வன்முறைச் செயல்களின் மூலம் அரச கட்டிடங்களைக் கட்டுப்படுத்த முயற்சிக்கும் அல்லது ஜனநாயக விரோத முறைகளைப் பயன்படுத்தி அதிகாரத்தைக் கைப்பற்ற முயற்சிக்கும் குழுக்கள், அமைப்புகள் அல்லது அரசியல் கட்சிகளைத் தடை செய்வது குறித்து அரசு பரிசீலித்து வருவதாக தகவல் வெளியாகியுள்ளது.
தற்போது அமைந்துள்ள ராஜபக்ஷ பின்னணி அரசை அகற்ற, ஓகஸ்ட் 9 ஆம் திகதி மீண்டும் பொதுமக்கள் போராட்டம் நடத்த திட்டமிடப்படும் தகவல் வெளியாகியுள்ள பின்னணியில், போராட்டங்களை ஒடுக்க அரசு இந்த நடவடிக்கையில் இறங்கியுள்ளதாக தகவல் வௌியாகியுள்ளது.
அரசு கட்டிடங்கள் அல்லது நிர்வாக மையங்களை கைப்பற்றி ஆக்கிரமித்து பொது சொத்துகளுக்கு சேதம் விளைவிப்பது “பயங்கரவாத நடவடிக்கைகளாக” அறிவிப்பது குறித்து அரசு ஆராய்ந்து வருகிறது.
அத்தகைய நடவடிக்கைகளுக்கு உதவும் அல்லது உறுதுணையாக இருக்கும் எந்தவொரு அமைப்பையும் அல்லது அரசியல் கட்சியையும் தடை செய்வதற்கான சாத்தியக்கூறுகள் குறித்து பொதுப் பாதுகாப்பு அமைச்சு சட்ட ஆலோசனையை நாடியுள்ளதாக தகவல் வெளியாகியுள்ளது.
தற்போது, பொலிஸ் மற்றும் பாதுகாப்புப் படையினருக்கு பரந்த அதிகாரங்களை வழங்கும் அவசரகாலச் சட்டம் இந்த வாரம் பாராளுமன்றத்தால் ஒரு மாத காலத்திற்கு அங்கீகரிக்கப்பட்ட பின்னர் ஓகஸ்ட் 18 வரை நடைமுறையில் உள்ளது.
இந்த காலப்பகுதியில் ஜூலை 9 மற்றும் 13 க்கு இடையில் நடந்த வன்முறை சம்பவங்களில் ஈடுபட்டதாகக் கூறப்படும் நபர்களை கைது செய்யும் நடவடிக்கைகள் முடுக்கி விடப்பட்டுள்ளன.
ஜூலை 9ஆம் திகதி அப்போதைய பிரதமர் ரணில் விக்கிரமசிங்கவின் தனிப்பட்ட இல்லம் எரிக்கப்பட்ட சம்பவம் தொடர்பில் தேடப்பட்டு வரும் பிரதான சந்தேக நபர்கள் 14 பேரின் புகைப்படங்களை பொலிஸார் இந்த வாரம் வெளியிட்டுள்ளனர்.
சொத்துக்களுக்கு சேதம் விளைவித்தமை, தீ வைப்புத் தாக்குதலில் ஈடுபட்டமை உள்ளிட்ட குற்றச்சாட்டுக்களிற்கு இலக்கான மேலும் 40 பேரின் புகைப்படங்களை பொலிசார் எதிர்வரும் நாட்களில் ஊடகங்களில் வெளியிட உள்ளனர்.
ஜனாதிபதி விக்கிரமசிங்கவின் தனிப்பட்ட இல்லத்திற்கு அருகாமையில் உள்ள தடைகளை உடைத்து அப்பகுதிக்குள் நுழைந்த சுமார் 300 பேர் மீதும் விசாரணைகள் இடம்பெற்று வருகின்றன. அவர்களில் ஒரு பகுதியினர் சுவர்களை தாண்டி குடியிருப்புக்குள் நுழைந்தனர்.
அந்த பகுதியில் இருந்து 20 சந்தேக நபர்களின் கைரேகைகளும் பெறப்பட்டுள்ளன. அங்கு நிறுத்தப்பட்டிருந்த வாகனத்தில் இருந்து 8 பேரினதும், கட்டிடத்தின் சில பகுதிகளிலிருந்து 12 பேரினதும் கைரேகைகள் சேகரிக்கப்பட்டுள்ளன.
இதேவேளை, ஜனாதிபதி மாளிகை, ஜனாதிபதி செயலகம், அலரிமாளிகை மற்றும் பிரதமர் அலுவலகம் போன்றவற்றில் சொத்துக்களை திருடியவர்களைக் கண்டறிய சிசிடிவி மற்றும் காணொளி காட்சிகள் மூலம் விசாரணைகளை மேற்கொண்டு வருவதாக பொது பாதுகாப்பு அமைச்சின் அதிகாரி ஒருவர் தெரிவித்தார்.
காணாமல் போன பொருட்களின் பட்டியல் எடுக்கப்பட்டவுடன், இந்த கட்டிடங்களில் காணப்படும் பொருட்களை வீடியோ எடுப்பதில் சிக்கிய சந்தேக நபர்களின் புகைப்படங்களையும் அவர்கள் எடுத்ததாகக் கூறப்படும் பொருள் அல்லது பொருட்களின் விளக்கத்தையும் போலீசார் வெளியிடுவார்கள் என்று அதிகாரி கூறினார்.
சிசிடிவி காட்சிகளைத் தவிர, இந்தக் கட்டிடங்களில் இருந்த காவல்துறை மற்றும் பாதுகாப்புப் படை வீரர்களால் படமாக்கப்பட்ட பல வீடியோ கிளிப்புகள் விசாரணை அதிகாரிகளுக்கு கிடைத்துள்ளன.
இதுபோன்ற பொருட்களை திருடுவது அல்லது பொது சொத்துக்களுக்கு சேதம் விளைவிப்பது தொடர்பாக தேடப்படும் நபர்களை கைது செய்ய வழிவகுக்கும் தகவல்களை வழங்கும் எவருக்கும் வரும் நாட்களில் பணப் பரிசு வழங்க போலீசார் திட்டமிட்டுள்ளனர்.
அரச கட்டிடங்களுக்குள் அத்துமீறி நுழைந்தவர்கள் மீது தனித்தனியாக குற்றப்பத்திரிகை தாக்கல் செய்யப்படும்.
