பிரேசிலின் பழங்குடியினத்தின் எஞ்சியிருந்த கடைசி மனிதரும் உயிரிழந்துள்ளார். நிலம், கனிய வளத்திற்காக மனிதகுலத்தின் இனப்படுகொலைக்குள்ளாகி தனாரு பிரதேசத்திலிருந்த பழங்குடியினம் முற்றாக அழிந்துள்ளது.
உயிரிழந்த இந்த நபரின் உண்மையான பெயர் வெளி உலகத்திற்குத் தெரியாது. ஓகஸ்ட் 23 அன்று பொலிவியாவின் எல்லையில் உள்ள ரோண்டோனியா மாநிலத்தில் உள்ள தனாரு பூர்வீக பிரதேசத்தில் ஒரு குடிசையில் அவரது உடல் கண்டுபிடிக்கப்பட்டது.
பிரேசிலின் தேசிய பழங்குடியின அறக்கட்டளை (FUNAI) ஒரு அறிக்கையில் இதனை தெரிவித்துள்ளது.
உயிரிழந்த கடைசி தனாரு பழங்குடியின நபர், 26 ஆண்டுகளாக முற்றிலும் தனிமையில் வாழ்ந்து வந்தார்.
தனக்குத் தெரிந்த அனைவரையும் இழந்ததால், அந்த மனிதன் வெளி உலகத்துடனான அனைத்து தொடர்புகளையும் மறுத்து, வேட்டையாடுதல் மற்றும் பயிர்களை வளர்ப்பதன் மூலம் உயிர் வாழ்ந்து வந்தார்.
அவர் கட்டிய குடிசைகளுக்குள் ஆழமான குழிகளை தோண்டி, மறைந்து வாழ்ந்து வந்ததால் ‘துளை மனிதன்’ என்று அழைக்கப்பட்டு வந்தார்.
இந்த துளைகளின் மூலம் விலங்குகளை பொறி வைத்தும் பிடித்து வந்தார்.
சர்வைவல் இன்டர்நேஷனல் படி, பிரேசிலிய அமேசான் மழைக்காடுகளில் ஒரு பழங்குடிப் பிரதேசத்தில் வாழ்ந்தார். கால்நடை பண்ணைகளிற்காகவும், சட்டவிரோத சுரங்கத் தொழிலிற்காகவும், மரம் வெட்டுவதற்காகவும் அந்த பழங்குடியின மக்கள் வாழ்ந்த பகுதி மிக வேகமாக அழிக்கப்பட்டு, அந்த மக்கள் இரக்கமில்லாமல் கொல்லப்பட்டனர்.
பிரேசிலில் உள்ள அதிகாரிகள் அந்த நபரின் மரணத்திற்கான காரணம் அல்லது அவரது வயது குறித்து கருத்து தெரிவிக்கவில்லை. ஆனால் “வன்முறை அல்லது போராட்டத்தின் அறிகுறிகள் எதுவும் இல்லை” என்று கூறினார்.
அவரது வீட்டிலோ அல்லது அதைச் சுற்றிலும் வேறு யாரும் இருந்ததற்கான எந்த ஆதாரமும் கிடைக்கவில்லை.
“இயற்கையான காரணங்களால் மரணம் நிகழ்ந்தது என்பதை எல்லாம் சுட்டிக்காட்டுகிறது,” என்று சுதேச விவகாரங்களைக் கையாளும் நீதி அமைச்சகத்தின் கீழ் உள்ள அரசு நிறுவனமான FUNAI தெரிவித்துள்ளது.
அந்த மனிதனின் உடல் மக்கா இறகுகளால் மூடப்பட்டிருந்ததாக உள்ளூர் ஊடகங்கள் தெரிவித்தன, ஒரு நிபுணர் அவர் இறக்கப் போகிறார் என்று அவருக்குத் தெரியும் என்று ஊகிக்கத் தூண்டுவதாக தெரிவித்தார்.
1970 களில் பண்ணையாளர்கள் இப்பகுதிக்குள் நுழைந்து, காடுகளை வெட்டி, மக்களைத் தாக்கியபோது பெரும்பாலான பழங்குடியினர் கொல்லப்பட்டனர்.
1995 ஆம் ஆண்டில், அவரது பழங்குடியினரின் மீதமுள்ள ஆறு பேர் சட்டவிரோத சுரங்கத் தொழிலாளர்களின் தாக்குதலில் கொல்லப்பட்டனர். இதில் அவர் மட்டுமே உயிர் பிழைத்தார்.
பிரேசிலின் பூர்வீக விவகார முகமை (Funai) 1996 இல் மட்டுமே அவர் உயிர் பிழைத்ததை அறிந்தது, மேலும் அவரது சொந்த பாதுகாப்பிற்காக அப்பகுதியை கண்காணித்து வந்தது.
2004 இல் தனாரு பிரதேசத்திற்கு விஜயம் செய்த சர்வைவல் இன்டர்நேஷனல் இன் விசாரணை இயக்குனர் ஃபியோனா வாட்சன், “அவரது மரணத்துடன், இந்த பழங்குடியின மக்களின் இனப்படுகொலை முடிந்தது” என்று கூறினார்.
“இது உண்மையில் இனப்படுகொலை: நிலம் மற்றும் செல்வத்திற்காக பசியுள்ள பண்ணையாளர்களால் ஒரு முழு மக்களையும் வேண்டுமென்றே அகற்றுவது,” என்று அவர் மேலும் கூறினார்.
சமீபத்திய அரசாங்கத் தரவுகளின்படி, 212 மில்லியன் மக்கள் வசிக்கும் பிரேசிலில் 300க்கும் மேற்பட்ட வேறுபட்ட குழுக்களைச் சேர்ந்த சுமார் 800,000 பழங்குடியினர் வாழ்கின்றனர்.
பாதிக்கும் மேற்பட்டவர்கள் அமேசானில் வாழ்கின்றனர். அவர்களில் பலர் தங்கள் உயிர்வாழ்விற்காக நம்பியிருக்கும் இயற்கை வளங்களை சட்டவிரோதமாக சுரண்டுவதால் அச்சுறுத்தலுக்கு உள்ளாகியுள்ளனர்.
FUNAI இன் கூற்றுப்படி, பிரேசிலில் தனிமைப்படுத்தப்பட்ட பழங்குடியின குழுக்களின் 114 பதிவுகள் உள்ளன, இருப்பினும் அந்த எண்ணிக்கை மாறுபடும்.
பிரேசிலின் தீவிர வலதுசாரி ஜனாதிபதி ஜெய்ர் போல்சனாரோவின் கீழ், 2022 இன் முதல் பாதியில் அமேசான் காடழிப்பு சாதனை அளவை எட்டியது.
