வைத்தியசாலையில் இரட்டைக் குழந்தைகளையும் பறிகொடுத்த பெற்றோர்!

களுபோவில போதனா வைத்தியசாலையில் பிறந்த இரண்டு இரட்டைக் குழந்தைகள் பதினான்கு நாட்களுக்குள் சந்தேகத்திற்கிடமான முறையில் உயிரிழந்தமை தொடர்பில் வைத்தியர்களுக்கு எதிராக முறைப்பாடு செய்யப்பட்டுள்ளதாக பொலிஸார் தெரிவித்தனர்.

கடந்த 19 மற்றும் 23 ஆம் திகதிகளில் இரண்டு தடவைகள் இந்த இரண்டு குழந்தைகளும் உயிரிழந்துள்ளதாக பொலிஸார் தெரிவிக்கின்றனர்.

கொஸ்பேவ? ஹொன்னந்தர, சர்வோதய மாவத்தை 5ஆம் லேன், 31/4 இல் வசிக்கும் அகிலா போனிபஸ் மற்றும் களுநாயக்க அலவல பகுதியைச் சேர்ந்த ஹஷான் தில்ரங்க ஆகிய தம்பதியினரே குழந்தைகளை இழந்துள்ளனர்.

இம்மாதம் 23ஆம் திகதி பிரசவம் என திகதி குறிக்கப்பட்டிருந்த நிலையில், குழந்தைப் பிரசவத்திற்காக கடந்த 8ஆம் திகதி குறித்த பெண் களுபோவில போதனா வைத்தியசாலையில் அனுமதிக்கப்பட்டுள்ளார். அங்கு, கடந்த 9ம் திகதி ஒரு மகனும், ஒரு மகளும் பிறந்து எடை குறைந்ததால், இரண்டு குழந்தைகளும் குறைமாத குழந்தை பிரிவில் அனுமதிக்கப்பட்ட நிலையில், கடந்த 19ம் திகதி ஆண் குழந்தை உயிரிழந்தது.

விஷம் உள்ளே நுழைந்ததால் மரணம் ஏற்பட்டதாக முதலில் மருத்துவர்கள் கூறியதாகவும், பின்னர் சுவாசக் கோளாறு காரணமாக குழந்தை உயிரிழந்ததாக மருத்துவர்கள் கூறியதாகவும் புகாரில் கூறப்பட்டுள்ளது.

இதேவேளை, எஞ்சியிருந்த பெண் குழந்தையும் குறைப்பிரசவப் பிரிவில் சிகிச்சை பெற்று வந்த நிலையில் (23) காலை உயிரிழந்துள்ளதுடன், குறைமாத சிசு பிரிவுக்கு உணவளிக்கச் சென்ற போது குழந்தை உயிரிழந்துள்ளதாக ஊழியர்கள் தெரிவித்தனர்.

சம்பவம் தொடர்பான மேலதிக விசாரணைகளை கொஹுவல பொலிஸார் மேற்கொண்டு வருகின்றனர்.