தென்னாப்பிரிக்க வேகப்பந்து வீச்சாளர் ஆன்ரிக் நோர்க்கியா, தனது 16 வயதில் மகேந்திரசிங் தோனிக்கு வலைப்பயிற்சியில் பந்துவீசியிருக்கிறார். அப்போது நடைபெற்ற சம்பவம் குறித்து தற்போது மனம் திறந்துள்ளார்.
2010ஆம் ஆண்டு நடைபெற்ற சாம்பியன்ஸ் லீக் தொடரின் இறுதிப் போட்டியில் சென்னை சூப்பர் கிங்ஸ் மற்றும் தென்னாப்பிரிக்காவின் வாரியர்ஸ் அணிகள் மோதின.
இப்போட்டியில் பங்கேற்பதற்காக சிஎஸ்கே வரைபயிற்சி மேற்கொண்டபோது, 16 வயது மதிக்கத்தக்க ஆன்ரிக் நோர்க்கியா நெட் பௌலராக இங்கு இருந்தார். அப்போது தோனிக்கு பந்துவீசும் வாய்ப்பு நோர்க்கியாவுக்கு கிடைத்தது. அந்த சமயத்தில் நடந்த நிகழ்வுகளை தற்போது பகிர்ந்துள்ளார்.
பத்திரிகை ஒன்றுக்குப் பேட்டிகொடுத்த நோர்க்கியா, “நான் அப்போது பெரிய பையன் கிடையாது. 16 வயதுதான் என நினைக்கிறேன். இப்போது வேகமாகப் பந்துவீசுவது போல் அப்போது வீசவில்லை. குறைந்த வேகத்தில்தான் பந்துவீசி வந்தேன். அந்த சமயத்தில் சிஎஸ்கேவுக்கு நெட் பௌலராக செயல்பட வாய்ப்பு கிடைத்தது. குறிப்பாக தோனிக்கு” எனத் தெரிவித்தார்.
மேலும் பேசிய அவர், “தோனிதான் பேட் செய்கிறார் என நான் உணரவில்லை. நான் எப்படிப் பந்துவீசினாலும் புட் ஒர்க் இல்லாமல் சாதாரணமாகப் பந்துகளை எதிர்கொண்டார். நானும் தொடர்ந்து பந்துவீசினேன். அவர் நின்ற இடத்தைவிட்டு நகராமல் பந்துகளை எதிர்கொண்டார். அதன்பிறகு பேட்ஸ்மேனை சரியாக பார்த்தப் பிறகுதான், அவர் தோனி என்பதை நான் அடையாளம் கண்டுகொண்டேன். உண்மையைச் சொல்ல வேண்டும் என்றால், அவருக்குப் பேட்டில் பண்ண தெரியாது என்று நினைத்தேன். அடையாளம் கண்ட பிறகுதான் அவர் பெரிய பேட்ஸ்மேன் என்பதே தெரிய வந்தது” எனக் கூறினார்.
ஆன்ரிக் நோர்க்கியாவுக்கு தற்போது 27 வயதாகிறது. கடந்த ஆண்டு டெல்லி கேபிடல்ஸ் அணி இறுதிப் போட்டிக்கு முன்னேறியதற்கு இவர் வீழ்த்திய 22 விக்கெட்களும்தான் முக்கிய காரணம்.
2010ஆம் ஆண்டு இறுதிப் போட்டியில் சிஎஸ்கே மற்றும் தென்னாப்பிரிக்காவின் வாரியர்ஸ் அணிகள் மோதிய நிலையில் சிஎஸ்கே 8 விக்கெட்கள் வித்தியாசத்தில் அபார வெற்றிபெற்றது.
அடுத்து 2014ஆம் ஆண்டு நடைபெற்ற சாம்பியன்ஸ் லீக் டி20 தொடரிலும் சிஎஸ்கே கோப்பை வென்றது. 2011, 2013ஆம் ஆண்டுகளில் மும்பை இந்தியன்ஸ் அணி கோப்பை வென்றது என்பது குறிப்பிடத்தக்கது.
