23 வயது இளைஞனை தாக்கப்பட்டு, அவரது விரைப்பை அகற்றப்பட்ட சம்பவம் தொடர்பில் இரண்டு பொலிஸ் உத்தியோகத்தர்களுக்கு எதிராக கெபித்திகொல்லாவ பொலிஸ் குற்றப் புலனாய்வுப் பிரிவினரால் மேற்கொள்ளப்பட்டு வரும் அனைத்து விசாரணைகளையும் சிஐடியிடம் ஒப்படைக்குமாறு மதவாச்சி நீதவான் இமேஷா தர்மதாச பொலிஸ் மா அதிபருக்கு நேற்று உத்தரவிட்டுள்ளார்.
இந்த சம்பவம் தொடர்பில் மதவாச்சி பொலிஸ் நிலைய பொறுப்பதிகாரியின் செயற்பாடுகள் தொடர்பில் விசாரணைகளை மேற்கொண்டு முழுமையான அறிக்கையை நீதிமன்றில் சமர்ப்பிக்குமாறு வடமத்திய மாகாணத்திற்கு பொறுப்பான சிரேஷ்ட பிரதி பொலிஸ் மா அதிபருக்கு நீதவான் உத்தரவிட்டுள்ளார்.
இச்சம்பவம் தொடர்பான அடையாள அணிவகுப்பு நேற்றைய தினம் நடைபெறவிருந்த நிலையில், தாக்குதலில் காயமடைந்த இளைஞன் வைத்தியசாலையில் சிகிச்சை பெற்று வருவதால் நீதிமன்றில் முன்னிலையாகவில்லை.
இளைஞரைக் கைது செய்த இரண்டு பொலிஸ் உத்தியோகத்தர்களும் விசாரணைகளின் மூலம் உறுதிப்படுத்தப்பட்டுள்ளதால், அவர்களை அடையாள அணிவகுப்புக்கு அழைத்துச் செல்ல வேண்டிய அவசியம் உள்ளதா என, பிரதிவாதி சார்பில் ஆஜரான சட்டத்தரணி பாக்யா ஹேரத் நீதிமன்றில் தெரிவித்தார்.
அதற்கு பதிலளித்த இலங்கை சட்டத்தரணிகள் சங்கத்தின் பிரதித் தலைவர் நலிந்த இந்ததிஸ்ஸ, கைது செய்யப்பட்ட பொலிஸ் அதிகாரிகளை உறுதிப்படுத்துவதற்காக அடையாள அணிவகுப்பு நடத்தப்பட வேண்டும், பாதிக்கப்பட்ட இரு இளைஞர்களை தாக்கிய பொலிஸ் அதிகாரிகளை அடையாளம் காண வேண்டும் என்று தெரிவித்தார்.
அத்துடன், பொலிஸாரினால் மேற்கொள்ளப்படும் விசாரணைகள் வெளிப்படைத்தன்மையுடனும் பக்கச்சார்பற்றதாகவும் முன்னெடுக்கப்பட வேண்டுமென பாதிக்கப்பட்ட தரப்பு சார்பில் ஆஜரான சட்டத்தரணிகள் நீதிமன்றில் வலியுறுத்தியுள்ளனர்.
இந்த சம்பவம் தொடர்பில் தற்போது விளக்கமறியலில் வைக்கப்பட்டுள்ள பொலிஸ் சார்ஜன்ட் மற்றும் கான்ஸ்டபிளை எதிர்வரும் 24 ஆம் திகதி வரை விளக்கமறியலில் வைக்குமாறு உத்தரவிடப்பட்டுள்ளது.
சந்தேக நபர்களை அடையாள அணிவகுப்புக்கு தயார்படுத்துமாறு அனுராதபுரம் சிறைச்சாலை அத்தியட்சகருக்கு உத்தரவிடப்பட்டுள்ளது.
குறிப்பாக இலங்கை சட்டத்தரணிகள் சங்கத்தின் தலைவர் கௌசல்ய நவரத்ன உள்ளிட்ட விசேட சட்டத்தரணிகள் குழுவொன்று அவதான தரப்பினராக நீதிமன்றில் முன்னிலையாகியிருந்தமை குறிப்பிடத்தக்கது. இலங்கை சட்டத்தரணிகள் சங்கத்தின் அரசியலமைப்பின் படி, சட்டத்தின் ஆட்சி மற்றும் குடிமக்களின் உரிமைகளைப் பாதுகாப்பதற்காக தீவிரமாகத் தலையிடும் பொறுப்பு நிறுவனத்திற்கு உள்ளது என்று நவரத்ன நீதிமன்றத்தில் உண்மைகளை முன்வைத்தார்.
இந்த வழக்கில் கண்காணிப்பு தரப்பாக தலையிட இலங்கை சட்டத்தரணிகள் சங்கத்தை அனுமதிக்குமாறு இலங்கை சட்டத்தரணிகள் சங்கத்தின் பிரதித் தலைவர் ஜனாதிபதி சட்டத்தரணி நலிந்த இந்ததிஸ்ஸ நீதவானிடம் கோரிக்கை விடுத்தார். குறித்த சாரதி பொலிஸ் காவலில் இருந்த போது இந்த தாக்குதல் இடம்பெற்றுள்ளதாக நீதிமன்றில் தெரிவித்தார்.
தாக்குதலுடன் தொடர்புடைய இரண்டு பொலிஸ் உத்தியோகத்தர்கள் மற்றும் சோதனைக்கு உதவிய ஏனைய நான்கு பொலிஸ் உத்தியோகத்தர்களின் வருகைப்பதிவு மற்றும் வெளியேறும் பதிவு புத்தகங்கள் மற்றும் பாக்கெட் குறிப்பேடுகளை வழக்குப் பொருட்களாக உள்ளடக்குமாறு அவர் நீதிமன்றத்திடம் கோரினார்.
தனிப்பட்ட முறையில் யாரையும் தாக்கும் அல்லது அவமானப்படுத்தும் நோக்கமின்றி, சட்டத்தரணிகள் சங்கம் ஒரு கண்காணிப்புக் கட்சியாக இதுபோன்ற சம்பவங்களில் தலையிடுகிறது என்றும், குடிமக்களின் உரிமைகள் மற்றும் சட்டத்தின் ஆட்சியைப் பாதுகாப்பதே சட்டத்தரணிகள் சங்கத்தின் நோக்கமாகும் என்றும் ஜனாதிபதி சட்டத்தரணி வலியுறுத்தினார்.
தாக்குதல் சம்பவம் தொடர்பான அனைத்து விசாரணைகளும் பக்கச்சார்பற்ற, முறையான மற்றும் வெளிப்படைத்தன்மையுடன் மேற்கொள்ளப்பட்டு வருவதாக ஹொரவ்பொத்தானை ASP S.P.எதிரிசிங்க தெரிவித்தார். தற்போது விசாரணைகள் ஓரளவுக்கு நிறைவடைந்துள்ளதாக ASP எதிரிசிங்க மேலும் நீதிமன்றத்திற்கு அறிவித்தார்.
சந்தேகநபர்களால் தாக்கப்பட்டதாகக் கூறப்படும் சாரதியான திலிஷ சங்கீத் (வயது 23) தற்போது அனுராதபுரம் போதனா வைத்தியசாலையில் சிகிச்சை பெற்றுவருவதுடன், சத்திரசிகிச்சையின் பின்னர் அவரது விதைகளில் ஒன்று அகற்றப்பட்டுள்ளது.
