சுமார் 70 ஆண்டுகள் போராட்டத்துக்கு பின் சீனாவில் மலேரியா முற்றிலுமாக ஒழிக்கப்பட்டுவிட்டதாக உலக சுகாதார அமைப்பு தெரிவித்துள்ளது. இது சீனாவுக்கு கிடைத்த மிகப்பெரிய வெற்றியாக கருதப்படுகிறது. ஏனெனில், 1940களில் ஆண்டுக்கு 3 கோடி பேர் மலேரியாவால் பாதிக்கப்பட்டு வந்தனர்.
70 ஆண்டுகளுக்கு பின் இப்போது மலேரியாவை முற்றிலுமாக ஒழித்தது சீனாவின் சாதனையாக கருதப்படுகிறது. மலேரியாவை முற்றிலும் ஒழித்ததற்காக சீன மக்களுக்கு உலக சுகாதார அமைப்பின் தலைவர் டெட்ரோஸ் அதனோம் வாழ்த்து தெரிவித்துள்ளார்.
அவர் வெளியிட்டுள்ள அறிக்கையில், “சீன மக்களின் வெற்றி கடும் உழைப்பின் பயனாக வந்தது. பல ஆண்டுகள் தொடர்ந்து நடவடிக்கை எடுக்கப்பட்டதன் பலனாக இந்த வெற்றி கிடைத்துள்ளது. இதன்மூலம், மலேரியாவை முற்றிலும் ஒழிக்க முடியும் என பல நாடுகளுக்கு சீனா உணர்த்தியுள்ளது” என்று தெரிவித்துள்ளார்.
பசிபிக் பிராந்தியத்தில் சீனாவுக்கு முன் ஆஸ்திரேலியா (1981), சிங்கப்பூர் (1982), புருனே (1987) ஆகிய நாடுகள் மலேரியாவை முற்றிலும் ஒழித்தன. 1967ஆம் ஆண்டில் சீன அரசு ‘523 திட்டம்’ என்ற திட்டத்தை அறிமுகப்படுத்தியது. மலேரியா ஒழிப்பில் இத்திட்டம் முக்கிய பங்கு வகித்துள்ளது.
