மீன்பிடிப் படகு வாங்குவதற்காக 29 வயதுடைய இலங்கை இளைஞர் ஒருவருக்கு 25,000 யூரோக்களை வழங்கிய நிலையில், அவர் தன்னைத் தாக்கியதாக 40 வயதுடைய ஜெர்மன் நாட்டுப் பெண் ஒருவர் ரத்கம பொலிஸில் முறைப்பாடு செய்துள்ளார்.
பொலிஸாரின் தகவல்படி, குறித்த பெண் முன்னதாக இலங்கைக்கு வந்திருந்தபோது, பூஸா – பிட்டிவெல்ல பகுதியைச் சேர்ந்த இந்த இளைஞருடன் காதல் உறவை ஏற்படுத்திக்கொண்டுள்ளார்.
அவர்களது உறவின்போது, மீன்பிடிப் படகு வாங்குவதற்காக அந்தப் பெண் அவருக்கு 25,000 யூரோக்களை வழங்கியதாகக் கூறப்படுகிறது.
அதன்பிறகு மீண்டும் இலங்கைக்கு வந்த அந்தப் பெண், பூஸாவில் உள்ள ஹோட்டல் ஒன்றில் தங்கியிருந்தபோதே இந்தத் தாக்குதல் சம்பவம் இடம்பெற்றுள்ளது.
அந்த இளைஞர் மேலும் பணம் கேட்டு வற்புறுத்தியதுடன், மரக்கட்டையால் தன்னைத் தாக்கியதாகவும், தனது கைப்பேசியைச் சேதப்படுத்தியதாகவும் அந்தப் பெண் தெரிவித்துள்ளார்.
தான் வழங்கிய 25,000 யூரோக்களை மீட்டுத் தருமாறு அவர் பொலிஸாரிடம் கோரிக்கை விடுத்துள்ளார்.
சந்தேக நபரை கைது செய்வதற்கான மேலதிக விசாரணைகளை ரத்கம பொலிஸார் மேற்கொண்டு வருகின்றனர்.
