திங்களன்று எரிசக்தி உள்கட்டமைப்பு மீது ரஷ்ய ஏவுகணைத் தாக்குதலைத் தொடர்ந்து ஐரோப்பிய ஒன்றியத்திற்கான மின்சார ஏற்றுமதியை நிறுத்துவதாக உக்ரைனிய எரிசக்தி அமைச்சகம் தெரிவித்துள்ளது.
“இன்றைய ஏவுகணைத் தாக்குதல்கள், வெப்ப உற்பத்தி மற்றும் மின் துணை நிலையங்களைத் தாக்கியது, உக்ரைன் தனது சொந்த ஆற்றல் அமைப்பை உறுதிப்படுத்துவதற்காக அக்டோபர் 11, 2022 முதல் மின்சார ஏற்றுமதியை நிறுத்த வேண்டிய கட்டாயம் ஏற்பட்டது” என்று அமைச்சகம் அதன் இணையதளத்தில் ஒரு அறிக்கையில் தெரிவித்துள்ளது.
உக்ரைன் மீது ரஷ்யா திங்கட்கிழமை மிகவும் பரவலான ஏவுகணைத் தாக்குதல்களை நடத்தியது. முக்கிய நகரங்களில் ஏவுகணை மழை பொழிந்தது. முக்கியமான மின் உற்பத்தி நிலையங்கள் அழிக்கப்பட்டன.
கிரிமியா தீபகற்பத்தை ரஷ்யாவுடன் இணைக்கும் கெர்ச் பாலத்தை நடத்த குண்டுவெடிப்பிற்கு பதிலடியாக இந்த தாக்குதல் நடத்தப்பட்டது. இந்த குண்டு வெடிப்பை ‘பயங்கரவாத செயல்’ என ரஷ்ய ஜனாதிபதி புடின் வர்ணித்துள்ளார்.
இந்த குண்டுவெடிப்பிற்கு உக்ரைன் பொறுப்பேற்காத போதும், அதனை உக்ரைனே மேற்கொண்டிருக்க வாய்ப்புள்ளது.
உக்ரைனின் எரிசக்தி அமைச்சர் ஹெர்மன் ஹலுஷ்செங்கோ, எரிசக்தி அமைப்பின் மீதான தாக்குதல்கள் “முழுப் போரின்போதும் மிகப்பெரிய தாக்குதல்” என்றார்.
ஒரு தொலைக்காட்சி ஒளிபரப்பில், “முழு விநியோகச் சங்கிலியின் மீதும் ஏவுகணைத் தாக்குதல்கள் செய்யப்பட்டன. விநியோகத்தை மாற்றுவதை முடிந்தவரை கடினமாக்குகின்றன” என்று கூறினார்.
ஜூன் மாதம், உக்ரைனிய எரிசக்தி அமைச்சகம், இந்த ஆண்டு இறுதிக்குள், ஐரோப்பிய ஒன்றியத்திற்கு மின்சாரம் ஏற்றுமதியில் இருந்து 1.5 பில்லியன் யூரோக்களை கொண்டுவரும் என்று நம்புவதாகக் கூறியது.
