பொது நிறுவனங்களுக்கான குழுவின் (கோப்) சில உறுப்பினர்களும் அதன் தலைவர் ரஞ்சித் பண்டாரவும் ஸ்ரீலங்கா கிரிக்கெட் மீதான விசாரணையை தவறாகக் கையாள்வதாக ஒருவரையொருவர் குற்றம் சாட்டுவதால் இலங்கையின் கிரிக்கெட் நெருக்கடி குழப்பமான திருப்பத்தை எடுத்துள்ளது.
ஸ்ரீலங்கா கிரிக்கெட் மீதான விசாரணை முடியும் வரை பேராசிரியர் பண்டார குழுவின் தலைவர் பதவியில் இருந்து தற்காலிகமாக நீக்கப்பட வேண்டும் என சில கோப் உறுப்பினர்கள் சுட்டிக்காட்டினர்.
பேராசிரியர் பண்டார இலங்கை கிரிக்கெட் சபையால் விலைக்கு வாங்கப்பட்டவர் போன்று செயற்பட்டதாக எதிர்க்கட்சித் தலைவர் சஜித் பிரேமதாச தெரிவித்துள்ளார்.
“கோப் தலைவர், கை சமிக்ஞைகளைப் பயன்படுத்தி, செவ்வாய்க் கிழமை கூட்டத்தில் எம்.பி.க்கள் எழுப்பிய கேள்விகளுக்கு பதிலளிக்க வேண்டாம் என்று ஸ்ரீலங்கா கிரிக்கெட் உறுப்பினர்களுக்கு அறிவுறுத்தினார். சமூக ஊடகங்களில் பரப்பப்படும் காணொளிகளில் இது தெளிவாகத் தெரியும்” என்று பிரேமதாச கூறினார்.
எதிர்வரும் நாட்களில் ஸ்ரீலங்கா கிரிக்கெட் தொடர்பாக COPE மேற்கொள்ளவிருக்கும் எதிர்கால விசாரணைகளுக்கு பேராசிரியர் பண்டார தலைமை தாங்க அனுமதிக்கக் கூடாது என ஐக்கிய மக்கள் சக்தி பாராளுமன்ற உறுப்பினர் ஹேஷா விதானகே தெரிவித்தார்.
“நவம்பர் 24, 27 மற்றும் 28 ஆகிய திகதிகளில் கோப் குழு ஸ்ரீலங்கா கிரிக்கெட்க்கு அழைப்பு விடுத்துள்ளது. பேராசிரியர் பண்டாரவை தற்காலிகமாக நீக்கிவிட்டு, பதில் தலைவர் ஒருவரை நியமிக்குமாறு கேட்டுக்கொள்கிறோம்,” என்று அவர் கூறினார்.
பேராசியர் பண்டாரவை தலைமை தாங்கி ஸ்ரீலங்கா கிரிக்கெட் தொடர்பான எந்தவொரு விசாரணையிலும் தானும் கோப் குழுவின் சில உறுப்பினர்களும் பங்கேற்க விரும்பவில்லை என்று பாராளுமன்ற உறுப்பினர் எஸ்.எம். மரிக்கார் கூறினார்.
கோப் உறுப்பினர்களின் சிறப்புரிமைகளை பேராசிரியர் பண்டார மீறியதாக பாராளுமன்ற உறுப்பினர் சமிந்த விஜேசிறி குற்றம் சுமத்தியுள்ளார்.
“கோப் தலைவர் சிறப்புரிமைகள் சட்டத்தின் பிரிவு 18 இன் கீழ் கையாளப்படலாம்,” என்று அவர் கூறினார்.
பாராளுமன்ற உறுப்பினர் பிரேமநாத் தொல்லவத்தவும் கோப் தலைவரை தற்காலிகமாக வெளியேற்ற விரும்பினார்.
இதற்கு பதிலளித்த பேராசிரியர் பண்டார, விசாரணையை அரசியலாக்க எதிர்க்கட்சி உறுப்பினர்கள் முயற்சிப்பதாக குற்றம் சாட்டினார்.
“கோப் முடிந்தவரை சுதந்திரமாக இருக்கும் என்று எதிர்பார்க்கப்படுகிறது. எவ்வாறாயினும், ஸ்ரீலங்கா கிரிக்கெட் மீதான விசாரணையை அரசியலாக்க எதிர்க்கட்சி உறுப்பினர்களால் திட்டமிட்ட முயற்சி மேற்கொள்ளப்பட்டது,” என்றார்.
“நான் என் உதடுகளில் விரல்களை வைத்து, பல உறுப்பினர்கள் ஒரே நேரத்தில் பேசுவதால், எதிர்க்கட்சி எம்.பி.க்களை அமைதியாக இருக்கும்படி கேட்டுக் கொண்டேன்,” என்று அவர் மேலும் கூறினார்.
சபாநாயகர் மகிந்த யாப்பா அபேவர்தன இந்த விடயம் தொடர்பில் எவ்வித தீர்ப்பும் வழங்கவில்லை.
