவதற்காக மட்டுமே தளர்த்தப்படவில்லை என்பதுடன், இது நாட்டின் பொருளாதார அபிவிருத்திக்கும் துணைபுரியும் எனவும், வரிகளை மீண்டும் பரிசீலனை செய்யும் திட்டமிடல்கள் அரசாங்கத்தால் மேற்கொள்ளப்படுவதற்கான வாய்ப்பு இருப்பதாகவும், பொருளாதார தேவைகளை கருத்தில் கொண்டு இறக்குமதி கட்டுப்பாடுகளில் மாற்றங்கள் செய்யப்படும் என்றும் அவர் தெரிவித்தார்.
இதன் மூலம் நாட்டின் அந்நியச் செலாவணி மேலாண்மை சீர்செய்யப்படும் என்பதோடு, பொருளாதார வளர்ச்சிக்கும் இது முக்கிய பங்காற்றும் என்று அவர் வலியுறுத்தினார். வாகன வரிகளை மீண்டும் குறைக்கும் முயற்சிகள் அரசாங்கத்தால் மேற்கொள்ளப்படலாம், ஆனால் நாட்டின் பொருளாதார நிலைமையைப் பொருத்தே இந்த தீர்மானங்கள் அமைய வேண்டும் என அவர் தெரிவித்துள்ளமை குறிப்பிடத்தக்கதாகும்.
