புதிய ஜனநாயக முன்னணி மற்றும் ஐக்கிய மக்கள் சக்தி ஆகியவற்றின் தேசிய பட்டியல் பாராளுமன்ற உறுப்பினர் பதவிகளுக்கான உறுப்பினர்களை நியமிப்பது இரண்டு அரசியல் கட்சி கூட்டணிகளுக்குள் உள்ளக நெருக்கடியாக அதிகரித்துள்ளது.
இரு கட்சிகளினதும் தேசியப் பட்டியல்களில் உள்ள வரையறுக்கப்பட்ட ஆசனங்களைப் பிரதிநிதித்துவப்படுத்தி பாராளுமன்ற உறுப்பினர்களாக பாராளுமன்றத்திற்குள் நுழைவதற்கு பெருமளவிலானவர்கள் விரும்புவதால் இந்த உள் நெருக்கடி அதிகரித்துள்ளது. புதிய ஜனநாயக முன்னணி இரண்டு ஆசனங்களையும், ஐக்கிய மக்கள் சக்தி 5 ஆசனங்களையும் தேசிய பட்டியலிலிருந்து பெற்று தேர்தல்கள் ஆணைக்குழுவிற்கு பாராளுமன்ற உறுப்பினர்களாக நியமிக்கப்பட வேண்டும்.
2024 ஆம் ஆண்டு பொதுத் தேர்தலில் எரிவாயு சிலிண்டர் சின்னத்தில் போட்டியிட்ட தேசிய ஜனநாயக முன்னணியின் சார்பில் முன்னாள் அமைச்சர் ரவி கருணாநாயக்கவின் பெயர் தேசியப் பட்டியல் பாராளுமன்ற உறுப்பினர் பதவிக்கு தேசிய ஜனநாயக முன்னணியின் பொதுச் செயலாளரால் பரிந்துரைக்கப்பட்டதையடுத்து சர்ச்சைகள் எழுந்தன. தேசிய ஜனநாயக முன்னணியின் சார்பில் பாராளுமன்றத்திற்குள் நுழையும் இரண்டு பாராளுமன்ற உறுப்பினர்களில் ஒருவராக ரவி கருணாநாயக்கவின் பெயரை தேர்தல் ஆணைக்குழு வர்த்தமானி மூலம் திங்கட்கிழமை (18) இரவு வெளியிடப்பட்டது.
தேசிய ஜனநாயக முன்னணியின் தேசியப் பட்டியலில் இருந்து ரவி கருணாநாயக்கவை பாராளுமன்ற உறுப்பினராக நியமித்தமை, தேசிய ஜனநாயக முன்னணியில் போட்டியிட்ட ஏனைய கட்சிகளின் அங்கீகாரம் இன்றி மேற்கொள்ளப்பட்டுள்ளது.
ஆனால், ரவி கருணாநாயக்கவின் பெயர் தேசியப் பட்டியல் நாடாளுமன்ற உறுப்பினர் பதவிக்கு அவரது அனுமதியின்றி தன்னிச்சையாக முன்வைக்கப்பட்டதாக முன்னாள் ஜனாதிபதி ரணில் விக்கிரமசிங்க தேசிய ஜனநாயக முன்னணியின் தேசியப் பட்டியல் நாடாளுமன்ற உறுப்பினர்களுக்கு அறிவித்துள்ளார்.
இதற்கிணங்க, தேசிய ஜனநாயக முன்னணியில் இருந்து ரவி கருணாநாயக்கவை தேசியபபட்டியலில் நியமிப்பது தொடர்பான பிரச்சினை தொடர்பில் கலந்துரையாடுவதற்காக முன்னாள் ஜனாதிபதி ரணில் விக்ரமசிங்க உள்ளிட்ட தேசிய ஜனநாயக முன்னணியின் பங்குதாரர்கள் நேற்று (19) காலை கொழும்பில் அவரது உத்தியோகபூர்வ இல்லத்தில் கூடினர்.
தேசிய ஜனநாயக முன்னணி கூட்டணியில் உள்ள அசாத் சாலி, ரவி கருணாநாயக்கவின் வீடு முற்றுகையிடப்பட்டு, இந்த முடிவை மாற்றியமைக்க முயற்சிகள் மேற்கொள்ளப்பட வேண்டும் என்று கூறினார். தேசிய ஜனநாயக முன்னணி கூட்டணியின் கீழ் ஐக்கிய தேசியக் கட்சியை பிரதிநிதித்துவப்படுத்தும் வஜிர அபேவர்தன, திங்கட்கிழமை (18) ஊடகவியலாளர் மாநாட்டிற்கு அழைப்பு விடுத்து, ரவி கருணாநாயக்கவை தேசியப் பட்டியல் பாராளுமன்ற உறுப்பினராக நியமித்தது சட்டவிரோதமானது என்றும், தமது கட்சியைக் கலந்தாலோசிக்காமல் மேற்கொள்ளப்பட்டுள்ளது என்றும் தெரிவித்தார். இரண்டு தேசியப்பட்டியல் ஆசனங்களுக்கு ஐக்கிய தேசியக் கட்சியிலிருந்து தலதா அத்துகோரளவையும், ஸ்ரீலங்கா பொதுஜன பெரமுனவின் சார்பில் காஞ்சன விஜேசேகரவையும் நியமிக்க முன்மொழியப்பட்டது. பாராளுமன்ற உறுப்பினராக ரவி கருணாநாயக்கவின் பெயர் தேசியப்பட்டியலில் சேர்க்கப்பட்டு தேசிய ஜனநாயக முன்னணியின் பொதுச் செயலாளர் ஷ்யாமிலா பெரேராவினால் வர்த்தமானியில் வெளியிடுவதற்கு தேர்தல் ஆணையத்திற்கு அனுப்பியமை தொடர்பில் தேசிய ஜனநாயக முன்னணியின் பல கட்சிகள் எதிர்ப்பு தெரிவித்துள்ளன.
இதேவேளை, நேற்று காலை கொழும்பில் உள்ள ரவி கருணாநாயக்கவின் இல்லத்திற்கு முன்பாக பலத்த பொலிஸ் பாதுகாப்பு போடப்பட்டிருந்தது.
சர்ச்சைக்குரிய ரவி கருணாநாயக்கவை தேசியப் பட்டியல் நாடாளுமன்ற உறுப்பினராக நியமித்தமை தொடர்பில் கொழும்பிலுள்ள தேசிய ஜனநாயக முன்னணியின் அலுவலகத்தில் நேற்றுக் காலை நடைபெற்ற கலந்துரையாடலின் பின்னர், தேசியப் பட்டியல் நாடாளுமன்ற உறுப்பினர் பதவிக்கு முன்னாள் அமைச்சர் காஞ்சன விஜேசேகரவின் பெயரை முன்மொழிந்ததாக தேசிய ஜனநாயக முன்னணியின் முன்னாள் நாடாளுமன்ற உறுப்பினர்கள் பலர் ஊடகங்களுக்குத் தெரிவித்தனர்.
இதற்கிடையில், ஐக்கிய மக்கள் சக்தி இன்னும் நான்கு பாராளுமன்ற உறுப்பினர்களை தேசிய பட்டியலிலிருந்து நியமிக்கவில்லை. தேர்தல்கள் ஆணைக்குழு நேற்று ஐக்கிய மக்கள் சக்தியில் இருந்து பாராளுமன்றத்திற்கு வந்த தேசிய பட்டியல் பாராளுமன்ற உறுப்பினர்களில் ஒருவராக ரஞ்சித் மத்தும பண்டாரவின் பெயரை வர்த்தமானியில் வெளியிட்டது.
இந்த வருட பொதுத் தேர்தலில் பல கட்சிகள் ஐக்கிய மக்கள் சக்தி உடன் கூட்டணி வைத்து போட்டியிட்டதுடன், அதில் பல கட்சிகள் தேசியப்பட்டியல் பாராளுமன்ற உறுப்பினர் பதவிகளை கோரியதால், ஐக்கிய மக்கள் சக்தி பாராளுமன்ற பிரதிநிதிகளை நியமனம் செய்வதில் நெருக்கடியை எதிர்கொண்டுள்ளது.
இதுவரை தமது கட்சிகளைச் சேர்ந்த எம்.பி.க்களின் பெயர்கள் அனைத்தையும் தேர்தல் ஆணைக்குழுவிடம் சமர்ப்பிக்காத அரசியல் கட்சிகள் 2024 ஆம் ஆண்டு நவம்பர் 22 ஆம் திகதி அல்லது அதற்கு முன்னர் சமர்ப்பிக்க வேண்டும் என தேர்தல்கள் ஆணையாளர் நாயகம் சமன் ஸ்ரீ ரத்நாயக்க தெரிவித்துள்ளார்.
