நாடு தழுவிய ஒன்லைன் போக்குவரத்து அபராதம் செலுத்தும் முறையை செயல்படுத்த அமைச்சரவை ஒப்புதல் அளித்துள்ளதாக போக்குவரத்து மற்றும் நெடுஞ்சாலைகள் அமைச்சர் பிமல் ரத்நாயக்க தெரிவித்தார்.
அதிவேக நெடுஞ்சாலைகளில் பயணிக்கும் வாகனங்களுக்கு கட்டாய சீட் பெல்ட் பயன்பாடு குறித்த பொது விழிப்புணர்வு திட்டத்தைத் தொடர்ந்து, கொட்டாவ அதிவேக நெடுஞ்சாலை நுழைவாயிலுக்கு அருகில் நடைபெற்ற ஊடகவியலாளர் சந்திப்பின் போது அவர் இந்த அறிக்கையை வெளியிட்டார்.
“இந்த முன்மொழிவை அமைச்சரவை இன்று அங்கீகரித்தது. தற்போது, குருநாகல் மற்றும் அனுராதபுரம் இடையே மட்டுமே ஒன்லைன் அபராதம் செலுத்தும் முறை உள்ளது. இப்போது, அனைத்து காவல் பிரிவுகளுக்கும் மொபைல் சாதனங்களை வழங்குகிறோம், இதனால் இந்த ஆண்டு முதல், போக்குவரத்து அபராதங்களை மொபைல் போன்கள் மூலம் எங்கிருந்தும் செலுத்த முடியும்,” என்று அமைச்சர் கூறினார்.
அரசாங்கம் அபராதம் செலுத்துவதை எளிதாக்கும் அதே வேளையில், உண்மையான நோக்கம் வீதிப் பாதுகாப்புதான் என்று அவர் வலியுறுத்தினார். “அபராதம் செலுத்துவதற்குப் பதிலாக, அனைவரும் கவனமாக வாகனம் ஓட்டவும், சீட் பெல்ட் அணியவும், மீறல்களைத் தவிர்க்கவும் நாங்கள் கேட்டுக்கொள்கிறோம். எங்கள் முக்கிய செய்தி எளிமையானது, பாதுகாப்பாக பயணம் செய்யுங்கள்,” என்று அவர் மேலும் கூறினார்.
