கொரோனா வைரஸ் பயத்தால் சமந்தா படப்பிடிப்புக்கு வர மறுத்ததாக தகவல் வெளியாகியிருக்கிறது. அவர் வர மறுத்ததால் தெலுங்கு படம் ஒன்றின் ஷூட்டிங் ஒத்தி வைக்கப்பட்டுள்ளதாம்.
தமிழ், தெலுங்கு படங்களில் நடித்து வருகிறார் சமந்தா. தமிழ் திரையுலகில் நயன்தாராவுக்கு அடுத்ததாக அதிக சம்பளம் வாங்கும் நடிகையாக இருக்கிறார் சமந்தா. அவர் படம் ஒன்றுக்கு ரூ. 3 கோடி சம்பளம் வாங்குகிறார்.
கொரோனாவின் இரணடாம் அலை மோசமாக இருக்கும் இந்த நேரத்தில் சமந்தா தன் குடும்பத்தாருடன் வீட்டிலேயே இருக்கிறார். இந்நிலையில் அவர் ஒப்புக் கொண்ட தெலுங்கு படம் ஒன்றின் ஷூட்டிங்கில் கலந்து கொள்ளுமாறு அழைத்தார்களாம்.
கொரோனா வைரஸ் பிரச்சனை மோசமாக இருக்கிறது. அதனால் தற்போதைக்கு நான் படப்பிடிப்புக்கு வர மாட்டேன் என சமந்தா கூறியதாக செய்திகள் வெளியாகியுள்ளது. இதையடுத்து அந்த படத்தின் ஷூட்டிங்கை ஒத்தி வைத்திருக்கிறார்களாம்.
கொரோனா பிரச்சனையால் பல படங்களின் ஷூட்டிங் நிறுத்தி வைக்கப்பட்டுள்ளது. கொரோனாவின் இரண்டாம் அலை தீவிரம் அடைவதற்கு முன்பு விக்னேஷ் சிவன் இயக்கத்தில் காத்து வாக்குல ரெண்டு காதல் படத்தில் நடித்து வந்தார் சமந்தா.
அந்த படத்தில் விஜய் சேதுபதியும், நயன்தாராவும் நடிக்கிறார்கள். ஒரு படத்தில் இரண்டு பெரிய ஹீரோயின்கள் சேர்ந்து நடித்தால் பிரச்சனை என்பார்கள். ஆனால் நயன்தாராவுடன் சேர்ந்து நடிப்பதில் மகிழ்ச்சியாக இருப்பதாக சமந்தா தெரிவித்துள்ளார்.
நானும் ரௌடி தான் வெற்றி கூட்டணி மீண்டும் சேர்ந்திருப்பதால் காத்து வாக்குல ரெண்டு காதல் படத்தின் மீது அதிக எதிர்பார்ப்பு ஏற்பட்டிருக்கிறது. முதல்கட்ட படப்பிடிப்பை ஹைதராபாத்திலும், அடுத்தகட்ட படப்பிடிப்பை சென்னையிலும் நடத்தினார் விக்னேஷ் சிவன்.
அதன் பிறகு படம் குறித்த எந்த அப்டேட்டும் இல்லை. நயன்தாரா தற்போது ரஜினிகாந்தின் அண்ணாத்த படத்தில் நடித்து வருகிறார். படப்பிடிப்பு ஹைதராபாத்தில் இருக்கும் ராமோஜிராவ் ஃபிலிம் சிட்டியில் நடைபெற்று வருகிறது. இன்னும் ஓரிரு நாட்களில் படப்பிடிப்பு முடிந்துவிடும் என்று கூறப்படுகிறது.
கொரோனா பயத்தால் படப்பிடிப்பில் கலந்து கொள்ள முடியாது என்று கூறியிருக்கும் முதல் பிரபலம் சமந்தா கிடையாது. முன்னதாக ஜெகபதி பாபுவும் படப்பிடிப்புக்கு வர மறுத்தார் என்பது குறிப்பிடத்தக்கது.
