யாழ்ப்பாணம் கோம்பயன்மணலில் மருத்துவ எரியூட்டி தொடர்பாக மக்கள் எதிர்ப்பு தெரிவித்து போராட்டத்தில் ஈடுபட்டுள்ளனர்.
யாழ்ப்பாணம் – கோம்பயன்மணல் இந்து மயானத்தில் அமைக்கப்பட்டுள்ள மருத்துவ எரியூட்டியால் தமக்கு கடும் பாதிப்பு ஏற்படுவதாக தெரிவித்து அப்பகுதி மக்கள் நேற்று (11) கண்டனப் போராட்டத்தில் ஈடுபட்டனர். மருத்துவக் கழிவுகள் எரிக்கப்படுவதால் வெளியேறும் இரசாயன புகை, அயல் பகுதியில் வசிக்கும் மக்களுக்குச் சுவாசக் குறைபாடுகள் மற்றும் பல்வேறு சுகாதாரப் பிரச்சினைகளை ஏற்படுத்துவதாக அவர்கள் குற்றச்சாட்டிட்டனர். இதன் காரணமாக, தங்களது வாழ்வாதாரம் பெரிதும் பாதிக்கப்படுவதாகவும், தொடர்ந்து துர்நாற்றம் வீசுவதால் வீட்டில் இருக்க முடியாமல் போய்விட்டதாகவும் மக்கள் வெளிப்படுத்தினர்.
மக்கள் எதிர்ப்பைத் தொடர்ந்து, தேசிய மக்கள் சக்தியின் யாழ்ப்பாணம் மாவட்ட பாராளுமன்ற உறுப்பினர் றஜீவன் ஜெயச்சந்திரமூர்த்தி போராட்டக்காரர்களை நேரில் சந்தித்து, இந்த விவகாரம் தொடர்பாக உரிய அதிகாரிகளுடன் கலந்துரையாடி தீர்வுக்கான நடவடிக்கை எடுப்பதாக உறுதியளித்தார்.
இதேபோல், கடந்த காலங்களில் யாழ் போதனா வைத்தியசாலையின் மருத்துவ கழிவுகளை எரியூட்டுவதில் பல்வேறு சர்ச்சைகள் எழுந்தன. எரியூட்டியை அமைப்பதற்கான இடம் தேர்வு செய்யும் கட்டத்தில் மிகுந்த இழுபறிகள் காணப்பட்டன. இதையடுத்து, ஐக்கிய நாடுகள் அபிவிருத்தித் திட்டத்தின் (UNDP) கீழ் 40 மில்லியன் ரூபா நிதி பங்களிப்பில் இந்த எரியூட்டி கடந்த ஆண்டு உருவாக்கப்பட்டு திறந்து வைக்கப்பட்டது.
ஆயினும், தற்போது ஏற்படும் பாதிப்புகள் மற்றும் மக்கள் எதிர்ப்பை கருத்தில் கொண்டு, இந்த எரியூட்டியின் செயல்பாடு மீதான ஆய்வுகளை மேற்கொண்டு, சுகாதார சீரமைப்புகளை நடைமுறைப்படுத்த வேண்டிய அவசியம் ஏற்பட்டுள்ளமை குறிப்பிடத்தக்கதாகும்.
