கம்பளை, தவுலகல பகுதியில் பாடசாலை மாணவி ஒருவரை கடத்திச் சென்ற சம்பவத்துடன் தொடர்புடைய பிரதான சந்தேக நபரையும், மற்றொரு சந்தேக நபரையும் இம்மாதம் 27ம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.
கடந்த 11ம் திகதி வேன் ஒன்றில் வந்த குழு சிறுமியை கடத்திச் சென்றது. சம்பவத்தின் பின்னர், தவுலகல பொலிஸார் மற்றும் சிறப்பு பொலிஸ் குழுக்கள் இணைந்து விசாரணைகளை முன்னெடுத்தனர்.
13ம் திகதி, முக்கிய சந்தேக நபர் அம்பாறை நகரில் கைது செய்யப்பட்டதைத் தொடர்ந்து, 14ம் திகதி இச் சம்பவத்துடன் தொடர்புடைய இன்னொரு நபரும் பொலிஸாரால் கைது செய்யப்பட்டிருந்தார். இக் கடத்தலுக்குப் பயன்படுத்திய வேனும் கண்டுபிடிக்கப்பட்டது, அதன் ஓட்டுநரும் கைது செய்யப்பட்டு நீதிமன்றத்தில் ஆஜர்படுத்தப்பட்டார்.
கடத்தப்பட்ட சிறுமி பாதுகாப்பாக மீட்கப்பட்டு, சட்ட வைத்திய பரிசோதனைக்கு பிறகு, நீதிமன்றத்தின் அனுமதியுடன் பெற்றோரிடம் ஒப்படைக்கப்பட்டுள்ளார்.
தவுலகல பொலிஸார் தற்போது சம்பவம் தொடர்பாக மேலதிக விசாரணைகளை மேற்கொண்டு வருகின்றனர்.
