வீடுகள் போன்ற உள்நாட்டு நுகர்வோர், சிறிய அளவிலான வணிகங்கள் மற்றும் நிறுவனங்கள் மற்றும் பெரிய அரசு மற்றும் பிற நிறுவனங்கள் உட்பட மொத்த நுகர்வோர் இலங்கை மின்சாரசபைக்கு செலுத்த வேண்டிய பண நிலுவை ரூ.14.6 பில்லியன் என தெரிய வந்துள்ளது.
ஜூன் 30ஆம் திகதி வரையான கணக்கீடே இது.
இலங்கை மின்சாரசபை தகவல்களின்படி, ரூ. 9.56 பில்லியன் நிலுவை சாதாரண வீட்டு வகையைச் சேர்ந்தவை.
மொத்த சப்ளையர்களிடம் இருந்து செலுத்த வேண்டிய தொகை ரூ. 4.5 பில்லியன். இதில் ரூ. 2.1 பில்லியன் ஒரு வருடத்திற்கும் மேலாக செலுத்தப்படவில்லை.
தற்போதைய பொருளாதார நெருக்கடியினால் மின்சாரசபையின் தினசரி நடவடிக்கைக்கு நிலுவைத் தொகையை வசூலிப்பது இன்றியமையாததாக இருப்பதால், மின்சார நுகர்வோர் தங்கள் நிலுவைத் தொகையை விரைவில் செலுத்த வேண்டும் என்று மின்சாரசபை தெரிவித்துள்ளது.
பல கட்டண வகைகளின் கீழ் மொத்த விநியோகத் துறைக்கும் மின்சாரசபை மூலம் மின்சாரம் வழங்கப்படுகிறது. தொழில் துறைகள், சுகாதாரம், ஆயுதப்படைகள், காவல்துறை மற்றும் சுற்றுலா விடுதிகள் போன்ற துறைகள் இதில் அடங்கும்.
ஜூன் 30 ஆம் திகதிக்குள், தொழிற்சாலைகள் செலுத்த வேண்டிய பண நிலுவை ரூ. 2.7 பில்லியன்.
அடுத்த அதிகபட்ச நிலுவைத் தொகையான ரூ. 870 மில்லியன் அரச நிறுவனங்கள் செலுத்த வேண்டியுள்ளது. இந்தத் தொகை இராணுவம், பொலிஸ், சுகாதாரம் மற்றும் மருத்துவ சேவைகள், கல்வி, உள்ளுராட்சி மற்றும் இலங்கை இரயில்வே ஆகியவற்றிலிருந்து செலுத்த வேண்டியுள்ளது.
ரூ. 697 மில்லியன் ஹோட்டல்கள் அல்லது பொது நோக்கப் பிரிவைச் சேர்ந்த சிறிய நிறுவனங்களிடமிருந்து செலுத்த வேண்டியுள்ளது. சுற்றுலா ஹோட்டல்கள் ரூ. 196 மில்லியன் செலுத்த வேண்டும்.
மத நிறுவனங்கள் ரூ. 25 மில்லியன் செலுத்த வேண்டும். மொத்த வழங்கல் பிரிவின் கீழ் குறிப்பிட்ட சில முக்கிய வழிபாட்டுத் தலங்களின் மின்சாரக் கட்டணங்கள் இதுவரை மின்சாரசபையினால் செலுத்தப்பட்டு வருகின்றன. மற்ற அனைத்து மத வழிபாட்டுத் தலங்களிலும் மின் கட்டணம் தற்போது சிறிய அளவில் உள்ளது. எவ்வாறாயினும், இந்த வசதி ஒக்டோபர் 1 முதல் இடைநிறுத்தப்பட்டுள்ளது.
மேலும் மத வழிபாட்டுத் தலங்களுக்கு அவர்களின் மின் கட்டணத்தை அவர்களே செலுத்த வேண்டும் என்று அறிவிக்கப்பட்டுள்ளது.
செப்டெம்பர் மாதம் முதலாம் திகதி முதல் மின்சார சபை கட்டணத்தை அதிகரித்துள்ள நிலையில், மத நிறுவனங்களுக்கு 500 சதவீதத்திற்கும் அதிகமான கட்டண உயர்வு விதிக்கப்பட்டுள்ளது. “குறைந்த கட்டணத்தின் காரணமாக, பல மத நிறுவனங்கள் எந்தப் பொறுப்பும் இல்லாமல் ஒரு நாளைக்கு 24 மணி நேரமும் மின்சார பல்புகளை எரிய விடுகிறார்கள்” என்று மின்சாரசபை உயரதிகாரியொருவர் குற்றம் சாட்டினார்.
சாதாரண வீட்டுப் பிரிவைச் சேர்ந்த நுகர்வோர் தங்கள் கட்டணத்தைச் செலுத்த ஒரு மாத கால அவகாசம் வழங்கப்பட்டுள்ளது.
கோவிட்-19 மற்றும் அதைத் தொடர்ந்து ஏற்பட்ட பொருளாதார நெருக்கடி காரணமாக, மின்சாரக் கட்டணத்தைத் தீர்ப்பதற்கான இந்தக் கடன் காலம் ஜூன் முதல் இரண்டு மாதங்கள் வரை நீட்டிக்கப்பட்டுள்ளது. இரண்டு மாதங்களுக்குப் பிறகு செலுத்தப்படாத பில்களுக்கு வட்டி சேர்க்கப்படும்.
இருப்பினும், மொத்த விநியோகத்திற்கான கடன் காலம் 15 நாட்கள் மட்டுமே. அந்த காலத்திற்குப் பிறகு, பில்களுக்கு வட்டி சேர்க்கப்படும்.
