ரஷ்யாவின் விவசாய ஏற்றுமதி தொடர்பான நிபந்தனைகளை மேற்கு நாடுகள் நிறைவேற்றிய பின்னரே, கருங்கடல் வழியாக உக்ரைனிய தானியங்களை பாதுகாப்பாக அனுப்புவதற்கான ஐக்கிய நாடுகள் சபையின் ஒப்பந்தத்தை மீண்டும் நிலைநிறுத்த முடியும் என்ற தனது நிலைப்பாட்டை ஜனாதிபதி விளாடிமிர் புடின் மீண்டும் வலியுறுத்தினார்.
திங்களன்று கருங்கடல் நகரமான சோச்சியில் துருக்கி ஜனாதிபதி ரெசெப் தையிப் எர்டோகனுடனான சந்திப்பை தொடர்ந்து புடின் இதனை அறிவித்தார்.
உக்ரைன் தானியங்களை பாதுகாப்பாக ஏற்றுமதி செய்யும் ஒப்பந்தம் அமுலான போது, ரஷ்யாவின் உணவு மற்றும் உர ஏற்றுமதிக்கு தடைகளை அகற்றுவதாக உறுதியளிக்கும் ஒரு இணை ஒப்பந்தமும் உருவானது. ஆனால், மேற்கு நாடுகள் அதை முறையாக அமுலாக்கவில்லை. இந்த நிலையில், தானிய ஏற்றுமதி ஒப்பந்தம் ஜூலையில் முடிவடைந்தபோது, அதை நீடிக்க ரஷ்யா மறுத்து விட்டது.
தானிய ஏற்றுமதி தடைப்பட்டதால் உலகளாவிய உணவு நெருக்கடி அச்சம் ஏற்பட்டுள்ளது. குறிப்பாக ஆபிரிக்க, ஆசிய நாடுகளே இதனால் அதிகம் பாதிக்கப்படுகின்றன.
அத்துடன், கருங்கடல் தானிய தாழ்வாரங்களை இராணுவ நோக்கங்களுக்காக பயன்படுத்தக்கூடாது என்றும் புடின் கூறினார். அந்த வாக்குறுதிகள் மதிக்கப்பட்டால், ரஷ்யா “நாட்களுக்குள்” ஒப்பந்தத்திற்கு திரும்ப முடியும் என்று அவர் செய்தியாளர்களிடம் கூறினார்.
விரைவில் ஒரு திருப்புமுனை வரலாம் என்றும் எர்டோகன் நம்பிக்கை தெரிவித்தார். துருக்கி மற்றும் ஐ.நா – இரண்டும் அசல் ஒப்பந்தத்தின் தரகர்கள் – சிக்கலைத் தடுக்க புதிய திட்டங்களை ஒன்றாக இணைத்துள்ளன என்று அவர் கூறினார்.
“குறைபாடுகளை சரிசெய்வதன் மூலம் முன்முயற்சி தொடர வேண்டும் என்று நாங்கள் நம்புகிறோம்” என்று உக்ரைனுக்கும் ரஷ்யாவிற்கும் இடையில் மத்தியஸ்தராகப் பொறுப்பேற்றுள்ள துருக்கிய ஜனாதிபதி கூறினார். மே மாதம் எர்டோகன் மூன்றாவது முறையாக ஜனாதிபதியாக மீண்டும் தேர்ந்தெடுக்கப்பட்ட பிறகு இரு தலைவர்களுக்கும் இடையிலான முதல் சந்திப்பு இதுவாகும்.
எனினும், அமெரிக்காவும் ஐரோப்பிய ஒன்றியமும் ரஷ்யாவின் குற்றச்சாட்டுக்களை நிராகரித்துள்ளன, அவற்றின் தடை இலக்கு ரஷ்ய தானியங்கள் மற்றும் உரங்கள் இல்லை என்று கூறின.
ஒப்பந்தத்தை புதுப்பிக்கத் தவறினால், உக்ரைனிய மற்றும் ரஷ்ய தானியங்களை பெரிதும் நம்பியிருக்கும் பல ஆபிரிக்க நாடுகளில் “கடுமையான தாக்கங்கள்” ஏற்படும் என்று நிபுணர்கள் கூறுகின்றனர்.
அதை நிவர்த்தி செய்யும் முயற்சியில், ஆறு ஆபிரிக்க நாடுகளுக்கு இலவச தானியங்களை இன்னும் சில வாரங்களில் வழங்கவுள்ளதாகவும் புடின் சோச்சியில் செய்தியாளர்களிடம் கூறினார்.
“நாங்கள் ஆறு ஆபிரிக்க நாடுகளுடன் ஒப்பந்தங்களை முடிக்க நெருங்கிவிட்டோம், அங்கு நாங்கள் உணவுப் பொருட்களை இலவசமாக வழங்க விரும்புகிறோம், மேலும் விநியோகம் மற்றும் தளவாடங்களை இலவசமாகச் செய்ய விரும்புகிறோம்,” என்று அவர் கூறினார்.
“அடுத்த இரண்டு வாரங்களில் விநியோகம் தொடங்கும்.”
கருங்கடல் ஒப்பந்தத்தின் மூலம் ஏற்றுமதி செய்யப்பட்ட தானியத்தின் பெரும்பகுதி ஏழை நாடுகளுக்குப் பதிலாக மேற்கு நாடுகளுக்குச் சென்றதாகவும் ரஷ்ய தலைவர் குற்றம் சாட்டினார்.
