சீனாவிற்கு ஒரு தெளிவான செய்தி அளிக்கும் விதமாக, இந்திய இராணுவத் தளபதி ஜெனரல் எம்.எம்.நாரவனே கிழக்கு லடாக்கில் உள்ள அனைத்து மோதல் புள்ளிகளிலும் முழுமையான படைவிலகல் இல்லாமல் எந்தவிதமான அமைதியும் இருக்க முடியாது என்றும், பிராந்தியத்தில் எந்தவொரு நடவடிக்கைக்கும் இந்திய இராணுவம் தயாராக உள்ளது என்றும் கூறினார்.
ஒரு ஆங்கில ஊடகத்திற்கு அவர் அளித்த பிரத்யேக நேர்காணலில், ஜெனரல் நாரவனே, கிழக்கு லடாக்கில் சீனாவின் உரிமைகோரல்களை இந்தியா உறுதியாக கையாண்டு வருவதாகவும், நம்பிக்கையை வளர்ப்பதற்கான நடவடிக்கைகளைத் தொடங்குவதற்கு எப்போதும் திறந்த மனதுடன் இருப்பதாகவும் கூறினார்.
2020 மே 5 அன்று கிழக்கு லடாக்கில் இரு தரப்பினருக்கும் இடையிலான இராணுவ மோதல் வெடித்து ஒரு வருடத்திற்கும் மேலாகிவிட்டது. 45 ஆண்டுகளில் முதல்முறையாக அப்போது இரு தரப்பிலும் இறப்புகள் நிகழ்ந்தன.
பாங்கோங் ஏரி பகுதியில் படை நீக்கம் செய்வதில் சிறிய அளவு முன்னேற்றத்தை அடைந்துள்ளனர். அதே நேரத்தில் மற்ற மோதல் புள்ளிகளிலும் இதேபோன்ற நடவடிக்கைகளுக்கான பேச்சுவார்த்தைகள் முடங்கியுள்ளன.
ஜெனரல் நாரவனே, இந்திய இராணுவம் தற்போது உயரமான பிராந்தியத்தில் உள்ள அனைத்து முக்கிய பகுதிகளையும் பிடித்து வருவதாகவும், சீனாவின் எந்தவொரு திடீர் சாகசங்களுக்கும் பதிலளிக்க இருப்புக்கள் வடிவத்தில் போதுமான வீரர்களை இந்திய ராணுவம் கொண்டுள்ளது என்றும் வலியுறுத்தினார்.
“அனைத்து மோதல் புள்ளிகளிலும் படை நீக்கம் செய்யப்படுவதற்கு முன்னர் எந்தவொரு அமைதிப் பேச்சுவார்த்தையும் முடிவு பெற முடியாது என்பது எங்களுக்குத் தெளிவாகத் தெரியும். இந்தியாவும் சீனாவும் பல எல்லை ஒப்பந்தங்களில் கையெழுத்திட்டுள்ளன. அவை சீன இராணுவத்தால் ஒருதலைப்பட்சமாக மீறப்பட்டுள்ளன.” என்று அவர் கூறினார்.
வடக்கு எல்லையில் நிலைமை கட்டுப்பாட்டில் உள்ளது என்றும், சீனாவுடன் வரவிருக்கும் இராணுவப் பேச்சுவார்த்தைகள் 2020 ஏப்ரல் மாத நிலையை மீட்டெடுப்பதில் கவனம் செலுத்தும் என்றும் அவர் கூறினார்.
கிழக்கு லடாக்கிலுள்ள ஹாட் ஸ்பிரிங்ஸ், கோக்ரா மற்றும் டெப்சாங் போன்ற பகுதிகளில் நிலைப்பாட்டிற்கான தீர்மானத்தை எப்போது எதிர்பார்க்கலாம் என்ற கேள்விக்கு, இராணுவத் தலைவர் காலக்கெடுவைக் கணிப்பது கடினம் என்றார்.
