2012 ஆம் ஆண்டு பொலிஸ் காவலில் இருந்தபோது சித்திரவதை செய்யப்பட்ட ஒரு இளைஞனுக்கு தனிப்பட்ட முறையில் இழப்பீடு வழங்க தம்புத்தேகம காவல் நிலையத்தைச் சேர்ந்த ஆறு முன்னாள் காவல்துறை உத்தியோகத்தர்களுக்கு உயர் நீதிமன்றம் நேற்று உத்தரவிட்டது.
ஓகஸ்ட் 2012 இல் கைது செய்யப்பட்டபோது 27 வயதுடைய சுசில் பிரியங்கர செனவிரத்ன ஒரு தகவல் தொடர்பு மையத்தில் பணியாற்றினார்.
ஒவ்வொரு உத்தியேகத்தர்களும் மூன்று மாதங்களுக்குள் தங்கள் சொந்த நிதியில் இருந்து ரூ. 200,000 செலுத்த வேண்டும்.
பொலிஸ் கான்ஸ்டபிள்களான பிரசன்ன கருணாஜீவ, எம்.டி.ஜகத்பால, எம்.ஜி.ஏ.டி.பி.அபேசிங்க, உபாலி ஹேரத், பி.கே.ஜி.எஸ்.பி.பிரேமதுங்க மற்றும் சார்ஜென்ட் கருணாதிலக்க ஆகியோர் பொறுப்புக்கூறப்பட்டவர்கள் ஆவர். நீதிபதிகள் எஸ்.துரைராஜா மற்றும் யசந்த கோடகொட ஆகியோரின் ஒப்புதலுடன் தீர்ப்பை வழங்கிய நீதிபதி பிரியந்த பெர்னாண்டோ, அரசியலமைப்பின் பல விதிகளின் கீழ் செனவிரத்னவின் அடிப்படை உரிமைகளை பொலிஸ் உத்தியோகத்தர்கள் மீறியதாகக் கண்டறிந்தார், இதில் பிரிவு 11 (சித்திரவதையிலிருந்து பாதுகாப்பு), பிரிவு 12(1) (சட்டத்தின் முன் சமத்துவம்), பிரிவு 13(1) (தன்னிச்சையான கைதுகளிலிருந்து சுதந்திரம்), மற்றும் பிரிவு 13(5) (குற்றமற்றவர் என்று ஊகித்தல்) ஆகியவை அடங்கும். மேலும், குற்றவியல் விசாரணையைத் தொடங்கி, 1994 ஆம் ஆண்டு 22 ஆம் எண் சித்திரவதை மற்றும் பிற கொடூரமான, மனிதாபிமானமற்ற அல்லது இழிவாக நடத்துதல் அல்லது தண்டனைக்கு எதிரான மாநாட்டுச் சட்டத்தின் கீழ் குற்றச்சாட்டுகளை பரிசீலிக்குமாறு சட்டமா அதிபருக்கு நீதிமன்றம் உத்தரவிட்டது.
தம்புத்தேகம காவல்துறைக்கு எதிரான ஆர்ப்பாட்ட ஊர்வலத்தில் மனுதாரர் ஈடுபட்டதாக தவறாக கைது செய்யப்பட்டதாக நீதிமன்றத்தில் குற்றம்சாட்டப்பட்டது. எனினும், அவர் ஆர்ப்பாட்டத்தில் கலந்துகொள்ளவில்லை, அவர் தனது வணிக வளாகத்தில் முழுவதும் இருந்ததாகக் கூறினாலும், ஓகஸ்ட் 2, 2012 அன்று சட்டவிரோதமாக ஒன்றுகூடிய குற்றச்சாட்டின் பேரில் அவர் கைது செய்யப்பட்டார்.
அவர் தடுத்து வைக்கப்பட்டிருந்தபோது, கடுமையான உடல் ரீதியான துஷ்பிரயோகத்திற்கு ஆளானார். மோட்டார் சைக்கிள் ஹெல்மெட்டால் தலை மற்றும் காதில் பலமுறை தாக்கப்பட்டதாகவும், அவரது கால்கள் மற்றும் உடலில் உதைக்கப்பட்டதாகவும், காதில் இருந்து இரத்தம் வழிந்ததாகவும் அவர் சாட்சியமளித்தார்.
