காசாவின் நிலைமை குறித்து விவாதிக்க ஐ.நா பாதுகாப்பு கவுன்சில் திங்களன்று அவசரக் கூட்டத்தை நடத்தியது.
கூட்டத்தின் தொடக்கத்தில் காணொளி மூலம் பேசிய ஐ.நா. மத்திய கிழக்கு தூதர் டோர் வென்னஸ்லேண்ட், போர் மீண்டும் தொடங்குவது “பேரழிவுகரமான” விளைவுகளை ஏற்படுத்தும் என்று எச்சரித்தார்.
“போர் நிறுத்தம் பலவீனமானது,” என்று அவர் எச்சரித்தார்.
பாலஸ்தீனத்தின் காசாவில் இஸ்லாமிய ஜிஹாத் போராளிகளுக்கும், இஸ்ரேலுக்கும் இடையேயான 3 நாள் கொடிய தாக்குதலின் பின்னர், போர் நிறுத்தம் ஏற்பட்டுள்ள போதிலும் இந்த கவலைகளை எழுப்பப்பட்டுள்ளன.
ரஷ்ய தூதர் Vasily Nebenzia “இந்த நிகழ்வுகளின் திருப்பத்தால் ஆழ்ந்த கவலை கொண்டுள்ளது, இது ஒரு முழுமையான இராணுவ மோதலை மீண்டும் தொடங்குவதற்கு வழிவகுக்கும் மற்றும் காசாவில் ஏற்கனவே மோசமான மனிதாபிமான நிலைமையை மேலும் மோசமாக்கும்” என்று வலியுறுத்தினார்.
இஸ்ரேல் வெள்ளிக்கிழமை முதல் காசாவில் உள்ள இஸ்லாமிய ஜிஹாத் நிலைகள் மீது கடுமையான வான்வழி மற்றும் பீரங்கி குண்டுவீச்சுகளை நடத்தியது, இதற்கு பதிலடியாக ஆயிரம் ரொக்கெட்டுகளை இஸ்ரேல் மீது ஜிஹாத் போராளிகள் ஏவினர்.
கடந்த ஆண்டு 11 நாள் போருக்குப் பிறகு காஸாவில் நடந்த மிக மோசமான சண்டையாக இந்த வன்முறை இருந்தது.
ஞாயிற்றுக்கிழமை பிற்பகுதியில் எகிப்தின் மத்தியஸ்தத்தில் போர்நிறுத்தம் தீவிரமான சண்டையை முடிவுக்குக் கொண்டுவந்தது. இஸ்ரேலின் தாக்குதலில்15 குழந்தைகள் உட்பட 44 பேர் கொல்லப்பட்டனர். 360 பேர் காயமடைந்ததாக காசாவின் சுகாதார அமைச்சகம் தெரிவித்துள்ளது.
போர்நிறுத்தம் மீறப்பட்டால் பதிலடி கொடுக்கும் உரிமை இரு தரப்புக்கும் உள்ளது.
பாலஸ்தீனிய குழுக்களால் ஏவப்பட்ட சுமார் 1,100 ரொக்கெட்டுகளில் “20 சதவிகிதம்” காசா பகுதிக்குள் விழுந்துவிட்டன, வன்முறை பற்றிய ஐ.நா.வின் மதிப்பீடு நடந்து கொண்டிருக்கிறது என்று ஐ.நா தூதர் வென்னஸ்லேண்ட் கூறினார்.
கூட்டத்திற்கு முன்னதாக, ஐ.நா.வுக்கான இஸ்ரேலிய தூதர் கிலாட் எர்டன், இஸ்லாமிய ஜிஹாத் மீது “முழு பொறுப்புக்கூறலை” வைக்குமாறு சபைக்கு அழைப்பு விடுத்தார். ஈரான் ஆதரவு குழு காசா மக்களை “மனிதக் கேடயங்களாகப் பயன்படுத்துகிறது” என்று குற்றம் சாட்டினார்.
“இஸ்லாமிய ஜிஹாத் இரட்டைப் போர்க் குற்றங்களுக்காக முழுப் பொறுப்புக்கூறலை மேற்கொள்ள வேண்டும். அப்பாவி பாலஸ்தீனியர்களின் கொலைக்கு பயங்கரவாதக் குழுவே முழுமையான பொறுப்பு” என்று அவர் கூறினார்.
“காசா மக்களை மனிதக் கேடயங்களாகப் பயன்படுத்தும் போது அவர்கள் இஸ்ரேலிய பொதுமக்கள் மீது ரொக்கெட்டுகளை வீசுகிறார்கள். இது இரட்டை போர்க்குற்றம்,” என்றார்.
அமெரிக்காவின் ஐ.நா தூதர் லிண்டா தோமஸ்-கிரீன்ஃபீல்ட், “பயங்கரவாத அச்சுறுத்தல்களுக்கு எதிராக தனது மக்களைப் பாதுகாக்கும் இஸ்ரேலின் உரிமையை” ஆதரித்தார்.
“இந்த கவுன்சில் ஒன்று கூடி நிபந்தனையின்றி பாலஸ்தீனிய இஸ்லாமிய ஜிஹாத்தின் பயங்கரவாதத்தை நிராகரிக்க முடியும், அதன் பொறுப்பற்ற நடவடிக்கைகள் இரு தரப்பிலும் உள்ள பொதுமக்களின் உயிரை ஆபத்தில் ஆழ்த்தியுள்ளன,” என்று அவர் கூறினார்.
ஆனால் பாலஸ்தீனிய தூதர் ரியாத் மன்சூர் இஸ்ரேலின் “நியாயமற்ற ஆக்கிரமிப்பை” கடுமையாக சாடினார்.
பாதுகாப்பு கவுன்சிலின் ஆலோசனை கூட்டம் நியூயோர்க்கில் உள்ள ஐ.நா தலைமையகத்தில் நடந்தது. மூடிய கதவு சந்திப்பிற்குப் பிறகு எந்த அறிக்கையும் வெளியிடப்படவில்லை.
