தியாக தீபம் திலீபனின் உருவப்படம் தாங்கிய ஊர்தி வவுனியாவில் பயணிப்பதற்கு தடை கோரி பொலிஸார் தாக்கல் செய்திருந்த மனுவை நீதிமன்றம் நிராகரித்துள்ளது.
அத்துடன், குழப்பங்கள் ஏற்படாத வகையில் பொலிஸ் பாதுகாப்பை வழங்குமாறு இன்று (18) நீதிமன்றம் உத்தரவு பிறப்பித்துள்ளது.
தியாக தீபம் திலீபனின் 36வது ஆண்டு நிறைவை முன்னிட்டு தமிழ் தேசிய மக்கள் முன்னணியால் ”திலீபன் வழியில் வருகின்றோம்” என்னும் திலீபனின் உருவப்படம் தாங்கிய ஊர்திப் பவனி பொத்துவிலில் ஆரம்பிக்கப்பட்டு, திருகோணமலை நகருக்குள் நுழைய முற்பட்ட போது, சிங்கள காடையர்களால் தாக்கப்பட்டது.
பின்னர் இன்று அதிகாலை முல்லைத்தீவை வந்தடைந்தது.
இந்த நிலையில், ஊர்திப் பவனி வவுனியாவில் இடம்பெற்றால் பொது அமைதிக்கு பங்கம் ஏற்படுவதுடன், இன நல்லுறவு சீர்குலையும் என இருவர் வவுனியா பொலிசில் முறைப்பாடு செய்திருந்தனர்.
அவர்களின் முறைப்பாட்டுக்கு அமைய இந்த ஊர்திப் பவனிக்கு பொலிசார் வவுனியா நீதிமன்றில் தடை உத்தரவு கோரியிருந்தனர்.
அதனை கவனத்தில் எடுத்த மன்று, இறந்தவர்களை நினைவு கூரும் உரிமை அனைவருக்கும் உள்ளது என்பதை சுட்டிக் காட்டி, பொலிசாரின் கோரிக்கையை நிராகரித்ததுடன், இன முரண்பாடுகள் மற்றும் குழப்பங்கள் ஏற்படாத வகையில் பாதுகாப்பு நடவடிக்கைகளை மேற்கொள்ளுமாறு பொலிசாருக்கு உத்தரவு பிறப்பித்துள்ளது.
