தமிழ் மக்கள், கலாச்சாரம் மீது அதிக மரியாதை உள்ளது: ‘தி பேமிலி மேன் 2’ சர்ச்சை பற்றி இயக்குனர்கள் ராஜ் மற்றும் டிகே பேட்டி
சமந்தா, மனோஜ் பாஜ்பாய் நடித்து உள்ள தி பேமிலி மேன் வெப் சீரிஸின் ட்ரெய்லர் மே 19ம் தேதி வெளியானது. 2019ல் வெளிவந்த முதல் சீசன் பெரிய ஹிட் என்பதால் இரண்டாவது சீசன் மீது அதிக எதிர்பார்ப்பு இருக்கிறது. ட்ரெய்லருக்கு கிடைத்திருக்கும் வரவேற்பை பார்க்கும்போதே இரண்டாவது சீஸனும் முதல் சீசனை விட அதிகமான வரவேற்பை பெறும் என எதிர்பார்க்கலாம். வரும் ஜூன் 4ம் தேதி இந்த வெப் சீரிஸ் அமேசான் ப்ரைமில் வெளியாகிறது.
தற்போது youtube ட்ரெண்டிங்கில் இருந்து வருகிறது தி பேமிலி மேன் 2 ட்ரெய்லர். இந்த பிரம்மாண்ட ரெஸ்பான்ஸ் பற்றி இந்த தொடரின் இயக்குனர்கள் ராஜ் மற்றும் டிகே இருவரும் நம்மிடம் மனம் திறந்து பேசினார்கள்.
240 நாடுகளில் இருந்து ரசிகர்கள் இதற்காக காத்திருக்கிறார்கள், இந்த ஷோ பற்றி என்ன சொல்வீர்கள்?
நாங்கள் இந்த சீரிஸை அதிகம் விரும்பி எடுத்திருக்கிறோம். வருடக்கணக்கில் கடின உழைப்பு, குறிப்பாக இந்த பெருந்தொற்று காலத்தில் அதிகம் உழைத்து தான் இந்த 9 பகுதி டிராமா சீரிஸை உருவாக்கி இருக்கிறோம்.
முதல் சீசனின் தொடர்ச்சியாக ஸ்ரீகாந்த் திவாரியை சுற்றி தான் கதை அமைக்கப்பட்டு உள்ளது. ஒரு பெரிய ஏஜென்சியில் சிறந்த உளவாளியாக பணியாற்றினாலும், அவர் இன்னும் மிடில் கிளாஸ் அப்பா மற்றும் கணவராக இருப்பதை நினைத்து எப்போதும் குழப்பத்திலேயே இருப்பவர். இந்த சீசனில் அவருக்கு வரும் பிரச்சனைகள் இன்னும் பெரியதாக தான் இருக்கும்.
இந்தியாவில் இருக்கும் பல்வேறு மொழிகள் மற்றும் கலாச்சாரங்களை பிரதிபலிக்கும் விதமாக இந்த சீசன் இருக்கும். இது கண்டிப்பாக ஒட்டுமொத்த இந்தியா முழுவதும் இருக்கும் ரசிகர்களுக்கானது தான். இதில் ஒரு தைரியமான ரோலில் நடித்ததன் மூலம் சமந்தா அக்கினேனியும் டிஜிட்டலில் களமிறங்கி இருக்கிறார்.
இந்த புதிய சீசன் வடஇந்தியா மற்றும் தென்னிந்தியாவை ஒன்றாக காட்டும். முதல் சீசன் கதாபாத்திரங்களோடு தமிழ் சினிமாவில் பாப்புலராக இருக்கும் பல பிரபல நடிகர்கள் இந்த 2ம் சீசனில் நடித்துள்ளனர். மிகவும் கடுமையான சண்டை காட்சிகள் மற்றும் பாடல்கள் மூலமாக இந்த சிக்கலான கதாபாத்திரங்கள் மிகவும் உணர்வுபூர்வமாக காட்டப்பட்டுள்ளது.
இரண்டாம் சீசன் மும்பை, தமிழ்நாடு, லண்டன் மற்றும் பிரான்சில் நடப்பது போல இருக்கும். கதையில் சின்ன சின்ன விஷயங்களுக்காக கூட அதிகம் மெனகெட்டு பணியாற்றினோம். அதற்காக பல subject-matter experts உடன் கலந்து பேசினோம்.
சீரிஸுக்கு பெரிய பலமாக அமைந்தது நடிகர்கள் அர்ப்பணிப்பு மற்றும் குழுவினரின் ஒத்துழைப்பு தான். மனோஜ் பாஜ்பாய் அந்த கதாபாத்திரத்திலேயே மூழ்கிவிட்டார். சமந்தா மொழியை சரியாக உச்சரிப்பதற்காக க்ளாஸ் எடுத்துக்கொண்டார், மார்ஷியல் ஆர்ட்ஸ் கற்றுக்கொண்டு அனைத்து சண்டை காட்சிகளிலும் அவரே நடித்தார்.
முதல் சீசனுக்கு கிடைத்த அன்பு மற்றும் வரவேற்பு எங்களுக்கு மகிழ்ச்சியாக இருந்தது. அதிர்ஷ்டவசமாக நாங்கள் முதல் சீசன் ரிலீசுக்கு முன்பே இரண்டாம் சீசன் கதையை எழுதி முடித்து ஷூட்டிங் செய்ய ஆரம்பித்துவிட்டோம். அதனால் ரசிகர்கள் கொடுத்த வரவேற்பு எங்களுக்கு பிரஷர் அதிகரிக்க காரணமாகவில்லை. இருப்பினும் நாங்கள் ஆடியன்ஸின் கருத்துக்களை கேட்டு ஒரு சில மாற்றங்களை மட்டும் செய்தோம். ரசிகர்கள் எதை விரும்புகிறார்கள் என்பது புரிந்தது. அதனால் அதற்கு தகுந்தாற்போல இரண்டாவது சீசனை எடுத்தோம்.
ட்ரெய்லரில் வரும் சில ஷாட்களை மட்டும் பார்த்துவிட்டு பல்வேறு விஷயங்களை யூகித்துகொள்கிறார்கள். இதில் நடித்த நடிகர்கள் மற்றும் பணியாற்றிய குழுவில் இருக்கும் முக்கியமான நபர்கள் தமிழர்கள். நாங்கள் தமிழ் மக்களின் செண்டிமெண்ட் மற்றும் கலாச்சாரம் பற்றி அதிகம் தெரிந்துகொண்டு தான் இதை எடுத்தோம். தமிழ் மக்கள் மீது எங்களுக்கு அதிகம் அன்பு மற்றும் மரியாதை இருக்கிறது.
இந்த ஷோவில் எங்களது பல வருட உழைப்பை போட்டிருக்கிறோம். முதல் சீசனை போலவே மிகவும் உணர்வுபூர்வமான, ரசிக்கும்படியான கதையை அதிகம் உழைத்து உருவாக்கி இருக்கிறோம். காத்திருந்து ஷோ ரிலீஸ் ஆகும் போது பாருங்கள். அதை நிச்சயம் நீங்கள் பாராட்டுவீர்கள்.
இவ்வாறு ராஜ் மற்றும் டிகே கூறியுள்ளனர்.
