இந்தியாவின் முன்னாள் தொடக்க ஆட்டக்காரர் வீரேந்திர சேவாக், ஆசியாவின் மிகப் பெரிய நடு வரிசை ஆட்டக்காரர் என்று பாகிஸ்தானின் இன்சமாம் உல் ஹக்கையே விதந்தோதுகிறார். இதன் மூலம் குமார் சங்கக்கார, மஹேல ஜயவர்த்தன, ராகுல் திராவிட் போன்றோரை அவர் கண்டு கொள்ளவில்லை என்ற விமர்சனங்கள் எழுந்துள்ளன.
அனைத்து வடிவங்களிலும் சிறந்த தொடக்க ஆட்டக்காரர்களில் ஒருவரான சேவாக், புகழ்பெற்ற சச்சின் டெண்டுல்கருக்குப் பிறகு ஆசியா முழுவதும் மிக உயர்ந்த நடு வரிசை ஆட்டக்காரர் பாகிஸ்தானின் முன்னாள் கப்டன் இன்சமாம்-உல்-ஹக் தான் என்று கூறினார்.
அதாவது சச்சினை யாரோடும் ஒப்பிட முடியாது, இவர்கள் அனைவருக்கும் மேல் தட்டில் இருக்கிறார் சச்சின் என்கிறார் சேவாக். அவரை விடுத்து அதற்கும் கீழ்த்தட்டில் உள்ளவர்களையே ஒப்பிடுகிறார் சேவாக். இன்சமாம் அவரது சகாப்தத்தின் சிறந்த துடுப்பாட்டக்காரர்களில் ஒருவராக இருந்தார் மேலும் இன்சமாம் உல் ஹக்கின் உயர்ந்த சாதனைகள் அதற்கு சான்றாகும் என்கிறார். இன்சமாம் உல் ஹக் 378 ஒருநாள் போட்டிகளில் 11739 ரன்களும், 120 டெஸ்ட் போட்டிகளில் 8830 ரன்களும் எடுத்துள்ளார்.
இந்நிலையில் தான் கண்டதிலேயே, நான் பார்த்ததிலே அவர் ஒருவரைத்தான் நடு வரிசை ஆட்டக்காரர் என்பேன் என்கிறார் சேவாக்:
எல்லோரும் சச்சின் டெண்டுல்கரைக் குறிப்பிடுகிறார்கள். என்னை பொறுத்தவரையில் சிறந்த நடு வரிசை ஆட்டக்காரர் என்றால் அது இன்சமாம் உல் ஹக்தான். சச்சினுடன் யாரையும் ஒப்பிடாதீர்கள், அவர் வேறு ஒரு மட்டத்தில் இருக்கிறார். எனவே அவரை இதில் ஒப்பிட முடியாது. ஆனால் இந்தியா, பாகிஸ்தான், இலங்கை கிரிக்கெட்டைப் பொறுத்தவரை இன்சமாம் உல் ஹக்தான் மிகச்சிறந்த நடு வரிசை ஆட்டக்காரர். இன்சமாம் உல் ஹக்கை விட சிறந்த நடு வரிசை ஆட்டக்காரரை நான் கண்டதில்லை. அவரால் 10 ஓவர்களில் நடுவரிசையில் இறங்கி 80 ரன்களை எடுக்க முடியும்.
2003-04 காலக்கட்டங்களில் ஓவருக்கு 8 ரன்களை எடுக்க முடியும் என்பார் இன்சமாம். கவலைப்படாதே ஸ்கோர் செய்யலாம் 10 ஓவர்களில் 80 ரன்கள் ஒன்றுமில்லை என்பார் இன்சமாம். மற்ற் அணிகள் பதற்றமடையும் ஆனால் இன்சமாம் உல் ஹக் மிஸ்டர் கூல்.
2005இல் டனிஷ் கனேரியா எனக்கு ரவுண்ட் த விக்கெட்டில் வீசினார். என் வேகத்தைத் தடுக்க முயன்றனர். லோங் ஓனில் பீல்டரை வைத்திருந்தனர். நான் ஒன்றிரண்டு ஓவர்களை தடுப்பு முறையில் ஆடினேன். அப்போது இன்சமாமிடம் கூறினேன், ‘இன்ஜி பாய், எனக்கும் கால் வலிக்கிறது, லோங் ஓன் பீல்டரை உள்வட்டத்திற்குள் அழையுங்கள்’ என்றேன்.
அதற்கு இன்சமாம் கேட்டார், ‘சரி அவரை உள்ளே கொண்டு வந்தால் என்ன செய்வாய்?’ என்றார், நான் சிக்ஸ் அடிப்பேன் என்றேன். அவர் ஜோக் அடிக்காதே என்றார், பீல்டரை பின்னால் நிறுத்தினால் நான் சிக்சர் அடிக்க மாட்டேன் என்றேன். முன்னால் கொண்டு வாருங்கள். நான் சிக்சர் அடிக்கவில்லை எனில் பின்னால் கொண்டு போங்கள் என்றேன். அவர் இந்தச் சவாலை ஏற்றுக் கொண்டார். பீல்டரை முன்னால் கொண்டு வந்தார், கனேரியா கூக்ளி வீசினார். நான் லோங் ஓனில் சிக்ஸ் அடித்தேன். கனேரியா கடுப்பாகி விட்டார், எதற்கு பீல்டரை முன்னால் கொண்டு வந்தாய் என்று இன்சமாமிடம் கோபமாகக் கேட்டார். ஆனால் இன்சமாம், நீ பேசாமல் பந்தைப் போடு, இங்கு என்ன நடக்கிறது என்பது உனக்குத் தெரியாது என்று கனேரியாவிடம் கூறினார்.
இவ்வாறு கூறினார் சேவாக்.
இதேவேளை, சேவாக்கின் கருத்தை ஒரு தரமான விமர்சனக்கருத்தாக கொள்ளலாமா என்றும் சிலர் கேள்வியெழுப்பி வருகிறார்கள். ஏனெனில், சில காலத்தின் முன்னர் ஓவ் ஸ்பின்னர்கள் பந்துவீச்சாளர்களேயில்லையென சேவாக் கூறியிருந்தார். ஆனால் அண்மைய நேர்காணல் ஒன்றில் தன் வாழ்நாளில் முத்தையா முரளிதரனின் பந்துவீச்சை சந்திக்கவே அச்சமடைந்ததாகவும், அவரது பந்துவீச்சை கணித்து ஆட பல வருடங்கள் தேவைப்பட்டது என்றும் கூறியிருந்தார்.
எவ்வாறாயினும், நவீன கிரிக்கெட்டின் நல்ல ஆட்டக்காரர்களில் இன்சமாமும் ஒருவரே.
