தொழிற்சங்கங்களின் ஆட்சேபனையைத் தொடர்ந்து மருத்துவ ஊழியர்களின் கொடுப்பனவுகள் மற்றும் மேலதிக நேர கொடுப்பனவுகளை வெட்டுவதற்கான திறைசேரியின் முன்மொழிவை சுகாதார அமைச்சு நிராகரித்துள்ளது.
அரச செலவினங்களைக் குறைப்பதற்கான நடவடிக்கைகள் குறித்த திறைசேரி உத்தரவுகளுக்கு இணங்க அமைச்சு இந்த வார தொடக்கத்தில் வெளியிடப்பட்ட சுற்றறிக்கையை மாற்றியமைக்க வேண்டியிருந்தது.
வியாழக்கிழமை வெளியிடப்பட்ட திருத்தப்பட்ட சுற்றறிக்கையில், தற்போது நடைமுறையில் உள்ள கொடுப்பனவுகள் அடிப்படை சம்பளத்தை மீறாத வரை தொடரும் என்று மீண்டும் உறுதிப்படுத்தப்பட்டது.
சுற்றறிக்கை மாற்றியமைக்கப்பட்டதை உறுதிப்படுத்திய சுகாதார அமைச்சர் கெஹலிய ரம்புக்வெல்ல, இது திறைசேரியின் ஒரு ஆலோசனையாகும், ஆனால் அது ஏற்கனவே இறுக்கமான வரவு செலவுத் திட்டத்தில் இயங்குவதால், மீள்வருகைச் செலவினங்களில் எவ்வித வெட்டுக்களையும் மேற்கொள்ள அமைச்சினால் முடியாது என்றார்.
“சமீப காலங்களில் பல பிரிவுகள் சேர்க்கப்பட்டதால் சுகாதார அமைப்பில் ஆள் பற்றாக்குறை உள்ளது. சில சந்தர்ப்பங்களில், பணியாளர் பற்றாக்குறை மிகவும் முக்கியமானது. அவை சரி செய்யப்பட வேண்டும். சுகாதாரத் துறை ஊழியர்களுக்கு கடந்த காலத்தில் வழங்கப்பட்ட ஊதியத்திற்கு உரிமை உண்டு, ஆனால் நாட்டின் பொருளாதாரம் மீண்டும் சரியான பாதையில் செல்லும் வரை புதிய கொடுப்பனவு அதிகரிப்புக்கான புதிய முன்மொழிவுகள் ஒத்திவைக்கப்படுகின்றன”என்று அமைச்சர் கூறினார்.
இந்த வாரமும் பிரதமர் ரணில் விக்கிரமசிங்க தலைமையில் நடைபெற்ற கூட்டத்திலும் இந்த விடயம் ஆராயப்பட்டது. இடைக்கால வரவு செலவுத் திட்டத்தில் சுகாதாரம் மற்றும் கல்வி ஆகிய இரு துறைகளுக்கும் முன்னுரிமை வழங்கப்படும் என பிரதமர் தெரிவித்தார்.
