கடந்த மே மாதம் 9ஆம் திகதி இடம்பெற்ற கலவரத்தின் பின்னர் இடமாற்றம் செய்யப்பட்ட ஐந்து பொலிஸ் பொறுப்பதிகாரிகளுக்கு முன்னைய பணிகளுக்கு இணையான பொலிஸ் நிலையங்களில் பதவிகள் வழங்கப்படவுள்ளதாக பொலிஸ் மா அதிபர் தேசபந்து தென்னகோன் உயர் நீதிமன்றத்திற்கு நேற்று (5) அறிவித்துள்ளார்.
நீதிமன்றத்திற்கு உறுதியளித்தவாறு பணி மூப்பு அடிப்படையில் பொலிஸ் நிலையங்களை வழங்காமல் நீதிமன்ற உத்தரவை பொலிஸ் மா அதிபர் குறைமதிப்பிற்கு உட்படுத்தியதாக பிரதம நீதியரசர் ஜயந்த ஜயசூரிய கண்டித்ததை அடுத்து இந்த அறிவிப்பு வெளியிடப்பட்டுள்ளது.
இடமாற்றம் செய்யப்பட்ட ஐந்து பொலிஸ் நிலைய பொறுப்பதிகாரிகளினால் சமர்ப்பிக்கப்பட்ட பிரேரணைக்கு அழைப்பு விடுக்கப்பட்ட போதே பொலிஸ் மா அதிபர் தென்னகோன் நீதிமன்றில் முன்னிலையாகிய போதே இவ்வாறு தெரிவித்தார்.
நீதிமன்றத்திற்கு வழங்கிய வாக்குறுதியை நடைமுறைப்படுத்த முடியாவிட்டால் பிரேரணை ஒன்றை சமர்ப்பித்து அது தொடர்பில் நீதிமன்றத்திற்கு அறிவித்திருக்க வேண்டும், ஆனால் அவ்வாறு செய்வதைத் தவிர்ப்பது தவறானது எனவும் பிரதம நீதியரசர் மேலும் சுட்டிக்காட்டினார். பிரதம நீதியரசர் ஜயந்த ஜயசூரிய மற்றும் நீதியரசர்களான முர்து பெர்னாண்டோ மற்றும் காமினி அமரசேகர ஆகியோர் அடங்கிய மூவரடங்கிய உயர் நீதிமன்ற அமர்வு முன்னிலையில் குறித்த பிரேரணை அழைக்கப்பட்டது.
மனுதாரர்கள் சார்பில் ஆஜரான ஜனாதிபதி சட்டத்தரணி சாலிய பீரிஸ், மாற்றப்பட்ட வாடிக்கையாளர்களுக்கு பொருத்தமான பொலிஸ் நிலையங்கள் வழங்கப்படுமென பிரதிவாதிகள் முன்னர் நீதிமன்றில் சமரசம் செய்ததாகவும், ஆனால் அவர்கள் அதற்கேற்ப நடவடிக்கை எடுக்கவில்லை எனவும் குற்றம் சுமத்தினார்.
மன்னார், வவுனியா, கொடிகாமம், கிளிநொச்சி, யாழ்ப்பாணம் ஆகிய பகுதிகளுக்கு இந்த பொலிஸ் பொறுப்பதிகாரிகள் இடமாற்றம் செய்யப்பட்டுள்ளதாகவும், இது பழிவாங்கும் நோக்கில் மேற்கொள்ளப்பட்டுள்ளதாகவும் அவர் குறிப்பிட்டுள்ளார்.
பிரதம நீதியரசர் ஜயந்த ஜயசூரிய திறந்த நீதிமன்றில் அறிக்கையொன்றை விடுத்ததுடன், உயர் நீதிமன்றில் எட்டப்பட்ட உடன்படிக்கையை நடைமுறைப்படுத்தாததற்காக பிரதிவாதிகளை கடுமையாக எச்சரித்தார். நீதிமன்றில் தீர்வு எட்டப்படும் போது அதனை நடைமுறைப்படுத்துவதற்கு தரப்பினர் கவனம் செலுத்த வேண்டுமென பிரதம நீதியரசர் சுட்டிக்காட்டினார். அதனை நடைமுறைப்படுத்த முடியாவிட்டால் பிரேரணை ஒன்றை சமர்ப்பித்து, அதனை உடனடியாக நீதிமன்றத்துக்கு அறிவிக்க வேண்டும் என குறிப்பிட்டார்.
