முரளி- வோர்ன் டெஸ்ட் தொடரின் காலியில் நடக்கும் முதல் டெஸ்ட் போட்டியில், இரண்டாம் நாளான இன்று அவுஸ்திரேலிய அணி 6 விக்கெட் இழப்பிற்கு 654 ஓட்டங்களை பெற்று முதல் இன்னிங்ஸை இடைநிறுத்தியது. அந்த அணியின் உஸ்மான் கவாஜா இரட்டைச் சதம் அடித்த முதல் அவுஸ்திரேலிய வீரர் என்ற வரலாறு படைத்தார்.
இன்றைய ஆட்டநேர முடிவில் இலங்கை அணி 3 விக்கெட் இழப்பிற்கு 44 ஓட்டங்களுடன் தத்தளித்து வருகிறது.
கமிந்து மென்டிஸ் 13 ஓட்டங்களுடனும், தினேஸ் சந்திமல் 9 ஓட்டங்களுடனும் களத்தில் உள்ளனர்.
அவுஸ்திரேலியா 6 விக்கெட் இழப்பிற்கு 654 ஓட்டங்களுடன் ஆட்டத்தை இடைநிறுத்தியது. உஸ்மான் கவாஜா 232, ஸ்ரிபன் ஸ்மித் 141, அறிமுக வீரர் ஜோஷ் இங்கிலிஸ் 94 பந்துகளில் 102 ஓட்டங்களை குவித்தனர்.
இலங்கை தரப்பில் பிரபாத் ஜெயசூரிய, ஜெப்ரி வண்டர்சே தலா 3 விக்கெட்டுக்களை வீழ்த்தினர்.
உஸ்மான் கவாஜா காலி டெஸ்ட் போட்டியின் 2ஆம் நாளான இன்று தன் இரட்டைச் சதத்தை எடுத்து முடித்து 232 ரன்களில் பிரபத் ஜெயசூரியாவிடம் ஆட்டமிழந்தார். இதில் 16 பவுண்டரிகளும் 1 சிக்சரும் அடங்கும். உஸ்மான் கவாஜா தன் 200வது ரன்னை 290வது பந்தில் சிங்கிள் மூலம் எடுத்த போது இலங்கையில் முதல் முதலாக இரட்டைச் சதம் விளாசிய அவுஸ்திரேலிய வீரர் என்ற வரலாற்றுச் சாதனையை நிகழ்த்தினார்.
இலங்கை மண்ணில் அதிக ஸ்கோரை விளாசியப் பட்டியலில் இன்றும் முதலிடம் வகிப்பது மே.இ.தீவுகளின் முன்னாள் அதிரடி மன்னன் கிறிஸ் கெய்ல்தான் இவர் 2010ஆம் ஆண்டு இதே காலி மைதானத்தில் 333 ரன்களை விளாசி வரலாற்றுச் சாதனைப் படைத்தது இன்று வரை முறியடிக்கப்படவில்லை. கிறிஸ் கெய்ல் 437 பந்துகளில் 333 ரன்களை விளாசினார். இலங்கை மண்ணில் அதிக ஸ்கோர் விளாசிய அயல்நாட்டு வீரர்கள் இதோ:
கிறிஸ் கெய்ல்- காலி- 333-ரன்கள் – 2010ஆம் ஆண்டு
ஸ்டீபன் பிளெமிங்- கொழும்பு- 274 நொட் அவுட், 2003
ஜோ ரூட்- காலி- 228 ரன்கள் – 2021
பிரையன் லாரா- கொழும்பு- 221 ரன்கள்- 2001
சவுத் ஷகீல் (பாகிஸ்தான்)- காலி -208 நொட் அவுட்- 2023
சச்சின் டெண்டுல்கர்-, கொழும்பு-203 ரன்கள்- 2010
அப்துல்லா ஷபீக்- கொழும்பு- 201 ரன்கள் – 2023
தற்போது உஸ்மான் கவாஜா- காலி- 232 ரன்கள் – 2025
கவாஜாவுக்கு முன்னர் அவுஸ்திரேலிய வீரர் ஜஸ்டின் லாங்கர் 166 ரன்களை இலங்கை மண்ணில் குவித்ததுதான் அவுஸ்திரேலிய வீரரின் அதிகபட்ச தனிப்பட்ட ஸ்கோராகும். இவர் கொழும்பில் 2004ஆம் ஆண்டு இந்த ஸ்கோரை எடுத்தது குறிப்பிடத்தக்கது.
இன்று அவுஸ்திரேலியா எடுத்த 654 என்ற ஸ்கோர் இலங்கைக்கு எதிராக அந்த அணியின் அதிகபட்ச ஓட்டங்களாகும். முன்னதாக இலங்கைக்கு எதிராக அவர்களின் அதிகபட்ச ஸ்கோர், 1995 இல் 5 விக்கெட்டுக்கு 617 ஆகும். இலங்கை மண்ணில் 1983 இல் 4 விக்கெட்டுக்கு 514 ஓட்டங்களே அதிக ஸ்கோர். ஆசியாவில் அவர்களின் அதிகபட்ச ஸ்கோர் 1980 இல் 617 ஓல் அவுட். இந்த சாதனைகளையெல்லாம் இன்று அவுஸ்திரேலியா முறியடித்தது.
ஜோஷ் இங்கிலிஸ் 90 பந்துகளில் தனது சதத்தை எட்டினார். இது ஆண்கள் டெஸ்ட் போட்டியில் அறிமுக வீரர் ஒருவரின் இரண்டாவது வேகமான சதமாகும், 2013 இல் அவுஸ்திரேலியாவுக்கு எதிராக ஷிகர் தவான் 85 பந்துகளில் சதம் அடித்ததே சாதனையாக உள்ளது.
