அமைச்சர்களான வாசுதேவ நாணயக்கார, விமல் வீரவன்ச, உதய கம்மன்பில ஆகியோர் அமைச்சரவையில் அங்கம் வகிக்கும் நிலையில், அமைச்சரவை தீர்மானத்திற்கு எதிராக நீதிமன்றம் செல்வதும், அமைச்சரவை தீர்மானத்தை பகிரங்கமாக விமர்சிப்பதும் தவறானதாகும் என ஜனாதிபதி கோட்டபாய ராஜபக்ச தெரிவித்துள்ளார்.
நேற்று (27) பத்திரிகை ஆசிரியர்களுடன் இடம்பெற்ற கலந்துரையாடலின் போதே இதனை தெரிவித்துள்ளார்.
அமைச்சரவை தீர்மானத்திற்கு எதிராக நீதிமன்றத்திற்கு சென்றால் அமைச்சுப் பதவியை இராஜினாமா செய்து விட்டு அதனைச் செய்ய வேண்டும் எனவும் அவர் குறிப்பிட்டுள்ளார்.
அமைச்சரவையின் தீர்மானத்திற்கு எதிராக நீதிமன்றத்திற்கு செல்வதும், அமைச்சரவையில் இருக்கும் போது அந்த தீர்மானத்தை விமர்சிப்பதும் அமைச்சரவையின் கூட்டுப் பொறுப்பை மீறும் செயலாகும் எனவும் ஜனாதிபதி தெரிவித்தார்.
அமைச்சரவையின் கூட்டுப் பொறுப்பை மீறியமை தொடர்பில் நீதிபதி மார்க் பெர்னாண்டோவின் தீர்ப்பும் இருந்ததை ஜனாதிபதி நினைவு கூர்ந்தார்.
ஜனாதிபதியின் செயலாளர் கலாநிதி பீ.பீ.ஜயசுந்தரவின் செயற்பாடுகளை சில அமைச்சர்கள் பகிரங்கமாக விமர்சிப்பது தவறானது எனவும், அது மக்கள் மத்தியில் தவறான எண்ணத்தை ஏற்படுத்தும் எனவும் ஜனாதிபதி மேலும் தெரிவித்தார்.
இதற்கெல்லாம் ஒரே அதிகாரியே காரணம் என்ற தவறான எண்ணத்தை மக்கள் மத்தியில் இது ஏற்படுத்துவதாகவும் ஜனாதிபதி தெரிவித்தார்.
தாம் நல்லெண்ணத்தில் ஆரம்பித்த இயற்கை விவசாயத் திட்டத்திற்கு விவசாய அமைச்சு எவ்வித ஆதரவையும் வழங்கவில்லை எனவும், தான் எதிர்பார்த்ததைச் செய்ய முடியவில்லை எனவும் ஜனாதிபதி கோட்டாபய ராஜபக்ஷ தெரிவித்தார்.
இயற்கை விவசாயத் திட்டம் தொடர்பில் விவசாய அமைச்சு விவசாயிகளுக்கும் பொதுமக்களுக்கும் அறிவிக்கவில்லை எனவும், விடயத்திற்குப் பொறுப்பான அமைச்சரினால் மட்டும் அதனைச் செய்ய முடியாது எனவும் ஜனாதிபதி தெரிவித்தார்.
கரிம உரத் திட்டத்தின் கீழ் 30 வீதமும் இரசாயன உரம் 70 வீதமும் பயன்படுத்தப்படும் என விவசாய அமைச்சு முதலில் தெரிவித்திருந்த போதிலும், பின்னர் இவை இரண்டையும் கலந்து பயன்படுத்த தீர்மானித்ததாக அவர் கூறினார்.
கரிம உரத் திட்டம் ஆரம்பிக்கப்பட்ட ஒரு வருடத்தின் பின்னர் இரசாயன உரங்களின் இறக்குமதிக்கு பெயரிடப்பட்டுள்ளதாக அவர் மேலும் தெரிவித்தார்.
சீன உரக் கப்பலின் தரத்திற்கு உத்தரவாதம் அளிக்கும் முன் வங்கியின் எல்சியை திறப்பது தவறு என்றும் அவர் கூறினார்.
தாம் ஜனாதிபதியாக பதவியேற்கும் போது 30 ரூபாவாக இருந்த நெல்லின் விலையை 50 ரூபாவாக உயர்த்தியதன் மூலம் விவசாயிகளுக்கு நல்ல வருமானம் கிடைத்ததாக ஜனாதிபதி தெரிவித்தார்.
கொவிட் நெருக்கடி காரணமாக பொருளாதார நெருக்கடியும் டொலர் தட்டுப்பாடும் ஏற்பட்டுள்ளதாகத் தெரிவித்த ஜனாதிபதி, இது தனக்கு மாத்திரமன்றி உலகத்திற்கே துரதிஷ்டவசமான நிலை எனவும் தெரிவித்தார்.
கோவிட் காரணமாக சுற்றுலாப் பயணிகளின் வருகை குறைந்துள்ளது மற்றும் வெளிநாட்டு வேலைவாய்ப்பு வருவாய் குறைந்ததே டொலர் நெருக்கடிக்கு காரணம் என்று அவர் கூறினார். தான் ஆட்சிக்கு வந்து ஒரு வருடத்திற்குள் கோவிட் நெருக்கடி வந்ததாகவும், ஆனால் அவர் திட்டமிட்ட பலவற்றைச் செய்யத் தவறியதாகவும் ஜனாதிபதி கூறினார்.
எரிபொருளை இறக்குமதி செய்வதற்கு மாதாந்தம் 360 மில்லியன் டொலர்களும், நிலக்கரியை இறக்குமதி செய்வதற்கு வருடத்திற்கு 3 பில்லியன் டொலர்களும் செலவாகும் எனவும், அதனை பொருளாதாரத்தால் தாங்கிக் கொள்ள முடியாது எனவும் ஜனாதிபதி தெரிவித்தார்.
இந்த நிலைமையை போக்குவதற்கு புதுப்பிக்கத்தக்க எரிசக்தியை பயன்படுத்த வேண்டும் எனவும் அதுவே தனது முன்னுரிமை எனவும் ஜனாதிபதி தெரிவித்தார்.
சுமார் 800 புதுப்பிக்கத்தக்க எரிசக்தி திட்டங்கள் தயாரிக்கப்பட்டு டெண்டர் கோரப்பட்டதாகவும், ஆனால் 150 டெண்டர்கள் மட்டுமே பெறப்பட்டுள்ளதாகவும் அவர் கூறினார்.
இதேவேளை, சில அமைச்சு செயலாளர்கள் மற்றும் சில தலைவர்கள் நியமனம் தோல்வியடைந்த சந்தர்ப்பங்களும் உண்டு.
இன்னும் மூன்று வருடங்கள் வேலை செய்ய உள்ளதாகவும், ஒரு திட்டத்தில் வேலை செய்வதாகவும் கூறினார்
