இலங்கையில் இருந்து உகாண்டாவிற்கு அச்சிடப்பட்ட பணத்ததாள்கள் எடுத்துச் செல்லப்பட்ட விவகாரம் சர்ச்சையாகியுள்ள நிலையில், பிரித்தானிய நாணய அச்சிடும் நிறுவனமான De La Rue ட்விட்டரில் ஒரு குறுகிய அறிக்கையை வெளியிட்டுள்ளது.
உலகளவில் பல நாடுகளிற்கு நாணயத்தாள்களை அச்சிட்டு விநியோகிக்கும் மேற்படி நிறுவனத்தின் தொழிற்சாலைகள் உலகின் பல நாடுகளிலும் உள்ளன. இலங்கையிலும் தொழிற்சாலை உள்ளது.
அந்த நிறுவனத்தினால் அச்சிடப்பட்ட உகாண்டா நாணயத் தாள்களுடன் சரக்கு விமானங்கள் பிப்ரவரி 2021 இல் உகாண்டாவிற்கு புறப்பட்டதாக ஸ்ரீலங்கன் ஏர்லைன்ஸ் ஏற்கனவே உறுதிப்படுத்தியது.
இந்த நிலையில் De La Rue நிறுவனத்திடம் நாணயத்தாள் அச்சிட்ட விவகாரத்தின் உண்மைத்தன்மை பற்றி சமூகஊடக பயனர்கள் கேள்வியெழுப்பினர். இதையடுத்தே De La Rue நிறுவனம் குறுகிய அறிக்கை வெளியிட்டது.
De La Rue வெளியிட்ட அறிக்கையில், உலகெங்கிலும் உள்ள மத்திய வங்கிகளில் பாதிக்கு மேற்பட்டவைக்கான நாணயத்தாள்களை இலங்கை, கென்யா, மால்டா மற்றும் இங்கிலாந்து ஆகிய நாடுகளில் உள்ள எங்கள் தளங்களில் இருந்து De La Rue வழங்குகிறது. , எங்கள் வாடிக்கையாளர்களைப் பற்றி நாங்கள் கருத்து தெரிவிப்பதில்லை என குறிப்பிட்டுள்ளது.
